كىتاپحاناداعى كەزدەسۋدە شوقاننىڭ ءوز شىعارمالارى جانە ول تۋرالى جازىلعان عىلىمي, ادەبي ەڭبەكتەر كورمەگە قويىلدى. وتىزعا تولماعان جاسىندا الەمدىك عىلىمعا ۇلەس قوسقان شوقاننىڭ اكادەميك الكەي مارعۇلان قۇراستىرعان التى تومدىق تولىق شىعارمالار جيناعى كىمگە بولسا دا اسەرلى ەكەنى داۋسىز. سونىڭ ىشىندە بۇرىن ەۋروپا ەلدەرى مەن رەسەيگە قۇپيا بولىپ كەلگەن قاشقار ساپارىنان جازعان «التى شاھار ەلى تۋرالى» ەڭبەگى ءوزىنىڭ ماڭىزىن ءالى كۇنگە جويماعان. م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ قازاقستان تاريحى جانە قۇقىق كافەدراسىنىڭ پروفەسسورى, تاريح عىلىمدارىنىڭ كانديداتى زليحا بيماقانوۆا عالىمنىڭ وسى ەڭبەگىنە توقتالىپ, ونىڭ ماڭىزىن جينالعان جاستارعا تەرەڭنەن قاۋزاپ جەتكىزۋگە تىرىستى. ال وسى ۋنيۆەرسيتەتتىڭ جانىنان اشىلعان ش.ءۋاليحانوۆ اتىنداعى تاريح جانە ەتنولوگيا ينستيتۋتى پەتروپاۆل فيليالىنىڭ ديرەكتورى نۇربولات ءابۋوۆ شوقان تاعىلىمىن زەرتتەۋ بارىسىنداعى عىلىمنىڭ بۇگىنگى قول جەتكىزگەن تابىستارىنا توقتالدى. سونداي-اق ۇلتتىق ۇلان اكادەمياسىنىڭ جالپى ءبىلىم بەرەتىن پاندەر كافەدراسىنىڭ وقىتۋشىسى, ماگيستر مارات مالىباەۆ تا شوقاننىڭ قاشقاريا مەن قوقانداعى ميسسيالارى تاقىرىبىندا بايانداما جاسادى.
كەش سوڭىندا شوقان ءۋاليحانوۆ تۋرالى اڭگىمەلەردەن جاس عالىمنىڭ اتاقتى ساققۇلاق بيمەن بولعان ديالوگىنەن ۇلتتىق ۇلاننىڭ كۋرسانتتارى تاماشا قويىلىم كورسەتتى.
ال «ابىلاي حاننىڭ رەزيدەنتسياسى» مۋزەي-كەشەنىندەگى كەشكە تاريح عىلىمدارىنىڭ دوكتورى, ۇلتتىق عىلىم اكادەمياسىنىڭ اكادەميگى, اتاقتى ابىلايتانۋشى بولاتبەك ناسەنوۆ قاتىسىپ, شوقان, ابىلاي ومىرلەرىنەن جۇرتقا بەلگىسىز قىزىقتى دەرەكتەر ايتتى. ول شوقان ءولىمىنىڭ قۇپياسى ءالى اشىلماعانىن جەتكىزدى. «اعا سۇلتاننىڭ بالاسى, تۇرمىستىق جاعدايى وتە جاقسى ادام قۇرت اۋرۋىنان قازا بولعان دەگەنگە سەنۋ قيىن. تالاي ادامدار قازاق ەمىنىڭ, قىمىزدىڭ قۇدىرەتىمەن جازىلىپ كەتكەندە شوقان دا جازىلۋى كەرەك ەدى عوي» دەي كەلىپ, وزىنە ءبىر ورىس عالىمىنىڭ قۇپيا جاعدايدا شىندىقتى ايتقانىن جەتكىزدى. «بىراق الگى دەرەكتى دالەلدەۋ قيىن, ەشقانداي قۇجات ءبىزدىڭ قولىمىزدا جوق» دەدى عالىم. ال بەلگىسىز عالىمنىڭ ايتۋىنا قاراعاندا, شوقان وقتان قازا تاپقان. جانىنداعى ءۇش وفيتسەرمەن كەلە جاتقاندا ايدالادا ءبىر قازاق كەزدەسەدى. سونى جەلوكپە ورىستىڭ ءبىرى ءسوزىن تۇسىنبەگەنىنە بولا اتىپ تاستايدى. بۇعان قاتتى نامىستانعان شوقان الگى وفيتسەردى اتىپ ولتىرەدى. ال ءۇشىنشى وفيتسەر شوقاندى اتادى. ءسويتىپ, قايداعى ءبىر ۇساق جانجالدىڭ كەسىرىنەن ۇلى عالىم قاپيادا قازا بولعان ەكەن-مىس...
شوقانعا بايلانىستى وسىنداي قىزىق اڭگىمەلەر ايتقان اتاقتى عالىمدى كەشكە جينالعاندار ىقىلاسپەن تىڭدادى.
پەتروپاۆل
