كەزدەسۋ «ۇلتتىق قور – قازاقستان بالالارىنا. يننوۆاتسيالىق ساياسات جانە جاھاندىق ىقپال ەتۋ الەۋەتى» اتتى حالىقارالىق سيمپوزيۋم شەڭبەرىندە ءوتتى. شاراعا سينگاپۋر, اقش, قىتاي, موڭعوليا, كورەيا جانە ءازىربايجان ۋنيۆەرسيتەتتەرىنەن كەلگەن وننان استام ساراپشى دەلەگاتسيا قاتىستى.
Washington University in St. Louis وكىلدەرى قازاقستانعا «ۇلتتىق قور – بالالارعا» باعدارلاماسىنىڭ تاجىريبەسىن زەردەلەۋ ماقساتىندا كەلگەن. سيمپوزيۋم اتالمىش امەريكالىق ۋنيۆەرسيتەتتەگى ارىپتەستەردىڭ باستاماسىمەن ۇيىمداستىرىلدى.
ۆاشينگتون ۋنيۆەرسيتەتىنىڭ الەۋمەتتىك دامۋ ورتالىعىنىڭ (CSD) حالىقارالىق ديرەكتورى لي زوۋ قازاقستاننىڭ باستاماسىن جوعارى باعالاپ, ونى الەمگە ۇلگى بولارلىق جاڭاشىل جوبا دەپ اتادى.
– «ۇلتتىق قور – بالالارعا» باعدارلاماسى بۇكىل الەم ءۇشىن ۇلگى بولارلىق رەۆوليۋتسيالىق باستاما ەكەنىن ايتقىم كەلەدى. بۇل جوبا – سىزدەردىڭ پرەزيدەنتىڭىزدىڭ ستراتەگيالىق كوزقاراسىنىڭ ناتيجەسى جانە قالالاردا نەمەسە اۋىلداردا تۇراتىنىنا قاراماستان, ەلدەگى بارلىق بالاعا ينۆەستيتسيا سالۋعا دەگەن ۇمتىلىسىنىڭ كورىنىسى. قازاقستاننىڭ جەتى ميلليون بالاسىنىڭ ءبارى وسى كورەگەن جوبانىڭ بەنەفيتسيارلارى بولىپ تابىلادى, – دەدى لي زوۋ.
ونىڭ ايتۋىنشا, بۇل باعدارلاما قازاقستان ءۇشىن دە, ءوڭىر ءۇشىن دە جانە جاھاندىق دەڭگەيدە دە ماڭىزدى باستاما بولىپ سانالادى. سونداي-اق, ول سيمپوزيۋمنىڭ قازاقستاندىق ستۋدەنتتەر مەن ازاماتتار, سونداي-اق حالىقارالىق ساراپشىلار اراسىنداعى تاجىريبە الماسۋعا جانە ءبىلىم كەڭىستىگىن كەڭەيتۋگە مۇمكىندىك بەرگەنىن اتاپ ءوتتى.
دينارا زاكيەۆا ءوز كەزەگىندە شەتەلدىك ۋنيۆەرسيتەت وكىلدەرىنىڭ قازاقستان تاجىريبەسىنە قىزىعۋشىلىق تانىتۋى ەلدىڭ الەۋمەتتىك ساياساتىنداعى جۇيەلى وزگەرىستەردىڭ ناتيجەسى ەكەنىن ايتتى. ونىڭ سوزىنشە, «ۇلتتىق قور – بالالارعا» باعدارلاماسى – بولاشاق ۇرپاقتىڭ الەۋەتىنە ينۆەستيتسيا سالۋعا باعىتتالعان ماڭىزدى الەۋمەتتىك باستاما.
– بۇل باعدارلاما ءاربىر بالانىڭ ءال-اۋقاتىن ارتتىرۋمەن قاتار, قوعامنىڭ ادىلدىك پەن تەڭ مۇمكىندىكتەر قاعيداتىنا نەگىزدەلگەن دامۋىنا سەرپىن بەرەدى. قازاقستان تاجىريبەسىنە حالىقارالىق ساراپشىلاردىڭ جوعارى باعا بەرۋى – ەلدىڭ بالالارعا باعىتتالعان مەملەكەتتىك ساياساتىنىڭ تيىمدىلىگىن دالەلدەيدى, – دەدى دينارا زاكيەۆا.
ومبۋدسمەن سونداي-اق «ۇلتتىق قور – بالالارعا» جوباسى حالىقارالىق دەڭگەيدەگى ىنتىماقتاستىق پەن ءبىلىم الماسۋ الاڭىنا اينالىپ وتىرعانىن اتاپ ءوتتى.
