ءانشى گاۋھار الىمبەكوۆا ەكىنشى ايەل بولمايتىنىن مالىمدەدى

استانا. 24 ماۋسىم. جاقىندا شىمكەنت قالاسىنىڭ 52 جاستاعى تۇرعىنى ءانشى گاۋھار الىمبەكوۆانى جاقسى كورەتىنىن, ونى ومىرلىك جار ەتكىسى كەلەتىنىن ءباسپاسوز ارقىلى بىلدىرگەن ەدى. وسىعان وراي ءانشى ۇسىنىس جاساعان ادامعا ءوز جاۋابىن بەردى. بۇل تۋرالى «زامانا» گازەتىنە سىلتەمە جاساپ ras.kz حابارلادى. ءانشى گاۋھار الىمبەكوۆا: «بۇل كىسىنىڭ توسىن ارەكەتىنە تاڭدانىپ وتىرمىن. ەگەر ول اقىل-ەسى ءبۇتىن, ءون بويىندا كەمىستىگى جوق جان بولسا, سەزىمىن نەگە مەنىڭ وزىمە كەلىپ ايتپايدى؟ قۇدايعا شۇكىر, قازىر زامان دامىعان. بايلانىسۋدىڭ دا ءتۇرلى-ءتۇرلى تاسىلدەرى بار. وزىمە كەلىپ, جاعدايىن ايتىپ, ۇناتىپ جۇرگەنىن بىلدىرسە, وندا اڭگىمە باسقاشا بولار ما ەدى… ءوزىنىڭ جەكە ءومىرىن, سەزىمىن كۇللى جۇرتقا جاريا ەتكەنىن ونشا تۇسىنبەي وتىرمىن», – دەدى. ال المابەك تاشمەتوۆ ەسىمدى ازامات بۇدان شامالى كۇن بۇرىن ايەلى اۋىر دەرتتەن قايتىس بولعانىن, قازىر جالعىزدىقتان جابىعىپ جۇرگەنىن, مۇمكىندىگى بولسا, ءالى تۇرمىس قۇرماعان گاۋھار الىمبەكوۆاعا ۇيلەنگىسى كەلەتىنىن ايتقان ەدى. «جاقىندا رەسپۋبليكا سارايىندا جەكە ءان كەشىمدى وتكىزدىم. سوندا ازىلدەپ, جۇرەگىنىڭ تۇگى بار ازاماتتى ىزدەپ جۇرگەنىمدى ايتىپ ەدىم. شاماسى, بۇل كىسى سودان كەيىن ويلانعان بولسا كەرەك. ەندى… بۇيىرعانىن كورەرمىز. بىراق ءدال قازىر ول كىسىمەن كەزدەسەيىن, كورەيىن دەپ ايتا المايمىن», – دەپ اشىعىن ايتتى الىمبەكوۆا. سونىمەن قاتار, تانىمال ءانشى بۇگىنگە دەيىن تۇرمىسقا شىعىپ, وتباسى قۇرماۋىنىڭ سەبەبىن ءتۇسىندىردى. «جولىققان جوق قوي. ءالى كۇتۋمەن كەلەمىن. جالپى, وتباسىن قۇرۋ, تۇرمىسقا شىعۋ وتە جاۋاپتى ماسەلە. مەن بۇعان نەمقۇرايدى قاراي المايمىن. جاسىراتىن نەسى بار, ماعان سەزىمىن بىلدىرەتىن ازاماتتار از ەمەس. بىراق جۇرەگىمدى ءدىر ەتكىزىپ, وزىنە بىردەن باۋراپ الاتىن جاندى ءالى كەزدەستىرگەن جوقپىن. شىنى كەرەك, كەيدە جۇرتتىڭ مەن تۋرالى ايتقان ءارتۇرلى اڭگىمەلەرىنەن شارشايمىن, كوزدى تارس جۇمىپ, الدىمنان شىققان ازاماتتىڭ ەتەگىنەن ۇستاي سالعىم كەلەدى. ءسويتىپ, ەلدىڭ وسەگىنەن قۇتىلسام با دەپ تە ويلانام. بىراق ولاي ىستەي المايدى ەكەنمىن. بازبىرەۋلەر سەكىلدى باي-باعلانداردىڭ ەكىنشى ايەلى نەمەسە ازاماتتىق نەكەدەگى اشىناسى دا بولا المايمىن. ويتكەنى, ونداي قىلىق مەنىڭ تابيعاتىما جات. مەن اۋىلدىڭ, اتا-انانىڭ, كەمپىر-شالدىڭ تاربيەسىندە بولعان, قازاقتىڭ ىرىم-تىيىمىن, سالتى مەن ءداستۇرىن ساناما ءسىڭىرىپ وسكەن قىزبىن. اقشا, اتاق ءۇشىن ءوزىم سۇيمەگەن ادامنىڭ سوڭىنان ەرىپ كەتە المايدى ەكەنمىن», — دەدى گاۋھار الىمبەكوۆا. اڭگىمە سوڭىندا ءانشى ءوزىنىڭ Instagram, Facebook سەكىلدى الەۋمەتتىك جەلىلەردە نە ءۇشىن وتىرمايتىنىن دا ايتتى. «ينستاگرامىڭىز» نە, «ۋاتساپ» دەگەننىڭ ءوزىن ەندى مەڭگەرۋدەمىن. جۇرت الدىنا شىعا بەرگەندى ۇناتپايمىن. الدەبىرەۋلەر سەكىلدى نە ءىشىپ-جەگەنىن, قانداي كيىم كيگەنىن, بۇگىن كىمنىڭ تويىندا ءان سالعانىن, ءتىپتى توڭازىتقىشىندا قاي جىلعى سوعىمنىڭ جاتقانىن ايتىپ, ەل الدىندا ەلپىلدەي بەرەتىندەردەن ەمەسپىن. الەۋمەتتىك جەلىدە جاعدايى تومەن, بىرنەشە جىلدىق سوعىم تۇگىلى ءبىر كيلو ەت تابا الماي وتىرعان ادامدار دا بار شىعار. سوندىقتان ولاردىڭ كوڭىل-كۇيىن ءتۇسىرىپ, قىزعانىشىن تۋدىرىپ, مايدا-شۇيدە نارسەنى جارىققا شىعارا بەرمەگەن ءجون. ءار ادامنىڭ ءوزىنىڭ جەكە ءومىرى, جۇرتقا جايۋعا بولمايتىن قۇپياسى بولۋى كەرەك. سونىسىمەن دە تارتىمدىراق كورىنەدى دەپ ويلايمىن», – دەيدى ءانشى. تالعات رايىمبەك. دەرەك, سۋرەت: ras.kz.