فوتو: اشىق دەرەككوز
بۇگىن قازاقستاننىڭ بارلىق وبلىس جانە اۋدان ورتالىقتارىندا كەڭ اۋقىمدى «حالىق زاڭگەرى» رەسپۋبليكالىق اكتسياسى ءوتتى. شارا بارىسىندا ازاماتتاردىڭ قۇقىقتىق ماسەلەلەرىنە ناقتى ءارى كاسىبي كومەك كورسەتىلدى.
ءاربىر نيەت ءبىلدىرۋشى تانىمال ادۆوكاتتار مەن تاجىريبەلى زاڭگەرلەردەن تەگىن كەڭەس الىپ, وزدەرىن تولعاندىرعان سۇراقتارىن مەملەكەتتىك ورگانداردىڭ باسشىلارىنا تىكەلەي قويۋعا مۇمكىندىك الدى.
اكتسيانى باس پروكۋراتۋرا ادىلەت مينيسترلىگىمەن, جەرگىلىكتى اتقارۋشى جانە قۇقىق قورعاۋ ورگاندارىمەن بىرلەسىپ ۇيىمداستىردى. ءىس-شاراعا ادۆوكاتتار, زاڭگەرلەر, نوتاريۋستار مەن سوت ورىنداۋشىلارى بەلسەنە قاتىسىپ, «ZakonKZ» جانە «پاراگراف» جەلىلىك باسىلىمدارى اقپاراتتىق قولداۋ كورسەتتى.
ناتيجەسىندە 250-دەن استام قالا مەن ەلدى مەكەندە 120 مىڭنان استام ازامات تەگىن قۇقىقتىق كەڭەس الدى. كەلۋشىلەرگە زاڭدىلىق پەن قۇقىقتىق ءتارتىپتى ساقتاۋ, ينتەرنەت-الاياقتىقتان قورعانۋ, «دروپپەرلىك» ارەكەتتەردىڭ سالدارى, سونداي-اق EGOV.kz جانە Kaspi.kz پلاتفورمالارى ارقىلى نەسيەلەردى بۇعاتتاۋ تاسىلدەرى تۋرالى تولىق اقپارات بەرىلدى.
بيىلعى اكتسياعا 4 مىڭنان استام زاڭگەر, ادۆوكات, نوتاريۋس جانە قۇقىق قورعاۋ ورگاندارىنىڭ وكىلدەرى قاتىسىپ, اۋقىمى مەن قامتىلۋى جاعىنان رەكوردتىق كورسەتكىشكە جەتتى.
