ەرەكشە مەكەننىڭ سۇلۋلىعىن تاماشالاۋعا كەلەتىن تۋريستەردىڭ قاۋىپسىزدىگىن قامتاماسىز ەتۋگە باعىتتالعان 7 كورىنىس الاڭى جاڭادان جابدىقتالدى. جوبانىڭ ارتىقشىلىعى - ەكوجۇيەگە تۇسەتىن رەكرەاتسيالىق جۇكتەمەنى ازايتۋعا باسىمدىق بەرىلگەن.
«بۋراباي» مۇتپ بۇقارالىق اقپارات قۇرالدارى ءۇشىن ۇيىمداستىرعان ءباسپاسوز تۋرى بارىسىندا وسى 7 الاڭنىڭ ارقايسىسى وزىنشە سۇلۋ تابيعاتتى جاڭا قىرىنان تاماشالاۋعا مۇمكىندىك بەرەتىنىن بايقادىق.
ء«بيشى قايىڭدار» ساياباعىندا ۇنەمى تەربەلىپ, بيلەپ تۇرعانداي اسەر قالدىراتىن اق قايىڭداردىڭ اراسىندا وتباسىلىق دەمالىسقا ارنالعان ويىن ايماقتارى, اتكەنشەكتەر مەن سپورتتىق قۇرىلعىلارى بار جايلى كەڭىستىك ورنالاسقان. ادامنان ۇرىكپەي, جايباراقات جاڭعاق شاعىپ جۇرگەن تابيعاتتىڭ ەركەسى تيىندەر مەن كولدە ەمىن-ەركىن, سىزىلا جۇزگەن ۇيرەكتەر دە جانعا جايلىلىق سىيلاپ تۇرعانداي. كول جاعاسىنا سۋدىڭ سىبدىرىن سەزىنۋگە ارنالعان ارنايى ورىندىق قويىلىپتى. بۇل جەردە ۇزاعىراق وتىرعان ادام, سۋ دىبىسىنىڭ سان قۇبىلاتىنىن اڭعارادى ەكەن.
«ايۋتاس» جارتاسىنىڭ جوعارى جاعىنداعى تەراسسادا «قۇماي تازى» ءمۇسىنى ورناتىلعان. بۇل جارتاستىڭ ەرەكشەلىگى تاۋدىڭ باسىندا ايۋ مەن قاسقىرعا ۇقساس ەكى تاس بىرىكتىرىلگەن. ايۋ جاردىڭ شەتىندە ەڭكەيىپ, شىڭىراۋعا قاراپ وتىر, ال قاسقىر ازۋ تىستەرىن اقسيتىپ, تۇمسىعىن تىك كوتەرىپ ارتىنان اڭدىپ كەلە جاتىر. ەل اۋزىنداعى اڭىز بويىنشا بۇل جەردە انالىق ايۋ مەن ونىڭ قونجىقتارى ءومىر سۇرگەن. قونجىقتارىن قورعاۋ ءۇشىن ول قاسقىرمەن ايقاسقان. ايۋ اقىرىن جىلجىپ, جورعالاپ, قونجىقتارىن قاۋپسىز جەرگە سۇيرەپ اپارعان. بىراق ءوزى تاسقا اينالعان. سودان بەرى جۇرەك جۇتقان ايۋدىڭ ءجۇرىسىن بەينەلەيتىن «جورعا ايۋ» كۇيى پايدا بولعان ەكەن.
147 مەتر بيىكتىكتە ورنالاسقان «بولەكتاۋ» تاۋىنىڭ كورىنىس الاڭىندا قاناتىن كەڭگە جايعان بۇركىت بەينەسى ورناتىلعان. تاۋعا كوتەرىلگەندە الدان تاڭعاجايىپ پانوراما اشىلادى. شىڭنان بۋراباي كولى, ايناكول كولى (ۇلكەن شاباقتى) جۇمباقتاس جارتاسى, وقجەتپەس تاۋى جانە كوكشە شىعاناعىنىڭ كورىنىسى كورىنەدى. ەل اۋزىنداعى اڭگىمەگە سەنسەك ءدال وسى جەردە «جاپىراق ءتارىزدى ەنەرگيا اعاشى» وسەدى. تاۋعا كوتەرىلگەن ادامدار كۇش جيناپ, ەنەرگيا الىپ قايتادى. ويتكەنى بۇل جەردە تىلەكتەر ورىندالىپ, ناعىز كەرەمەتتەر ورىن الادى.
«كەبىستاس» جارتاسىنداعى الاڭدا وشاق ورنى جانە ايەل بەينەسىندەگى ءمۇسىنى بار تەراسسا قويىلعان. بۇل جەردەن كول جاعالاۋى مەن قاراعايلى ورماننىڭ كورىنىسى كوز تارتادى.
پارك اۋماعىنداعى ايرىقشا ورىننىڭ ءبىرى «ماحاببات الاڭى». رومانتيكالىق اتموسفەرا بەرەتىن الاڭنىڭ جۇمساق لاندشافتىق ديزاينى عاشىق جاندارعا كەرەمەت اسەر سىيلايدى. فوتوسەسسياعا جانە دەمالۋعا قولايلى جاعداي جاسالعان.
كوپىرلەرمەن جالعانعان ءۇش كورىنىس پلاتفورماسى بار «ماكسيمكا» جارتاسىنداعى, «مويناق جارتاسى» جانە «يماناي بۇلاعىنداعى» كورىنىس الاڭدارىنىڭ دا اسەمدىگى كوپشىلىكتىڭ كوزىن ءسۇيسىندىردى. بارلىق الاڭدار ارنايى باسپالداقپەن, ورىندىقتارمەن, مۇسىندەرمەن, اقپاراتتىق تاقتالار جانە تاۋلى كورىنىستى تاماشالاۋعا ارنالعان دۇربىلەرمەن جابدىقتالعان.
تۋريستەرگە تاڭعاجايىپ كوڭىل-كۇي سىيلايتىن تاعى ءبىر ورىن كيىز ءۇي پىشىندەس «كۇيگەن ءمۇيىس» الاڭى. ارت-وبەكتىلەر مەن ەرەكشە بەسەدكالارمەن بەزەندىرىلگەن بۇل اۋماقتان تاۋلاردىڭ ۇستىنەن كۇننىڭ باتۋى كەرەمەت كورىنەدى. كەڭ بايتاق قازاق دالاسىندا 130-دان استام وزگە ۇلت وكىلدەرى تاتۋ-ءتاتتى ءومىر ءسۇرىپ جاتىر. تەراسسادا كيىز ءۇيدىڭ ورنالاسۋىنىڭ ءوزى ەلىمىزدەگى ەتنوستىق بىرلىكتى, ىنتىماق پەن تاتۋلىقتى پاش ەتىپ تۇر.
جوبالاۋشى كومپانيانىڭ تەحنيكالىق ديرەكتورى راۋان ءتاتتىبايدىڭ ايتۋىنشا بارلىق شولۋ الاڭدارىن ورنالاستىرۋ كەزىندە بىردە ءبىر اعاشقا زاقىم كەلمەگەن.
- بۋرابايدى تاماشالاۋعا جىل سايىن 1,5 ملننان استام تۋريست كەلەدى. قانشالىقتى ينفراقۇرىلىم جەتىلدىرىلسە, سونشالىقتى كەلۋشىلەردىڭ دە سانى ارتا تۇسەدى. وسى جوبانى قولعا العان ساتتەن باستاپ, جايلىلىعى مەن ادەمىلىگىنەن بولەك, تابيعاتقا ەشقانداي زيان كەلمەۋىنە باسا ءمان بەردىك. قۇرىلىس جۇمىستارى كەزىندە ەشقانداي اعاش كەسىلمەدى. بارلىعىن ءوز ورنىندا قالدىرۋعا تىرىستىق. باستى ماقساتىمىز تۋريستەردىڭ قاۋىپسىزدىگىن قامتاماسىز ەتۋ, ولارعا ەرەكشە اسەر سىيلاۋ بولدى. جەتى شولۋ الاڭىن قازاق حالقىنىڭ ماڭىزدى سيمۆولدارىنىڭ ءبىرى جەتى قازىنامىزعا ارنادىق. ويتكەنى, بۇل جەرگە شەت ەلدەردەن دە كوپتەگەن تۋريستەر كەلەدى. شەتەلدىكتەرگە ۇلتتىق قۇندىلىعىمىزدى وسىلاي دارىپتەگەمىز كەلدى. ءار لوكاتسيادا ورنالاسقان اقپاراتتىق تاقتادا قازاق,ورىس,اعىلشىن تىلدەرىندە تابيعي مەكەننىڭ تاريحى, ولار تۋرالى حالىق اڭىزدارى, جالپى سيپاتتاماسى جازىلعان,-دەيدى ر.ءتاتتىباي.
سوڭعى جىلدارى پاركتىڭ تانىمال ايماقتارىنا كەلۋشىلەردىڭ سانى ارتقانىنا قاراماستان , قورعالاتىن ايماقتاعى ءتارتىپ بۇزۋشىلىق جاعدايلارى ازايعان. بۇل ورايدا تابيعاتتىڭ تازالىعىنا اتسالىسىپ جۇرگەن ورمانشىلاردىڭ ەڭبەگى وراسان.
جاڭادان جابدىقتالعان كورىنىس الاڭدارى – تابيعات پەن ءتۋريزمنىڭ ۇيلەسىمدى دامۋىنا جول اشىپ, تۋريستەر ەندى ەلىمىزدىڭ ءىنجۋ-مارجانىن بيىكتەن تاماشالاي الادى.
