«قۇرىلىسشى بولۋ – توزىمدىلىك پەن ەپتىلىكتى, جاۋاپكەرشىلىكتى قاجەت ەتەدى. ويتكەنى ءوز قولىڭمەن جاساعان ءار ءىستىڭ ساپالى بولۋى ماڭىزدى. سونداي-اق قۇرىلىس ۋاقىتتى ۇتىمدى پايدالانۋعا ۇيرەتەدى. ەڭبەك ادامىنىڭ بو-يىنا وسى قاسيەتتەر توعىسسا, وندا باستاعان ءىس تە ناتيجەلى ءارى ساپالى اياقتالىپ, كوپتىڭ العىسىن ارقالايدى. ەسەلى ەڭبەكتىڭ وتەۋى, ول – حالىقتىڭ ريزاشىلىعى, اقجارما العىسى», دەيدى بىلىكتى قۇرىلىسشى ق.اقىلبەكوۆ.
باتىس قازاقستان وبلىسى تەرەكتى اۋدانى اقجايىق اۋىلىندا دۇنيەگە كەلگەن ول, قازىردە قوناەۆ قالاسىنداعى تۇرعىنۇي كەشەندەرىنىڭ سالىنۋىنا سۇبەلى ۇلەس قوسىپ كەلەدى. بالا كەزدەن قولىنا بالعا-شەگە ۇستاۋدى ۇيرەنگەن ەڭبەكقور قانات وسە كەلە اكە جولىن قۋىپ, بۇل ماماندىقتى ومىرلىك باعىت رەتىندە تاڭداپ الدى.
«اكەم دە كەزىندە قۇرىلىسشى بولعان. وسى سالانىڭ قيىندىعى مەن جاۋاپكەرشىلىگىن بالا كۇنىمنەن كورىپ ءوستىم. كەيىن جوعارى وقۋ ورنىن ءتامامداپ, ەلىمىزدەگى ءىرى قۇرىلىس كومپانيالارىنىڭ بىرىندە ەڭبەك جولىمدى باستادىم», دەيدى ول.
العاش رەت الماتى قالاسىندا ەكىقاباتتى ءۇي سالۋعا قاتىسۋى سالاعا دەگەن قىزىعۋشىلىعىن ارتتىرا ءتۇستى. ودان كەيىنگى جىلدارى كوپقاباتتى كەشەندەردىڭ تۇرعىزىلۋىنا اتسالىسىپ, تاجىريبەسىن شىڭدادى. بۇگىندە قوناەۆ قالاسىنداعى «Retail Construction» جشس-دە قۇرىلىس ۋچاسكەسىنىڭ باسشىسى قىزمەتىن اتقارادى. نىساننىڭ ساپالى ءارى قاۋىپسىز بولۋى جولىندا جۇمىس بارىسىن ءجىتى قاداعالايدى. قۇرىلىس الاڭىندا ماتەريالدى قابىلداۋ, ىرگەتاس پەن كىرپىش قالاۋ, بەتون قۇيۋ – بارلىعى قاناتتىڭ باقىلاۋىنان وتەدى.
قۇرىلىس سالاسىندا ساپالى ءىس-تاجىريبەمەن عانا تابىسقا جەتۋگە بولاتىنىن العا تارتقان ق.اقىلبەكوۆ زامانداستارىن ىسكەرلىككە, ەڭبەكقورلىققا ۇندەدى.
«قۇرىلىس سالاسىندا ءوز ورنىڭدى تابۋ ءۇشىن كەم دەگەندە 6-7 جىل تاباندى ەڭبەك ەتۋ قاجەت. سوندىقتان جاستار ماماندىعىن جاۋاپكەرشىلىكپەن تاڭداپ, قابىلەتتەرىنە ساي جول ىزدەگەنى ءجون. بۇگىنگى جەتىستىك – ەرتەڭگى مۇمكىندىكتىڭ باستاۋى. قازىر جيناعان ءبىلىم مەن تاجىريبەمدى ەرتەڭ ءوز كاسىبىمدى اشۋعا پايدالانامىن», دەيدى ول.
بۇگىندە ءوڭىر-وڭىردە بوي كوتەرىپ جاتقان ءزاۋلىم ۇيلەر مەن ءساندى عيماراتتار – قىسى-جازى بەل جازباي ەڭبەك ەتەتىن قۇرىش قولدى قۇرىلىسشىلاردىڭ ماڭداي تەرىنىڭ, ەرەن ەڭبەگىنىڭ جەمىسى, تۇرعىنداردىڭ قاۋىپسىزدىگى مەن جايلى ءومىرىنىڭ كەپىلى. سول تۇرعىدا قانات اقىلبەكوۆ سياقتى مامانداردىڭ ەڭبەگى قاشان دا قۇرمەتكە لايىق.
الماتى وبلىسى
