س.تورايعىروۆ اتىنداعى وبلىستىق كىتاپحانا ديرەكتورى شولپان شاحمەتوۆانىڭ بۇل سالاداعى ەڭبەك ءوتىلى 40 جىلعا جۋىق. سوناۋ 1987 جىلى ءال-فارابي اتىنداعى شىمكەنت پەداگوگيكالىق مادەنيەت ينستيتۋتىن «كىتاپحاناشى-بيبليوگراف» ماماندىعى بويىنشا تامامداعان سوڭ, ەڭبەك جولىن بىردەن قازىرگى س.تورايعىروۆ اتىنداعى وبلىستىق كىتاپحانادا بيبليوگراف رەتىندە باستاعان. مەكەمەدە اقپاراتتىق-بيبليوگرافيالىق ءبولىم مەڭگەرۋشىسى, كىتاپحانا ديرەكتورىنىڭ ورىنباسارى بولىپ قىزمەت ىستەدى. 2015 جىلدان وبلىستىق كىتاپحاناعا باسشىلىققا تاعايىندالىپ, بۇل مىندەتتى 10 جىلدان استام ۋاقىت جاۋاپكەرشىلىكپەن اتقارىپ كەلە جاتقانىنا ارىپتەستەرى دە, وقىرماندار دا كۋا.
«قازىرگى تاڭدا قوعامنىڭ رۋحاني جانە مادەني دامۋىنىڭ ماڭىزدى تىرەكتەرىنىڭ ءبىرى – كىتاپحانا. وسى ورايدا وبلىستىق كىتاپحانا باسشىسى شولپان بايانقىزى ۇجىمعا جاڭا سەرپىن بەرىپ, ايماق تۇرعىندارىنىڭ مادەني ومىرىنە ەلەۋلى ۇلەس قوسىپ كەلەدى. كىتاپحانانىڭ ماتەريالدىق-تەحنيكالىق بازاسىن جاڭارتۋ, تسيفرلاندىرۋ باعىتىندا بىرقاتار جوبانى جۇزەگە اسىردى. «كitap24.كz» ەلەكتروندى كىتاپحاناسىن جاساپ, وقىرماندارعا ونلاين قىزمەت كورسەتۋ جۇيەسى ەنگىزىلدى. سونداي-اق قالالىق, اۋداندىق, اۋىلدىق كىتاپحانالارمەن بايلانىس نىعايتىلدى. كىتاپحانامىز وقۋ ورنى عانا ەمەس, مادەني-اعارتۋشىلىق ورتالىققا اينالدى. مۇندا ءتۇرلى ادەبي كەشتەر, اقىن-جازۋشىلارمەن كەزدەسۋلەر, شىعارماشىلىق بايقاۋلار وتكىزىلىپ, وقىرمان كلۋبتارى تۇراقتى جۇمىس ىستەپ تۇر», دەيدى س.تورايعىروۆ كىتاپحاناسىندا ۇزاق جىلدان بەرى ەڭبەك ەتەتىن ارىپتەسى بارشاگۇل بايجانوۆا.
جاستاردى كىتاپ وقۋعا ىنتالاندىرۋ ماقساتىندا «كىتاپ جانە قالامگەر», «پاۆلودارلىقتار بالالارعا كىتاپ وقيدى», «وقيتىن پاۆلودار», «ەرتىس-بايان پەرزەنتتەرى», «قالامگەر», «برايل قارپىندەگى پاۆلودار كىتابى», «كىتاپحانا – اۋىل شامشىراعى» سياقتى جوبالار جولعا قويىلدى. بۇل ءىس-شارالار جاس بۋىننىڭ رۋحاني ءوسۋى مەن ۇلتتىق قۇندىلىقتارعا بەت بۇرۋىنا ىقپال ەتەدى.
پاۆلودار وبلىسى
