اتاۋلى ءىس-شارا اياسىندا ۇيىمداستىرىلعان بۇل جيىن – ۇلت رۋحانياتى مەن الەمدىك وركەنيەت اراسىنداعى التىن كوپىرگە اينالعان ءال-ءفارابيدىڭ مۇراسىن ناسيحاتتاۋعا, جاستاردىڭ عىلىمي ىزدەنىسىن جانداندىرۋعا باعىتتالدى. ءال-فارابي – ادامزات مادەنيەتىنىڭ تەمىرقازىعى, الەمدىك وركەنيەت كەڭىستىگىندە اقىل مەن پاراساتتىڭ, ىزگىلىك پەن ءبىلىمنىڭ نۇر شامشىراعىن جاققان ۇلى ويشىل. ونىڭ فيلوسوفيالىق تەرەڭ ويلارى, لوگيكالىق تالداۋى, ەتيكالىق قاعيداتتارى مەن عىلىمعا دەگەن كوزقاراسى عاسىرلار وتسە دە ءوز ءمانىن جويماي, بۇگىنگى ءححى عاسىردىڭ تسيفرلىق داۋىرىندە جاڭا قىرىنان تانىلىپ وتىر. ءىس-شاراعا ۋنيۆەرسيتەتتىڭ وقىتۋشى-پروفەسسورلار قۇرامى, دوكتورانتتار, ماگيسترانتتار, سونداي-اق «فارابيتانۋ» باعىتىن زەرتتەپ جۇرگەن جاس عالىمدار قاتىستى.
كەزدەسۋدى ء«ال-فارابي» عىلىمي-زەرتتەۋ ورتالىعى مەن ۋنيۆەرسيتەتتىڭ عىلىمي-يننوۆاتسيالىق جونىندەگى دەپارتامەنتى بىرلەسە ۇيىمداستىردى. شارا بارىسىندا «فارابيتانۋدىڭ» قازىرگى باعىتتارى, عۇلامانىڭ فيلوسوفيالىق جانە پەداگوگيكالىق يدەيالارىنىڭ زاماناۋي ءمانى, سونداي-اق, ونىڭ عىلىم مەن ادامزات مادەنيەتىنە قوسقان ۇلەسى كەڭىنەن تالقىلاندى.
ء«ال-فارابي» عىلىمي-زەرتتەۋ ورتالىعىنىڭ ديرەكتورى, ساياساتتانۋ عىلىمدارىنىڭ كانديداتى, قاۋىمداستىرىلعان پروفەسسور پىرىمبەك مۇحانبەت ۇلى سۇلەيمەنوۆ ءوز سوزىندە: «فارابي مۇراسى – تەك وتكەننىڭ جادىگەرى ەمەس, ول – بۇگىنگى جانە بولاشاق ۇرپاقتىڭ رۋحاني جانە عىلىمي باعدارشامى. ۋنيۆەرسيتەتىمىزدىڭ ميسسياسى – وسى مۇرانى زاماناۋي عىلىممەن ۇشتاستىرا وتىرىپ, ءبىلىم مەن مادەنيەتتىڭ جاڭا كوكجيەگىن اشۋ», - دەپ اتاپ ءوتتى.
كەزدەسۋ بارىسىندا قاتىسۋشىلار ۇلى ويشىلدىڭ ەڭبەكتەرىن زەرتتەۋ تاجىريبەلەرىمەن ءبولىسىپ, «فارابيتانۋ» عىلىمىنىڭ بولاشاقتاعى دامۋ باسىمدىقتارىن ايقىندادى. سونىمەن قاتار, ستۋدەنتتەر مەن جاس عالىمدارعا ارنالعان «فارابي الەمى» اتتى شىعارماشىلىق جانە عىلىمي باستامالار بايقاۋىنىڭ باستالعانى دا حابارلاندى.
بۇل تاعىلىمدى باسقوسۋ – ءال-فارابي اتىنداعى قازاق ۇلتتىق ۋنيۆەرسيتەتىنىڭ ءوزىنىڭ تاريحي ميسسياسىنا, ياعني ۇلى عالىمنىڭ يدەيالارىن ناسيحاتتاۋ مەن جۇزەگە اسىرۋ ىسىنە ادالدىعىنىڭ ايعاعى. ۋنيۆەرسيتەت قابىرعاسىندا وسىنداي مازمۇندى كەزدەسۋلەردىڭ ءوتۋى – جاس ۇرپاقتىڭ وتانسۇيگىشتىك سەزىمىن, عىلىمي ىزدەنىسكە دەگەن ىنتاسىن ارتتىرۋمەن قاتار, «فارابيتانۋ» ءىلىمىن الەمدىك دەڭگەيگە شىعارۋعا سەرپىن بەرەرى ءسوزسىز.
ءال-فارابي اتىنداعى قازاق ۇلتتىق ۋنيۆەرسيتەتى
فيلوسوفيا جانە ساياساتتانۋ فاكۋلتەتىنىڭ
پەداگوگيكا جانە ءبىلىم بەرۋ مەنەدجمەنتى
كافەدراسىنىڭ 2 كۋرس دوكتورانتى اميركانوۆ م.ب.
