بۇگىندە حالىق اراسىندا ەڭ تانىمال جيناق قۇرالى – بانك دەپوزيتى. ۇلتتىق بانكتىڭ دەرەگىنە سۇيەنسەك, سوڭعى بەس جىلدا ەل ازاماتتارىنىڭ بانكتەردەگى سالىمى تۇراقتى ءوسىپ كەلەدى. بۇل ازاماتتاردىڭ بولاشاعىنا قارجى ءبولۋ مادەنيەتى قالىپتاسىپ جاتقانىن كورسەتەدى.
ماسەلەن, 2025 جىلعى تامىز ايىنىڭ سوڭىندا جەكە تۇلعالاردىڭ بانك جۇيەسىندەگى سالىمدارى 26 ترلن تەڭگەدەن استى, بۇل وتكەن جىلمەن سالىستىرعاندا 17,5%-عا نەمەسە 3,9 ترلن تەڭگەگە كوپ. سوڭعى ءۇش جىلداعى ورتاشا جىلدىق ءوسىم 22,5% بولسا, 2020-2022 جىلدارى بۇل كورسەتكىش 17,7%, ال 2017–2019 جىلدارى 6,6% شاماسىندا بولعان. دەمەك, ازاماتتتار جيناقتاۋدىڭ ماڭىزىن تۇسىنە باستاعان.
الايدا ەڭ قيىنى جيناۋدى باستاۋ ەمەس, ونى ۇنەمى جالعاستىرىپ وتىرۋ. ياعني الدىمەن جۇمسايمىن, قالعانىن جينايمىن دەگەن تۇسىنىك قاتە. شىن مانىندە, كەرىسىنشە ىستەۋ قاجەت: تابىستى العان ساتتە الدىمەن بەلگىلى ءبىر بولىگىن جيناققا جىبەرىپ, تەك قالعانىن كۇندەلىكتى شىعىندارعا ءبولۋ كەرەك. ءتىپتى تابىستىڭ 10%-ىن تۇراقتى تۇردە جيناپ وتىرساڭىز, ۋاقىت وتە كەلە بۇل ەلەۋلى كاپيتالعا اينالادى. بۇل كۇردەلى پايىزدىڭ اسەرى, ياعني اقشا وزىڭىزگە تابىس اكەلىپ, «جۇمىس ىستەي» باستايدى.
مۇنداي ءتاسىل ءۇي الۋ سەكىلدى ءىرى ماقساتتارعا جەتۋگە دە كومەكتەسەدى. جۇيەلىلىك پەن جيناق داعدىسى ادامنىڭ قارجىلىق تۇراقتىلىعىن ارتتىرىپ, ارمانداعان باسپاناسىنا ءبىر قادام جاقىنداتادى.
