فۋتبول. قازاقستان يسپانيامەن جولداستىق كەزدەسۋ وتكىزەدى

استانا. 24 ماۋسىم. فۋتبولدان قازاقستان قۇراماسى 2016 جىلى يسپانيامەن جولداستىق كەزدەسۋ وتكىزەدى. بۇل تۋرالى قازاقستان فۋتبول فەدەراتسياسىنىڭ ءباسپاسوز قىزمەتى حابارلادى. مۇنداي كەلىسىمگە الماتىدا فۋتبولدان قازاقستان پرەزيدەنتىنىڭ كۋبوگى ءۇشىن ءوتىپ جاتقان تۋرنير بارىسىندا قول جەتتى. فەدەراتسيانىڭ باس مەنەدجەرى اسقار ۇرانحاەۆتىڭ ايتۋىنشا, يسپاندارمەن بىرلەسىپ جۇمىس ىستەۋ وتە ءتيىمدى. اتالعان ماتچ تۋرالى ول: «جولداستىق كەزدەسۋدى كەلەسى جىلى وتكىزۋدى جوسپارلاپ وتىرمىز. ناقتى داتاسىن الداعى ۋاقىتتا انىقتايمىز. ءبىزدىڭ قۇراما ءۇشىن مۇنداي دەڭگەيدەگى ويىن ءالى بولعان ەمەس», – دەدى. سونداي-اق, ا.ۇرانحاەۆ ەلىمىزدەن بىرنەشە جاس فۋتبولشىنى يسپانياعا جىبەرۋ مۇمكىندىگىنىڭ تۋعانىن ايتتى. ول جاقتا جاستارىمىز فۋتبولدىڭ قىر-سىرىن تەرەڭ مەڭگەرەتىن بولادى. يسپانيا قۇراماسى الەمدەگى فۋتبول الپاۋىتتارىنىڭ ءبىرى ەكەنى بەلگىلى. ولار 2010 جىلى الەم چەمپيوناتىندا جانە 2008, 2012 جىلدارى ەۋروپا چەمپيوناتىندا جەڭىمپاز اتاندى. ايتا كەتەيىك, الماتىدا ءوتىپ جاتقان تۋرنيرگە 17 جاسقا دەيىنگى جاسوسپىرىمدەر قاتىسۋدا. بۇل سايىستا قازاقستان مەن يسپانيا جاستارى ءبىر توپقا تۇسكەن بولاتىن. كەشە وتكەن قوس كوماندا اراسىنداعى ويىندا يسپاندار 5:0 ەسەبىمەن جەڭىسكە جەتتى. ەلامان قوڭىر. دەرەك: قازاقستان فۋتبول فەدەراتسياسىنىڭ ءباسپاسوز قىزمەتى. سۋرەت: footballtop.ru.