پرەزيدەنت جانىنداعى ۇلتتىق عىلىم اكادەمياسى مەملەكەت باسشىسى قاسىم-جومارت توقاەۆتىڭ كليماتتىق تۇراقتىلىقتى قامتاماسىز ەتۋ جانە 2060 جىلعا دەيىن كومىرتەگى بەيتاراپتىعىنا قول جەتكىزۋ جونىندەگى تاپسىرمالارىن ىسكە اسىرۋ ماقساتىندا ەلىمىزدەگى العاشقى اگروكليماتتىق «KAZ AGRO CARBON» كاربون پوليگونىن اشتى. پوليگون ا.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ بازاسىندا ورنالاسقان. بۇل يگى ىسكە رەسەيلىك سەرىكتەس رەتىندە رەسەي عىلىم اكادەمياسىنىڭ اگرارلىق ەكولوگيا فەدەرالدىق عىلىمي ورتالىعى دا قاتىسىپ جاتىر.
ءبىر ايتا كەتەرلىگى, پوليگون تيپتىك اگرولاندشافتتىق اۋماقتا ورنالاسىپ, ەكوجۇيەلەردىڭ جاعدايىن جىل بويى باقىلاۋعا مۇمكىندىك بەرەتىن زاماناۋي جابدىقتارمەن قامتاماسىز ەتىلگەن. مۇندا توپىراقتاعى كومىرتەگى تەڭگەرىمىن, CO₂ جانە CH₄ اعىنىن ولشەيتىن كامەرالار مەن سەنسورلار ورناتىلعان, سونداي-اق تەمپەراتۋرا, ىلعالدىلىق جانە جاۋىن-شاشىن كورسەتكىشتەرىن تىركەيتىن مەتەورولوگيالىق بەكەتتەر جۇمىس ىستەيدى.
ساراپتامالىق باعالاۋلار بويىنشا ەلىمىزدە كومىرتەكتى سەكۆەسترلەۋ الەۋەتى جىلىنا 535 ملن تونناعا دەيىن جەتۋى مۇمكىن. كومىرتەكتى وفسەتتەر ساۋداسى جىل سايىن ەل ەكونوميكاسىنا 25 ملرد دوللارعا دەيىن تارتۋعا مۇمكىندىك بەرەدى, بۇل ورنىقتى دامۋ مەن ەكونوميكالىق الەۋەتتى نىعايتۋ ءۇشىن جاڭا مۇمكىندىكتەر اشادى.
بولاشاقتا پوليگون فەرمەرلەر ءۇشىن تاجىريبە الاڭىنا اينالىپ, ولار جينالعان كومىرتەگىنى سەرتيفيكاتتاۋ جانە كومىرتەگى كۆوتالاۋ جۇيەسىنە قاتىسۋ مۇمكىندىگىنە يە بولادى. بۇل قازاقستاننىڭ كومىرتەگى كۆوتالارى نارىعىنا رەسمي تۇردە شىعۋىنا جانە ەكولوگيالىق ناتيجەلەردى ناقتى ەكونوميكالىق تابىسقا اينالدىرۋعا جول اشادى.
شورتاندى اۋدانى,
اقمولا وبلىسى
