فوتو: اشىق دەرەككوز
باس پروكۋراتۋرانىڭ دەرەگىنشە, وتكەن جىلى 53 320 كاسىپكەر تەكسەرۋدەن وتكەن. بۇل كورسەتكىش موراتوري ەنگىزىلگەنگە دەيىنگى 2019 جىلمەن سالىستىرعاندا 42,1%-عا تومەن.
2025 جىلى دا مۇنداي ءۇردىس ساقتالىپ وتىر. بيىلعى التى ايدىڭ ىشىندە تەكسەرۋلەردىڭ سانى تاعى 1,9%-عا قىسقارىپ, 46 375-كە جەتكەن. بۇل 2019 جىلدىڭ ءبىرىنشى جارتىسىنداعى دەڭگەيدەن 73,8%-عا از.
سونىمەن قاتار, بيزنەسكە قويىلاتىن 10 مىڭنان استام ارتىق تالاپتار جويىلدى. «1 in 2 out» قاعيداتى (قولدانىستاعى ەكى رەتتەۋ تەتىگىن الىپ تاستاپ, جاڭادان ءبىر تالاپ ەنگىزۋ) رەتتەۋ جۇكتەمەسىن ارتتىرماۋعا مۇمكىندىك بەردى. جىل سوڭىنا دەيىن رۇقسات الۋ راسىمدەرىن جەڭىلدەتۋ جانە بىلىكتىلىك تالاپتارىن قايتا قاراۋ جوسپارلانىپ وتىر.
سونداي-اق «eGov Business» ءموبيلدى قوسىمشاسى ىسكە قوسىلدى. وندا «مەنىڭ بيزنەسىم» جەكە كابينەتى بار, ونىڭ كومەگىمەن 30-دان استام مەملەكەتتىك قىزمەتكە وڭاي قول جەتكىزۋگە مۇمكىندىك جاسالعان. بۇل قىزمەتتەرگە كاسىپورىندى تىركەۋ, سالىق كۇنتىزبەسىن باقىلاۋ, سەرتيفيكات الۋ جانە تسيفرلىق قۇجاتتارعا قول قويۋ سياقتى فۋنكتسيالار كىرەدى.
2024 جىلى بيزنەستى قارجىلاي قولداۋ شارالارىنىڭ كولەمى دە ارتتى. جەڭىلدىكپەن قارجىلاندىرۋ شارالارىمەن جالپى سوماسى 1,3 ترلن تەڭگەدەن اساتىن 26 مىڭنان استام جوبا قامتىلعان.
2025 جىلى ميكرو جانە شاعىن كاسىپكەرلىككە ارنالعان جاڭا سۋبسيديالاۋ مەحانيزمى ەنگىزىلدى. سۋبسيديالاناتىن كرەديت سوماسى 200 ملن تەڭگەدەن اسپايدى, سىياقى مولشەرلەمەسى – 12,3%, كرەديت بەرۋ مەرزىمى – 3 جىلعا دەيىن. بۇعان قوسا, جاڭا «ورلەۋ» باعدارلاماسى ىسكە قوسىلدى. ول كاسىپكەرلەرگە 10 جىلعا دەيىنگى مەرزىمگە 12,6% مولشەرلەمەمەن 7 ملرد تەڭگەگە دەيىن نەسيە الۋعا مۇمكىندىك بەرەدى. قازىرگى ۋاقىتتا وسى باعدارلاما بويىنشا 392 ملرد تەڭگەگە 1 095 جوباسى قارجىلاندارىلدى.
سونىمەن قاتار «دامۋ» قورىنىڭ بازاسىندا ەكى كەپىلدىك بەرۋ قورى قۇرىلدى. 1-ءشى كەپىلدىك بەرۋ قورى شەڭبەرىندە قۇنى 281 ملرد تەڭگە بولاتىن 1 618 جوباعا قولداۋ كورسەتىلدى, ونىڭ ىشىندە كەپىلدىكتەر سوماسى 154,4 ملرد تەڭگەنى قۇرادى. 2-ءشى كەپىلدىك بەرۋ قورى بويىنشا قۇنى 7,1 ملرد تەڭگە بولاتىن 1 جوباعا قولداۋ كورسەتىلسە, ونىڭ ىشىندە كەپىلدىكتەر سوماسى 2,8 ملرد تەڭگەنى قۇرادى.
سونىمەن قاتار, 100-دەن استام قارجىلىق جانە قارجىلىق ەمەس قولداۋ ءتۇرىن بىرىكتىرگەن بىرىڭعاي وزەكتى ءتىزىلىم جاسالدى. ونىڭ ورىندالۋىنا مونيتورينگ جۇرگىزۋ ءۇشىن «Baqylauda» جۇيەسى ەنگىزىلىپ, بارلىق پروتسەستىڭ اشىقتىعى قامتاماسىز ەتىلدى.
