ماماندار ءۇي سالۋمەن, ەلەكتر ەنەرگياسىن بەرەتىن, تاراتاتىن كاسىپورىنداردا, اۆتوموبيل وندىرىسىندە, كەن, مۇناي جانە گازدى ءوندىرۋ جانە قايتا وڭدەۋ سالالارىندا جۇمىس ىستەيدى.
جۇمىسشى ماماندارىنىڭ ەڭبەگى وراسان زور. قيىن جۇمىستارى ءۇشىن قولداۋ جانە تۇرعىن ءۇي ماسەلەسىن شەشۋگە كومەكتەسۋ ءۇشىن بيىل «وتباسى بانك» («بايتەرەك» حولدينگىنىڭ ەنشىلەس ۇيىمى) العاش رەت ولارعا ارنالعان جەكە باعىت – «ناۋرىز جۇمىسكەر» باعدارلاماسىن ىسكە قوستى. وتىنىمدەردى قابىلداۋ 2025 جىلدىڭ 17 ناۋرىزىندا باستالدى. باعدارلامانىڭ جۇمىس ىستەۋ كەزەڭىندە ەڭ كوپ نەسيە كولەمى ونەركاسىپ پەن قۇرىلىس سالاسىنىڭ قىزمەتكەرلەرىنە بەرىلدى. وسى سالالاردا ەڭبەك ەتىپ جۇرگەن 1 176 مامانى باسپانالى بولدى. نەسيە سانى بويىنشا ەكىنشى ورىندا – كولىك سالاسىنىڭ ماماندارى. وسى سالاداعى مامانداردىڭ 396 وكىلى تۇرعىن ۇيگە يە بولدى. ۇشتىكتى ەنەرگەتيكا سالاسى قورىتىندىلادى – سەكتوردىڭ 269 مامانى قولجەتىمدى نەسيە راسىمدەي الدى.
سونىمەن قاتار «ناۋرىز جۇمىسكەر» باعدارلاماسىنىڭ قولداۋىمەن اۋىل شارۋاشىلىعى, سۋ رەسۋرستارى جانە سۋارمالى جەرلەر سالاسىنىڭ قىزمەتكەرلەرى دە باسپانالى بولدى. باعدارلاما 1 143 كاسىپورىن مەن 8 230 جۇمىسشى ماماندىقتى قامتيدى. باعدارلاما قاتىسۋشىسى بولۋ ءۇشىن ارنايى كونكۋرسقا قاتىسۋ مىندەتتى ەمەس. جۇمىس بەرۋشىدەن قىزمەتكەردىڭ لاۋازىمى, ماماندىعى جانە كاسىپ ءتۇرىن كورسەتەتىن انىقتاما الىپ, ونى كەز كەلگەن «وتباسى بانك» بولىمشەسىنە وتىنىشپەن تاپسىرۋ جەتكىلىكتى. جۇمىسشى ماماندىقتارىنىڭ اتاۋلارىنىڭ ءتىزىمى, كاسىپكەرلىك قىزمەت تۇرلەرى جانە جۇمىس بەرۋشىدەن الىناتىن انىقتاما فورماسىمەن بانكتىڭ رەسمي سايتىندا تانىسۋعا بولادى.
«ناۋرىز جۇمىسكەر» باعدارلاماسىنا قاتىسۋشىلاردىڭ ورتاشا جاسى – 31 جاس. جۇمىسشى ماماندىق يەلەرى اراسىندا ايەلدەر دە از ەمەس. ويتكەنى الىنعان نەسيەلەردىڭ شامامەن 20%-ى نازىك جاندارعا تيەسىلى. سولاردىڭ ءبىرى – اقكۇمىس قۇدايبەرگەن. ول تەمىرجول سالاسىندا ينجەنەر-تەحنولوگ بولىپ قىزمەت اتقارادى. جاس مامان كوكشەتاۋدا اتا-اناسىمەن بىرگە تۇرىپتى. «ناۋرىز جۇمىسكەر» باعدارلاماسىنىڭ كومەگىمەن اقكۇمىس استانادان پاتەر ساتىپ العان.
«ستۋدەنت كەزىمدە مەن «وتباسى بانكىندە» دەپوزيت اشتىم. جۇمىسقا كىرىسكەننەن كەيىن ونى مۇمكىندىگىنشە تولىقتىرا بەردىم. وسى ارەكەتىم نەسيە الۋدا كوپ كومەكتەستى. ءوز باسپانامنىڭ بولۋى تۋرالى كوپتەن بەرى ارماندايتىنمىن. الدىمەن «ناۋرىز» باعدارلاماسىنا قاتىسۋدى ويلادىم, بىراق وندا كونكۋرس بار ەكەن جانە وتپەي قالۋ قاۋپى بولدى. بانكتە ماعان «ناۋرىز جۇمىسكەر» باعىتىندا نەسيە الۋعا كەڭەس بەردى. باعدارلاما شارتى دا سايكەس كەلىپ تۇردى. نەسيەگە بەرگەن ءوتىنىشىم ماقۇلدانعانىنا قۋانىشتىمىن. مىنە, استانادان ءوز پاتەرىمدى ساتىپ الدىم», دەيدى اقكۇمىس قۇدايبەرگەن.
«ناۋرىز جۇمىسكەر» باعىتى مەن «ناۋرىز» باعدارلاماسىنىڭ شارتتارى ءبىر. ايماقتار ءۇشىن نەسيەنىڭ ماكسيمالدى سوماسى – 30 ملن تەڭگە, ال استانا مەن الماتى ءۇشىن – 36 ملن تەڭگە. ۇلكەن قالالار مەن وبلىس ورتالىقتارىندا تەك جاڭا باسپانانى ساتىپ الۋعا بولادى. باعدارلاما قاتىسۋشىلارى وزدەرىنە قولايلى تۇرعىن ءۇي كەشەنىن جانە پاتەردى «باسپانا ماركەت» پورتالى (otbasybank.kz) ارقىلى تاڭداي الادى. قازىر وندا 10 262 پاتەر بار. 593 نىسان ۇسىنىلعان. ەكىنشى نارىقتاعى تۇرعىن ءۇيدى تەك مونوقالالاردا جانە اۋىلدىق ەلدى مەكەندەردە ساتىپ الۋعا بولادى. وسى ۋاقىتقا دەيىن 338 قاتىسۋشى ەكىنشى نارىقتان ءوز باسپاناسىن ساتىپ الدى.
«ناۋرىز جۇمىسكەر» باعدارلاماسىنىڭ شارتتارى
نەسيە مولشەرلەمەسى:
- الەۋمەتتىك وسال توپتاعى ازاماتتار ءۇشىن (تۇرعىن ءۇي كەزەگىندە تۇرعاندار) – جىلدىق 7% (جتسم 7,1%-دان 9,6%-عا دەيىن);
- بارلىق باسقا كاتەگوريالار ءۇشىن – جىلدىق 9% (جتسم 9,4%-دان 13%-عا دەيىن).
العاشقى جارنا – جاڭا, تازا ارلەۋدەگى پاتەردى دايىن ساتىپ العاندا كەمىندە 10%. جاڭا پاتەردى ارلەۋسىز كۇيىندە نەمەسە ەكىنشى نارىقتاعى تۇرعىن ءۇيدى (مونوقالالار مەن اۋىلدىق ەلدى مەكەندەردە) ساتىپ العاندا – كەمىندە 20%.
باعدارلاماعا قاتىسۋ تالاپتارى
«وتباسى بانكىندە» دەپوزيتى بولۋى كەرەك. دەپوزيتتىڭ مەرزىمى ماڭىزدى ەمەس, ونى ءوتىنىش بەرەر الدىندا اشۋعا بولادى.
«وتباسى بانكىندەگى» جيناق شوتىندا كەمىندە 2 ملن تەڭگە بولۋى كەرەك. بۇل سومانى باعدارلاماعا ءوتىنىش بەرگەنگە دەيىن ءبىرجولاتا سالۋعا بولادى.
ءوتىنىش بەرۋشى مەن ونىڭ وتباسى مۇشەلەرى سوڭعى 5 جىل ىشىندە تۇرعىن ۇيگە يە بولماۋى ءتيىس. وتباسى مۇشەلەرى – جۇبايلار جانە ولاردىڭ كامەلەتكە تولماعان بالالارى. ەگەر ادام نەكەدە بولماسا, تۇرعىن ءۇيدىڭ جوقتىعى تەك وزىندە تەكسەرىلەدى.
سوڭعى 6 ايدا رەسمي تابىسى بولۋى قاجەت. سونىمەن بىرگە, جۇمىس بەرۋشى بەرگەن انىقتامادا كەمىندە سوڭعى 3 ايدىڭ مىندەتتى زەينەتاقى جارنالارى كورسەتىلۋى كەرەك.
