فوتو: اشىق دەرەككوز
ءماجىلىس وتىرىسىندا دەپۋتات تىلەكتەس ادامبەكوۆ ەل ازاماتتارىن الاڭداتقان سۇراقتى كوتەرىپ, تۇتىنۋشىلىق جانە يپوتەكالىق نەسيەلەردىڭ قاشان ارزاندايتىنىن سۇرادى. ءمادينا ابىلقاسىموۆا بۇل باعىتتا ناقتى جۇمىستار جۇرگىزىلىپ جاتقانىن ايتتى. ونىڭ سوزىنشە, سوڭعى ەكى جىلدا اگەنتتىك نەسيەلىك مولشەرلەمەلەردى تومەندەتۋ ءۇشىن زاڭنامالىق جانە رەتتەۋشى وزگەرىستەر ەنگىزگەن.
«وتكەن جىلى قابىلدانعان زاڭنان كەيىن ءبىز تۇتىنۋشىلىق نەسيەلەردىڭ مولشەرلەمەسىن 56 پايىزدان 46 پايىزعا, يپوتەكالىق نەسيەلەردى 30 پايىزدان 25 پايىزعا دەيىن تومەندەتتىك. ال كەپىلسىز نەسيەلەر بويىنشا مولشەرلەمە 45 پايىز دەڭگەيىندە بەكىتىلدى», دەدى ول.
ابىلقاسىموۆانىڭ ايتۋىنشا, 2025 جىلى يپوتەكالىق نەسيەلەردىڭ پايىزدىق مولشەرلەمەسىن 20 پايىزعا دەيىن ءتۇسىرۋ مۇمكىن بولعان. الايدا ۇلتتىق بانك بازالىق مولشەرلەمەنى 18 پايىزعا دەيىن كوتەرگەن سوڭ, كەيبىر بانكتەر يپوتەكالىق ونىمدەردى ۋاقىتشا توقتاتۋعا ءماجبۇر بولعان.
سوندىقتان قنردا يپوتەكالىق مولشەرلەمەلەردى تومەندەتۋ تۋرالى نورمانى 2026 جىلدىڭ 1 شىلدەسىنە دەيىن ۇزارتتى. وسى ۋاقىتقا دەيىن اگەنتتىك ۇلتتىق بانكپەن بىرلەسىپ جاڭا ەسەپتەۋ ادىستەمەسىن ازىرلەيدى. جاڭا جۇيە بازالىق مولشەرلەمەمەن تىكەلەي بايلانىستىرىلىپ, نارىقتاعى وزگەرىستەرگە يكەمدى بولماق.
«قازىر تۇتىنۋشىلىق نەسيەلەردىڭ ورتاشا مولشەرلەمەسى 35–36 پايىز شاماسىندا. ءبىز جاڭا ادىستەمەنىڭ وسى دەڭگەيدەن اسپايتىنىنا سەنەمىز. سونىمەن قاتار, نارىقتاعى باسەكە كۇشەيگەن سايىن مولشەرلەمەلەر ودان ءارى تومەندەۋى مۇمكىن», دەدى ءمادينا ابىلقاسىموۆا.
