فوتو: parlam.kz
سەنات توراعاسىنىڭ ايتۋىنشا, پارلامەنتتىڭ وكىلەتتىگىن ارتتىرۋ – دەموكراتيالىق دامۋ جولىنداعى ماڭىزدى ءارى جاۋاپتى قادام. ماۋلەن اشىمباەۆ رەفورمالار جوسپارلى تۇردە, جان-جاقتى جانە ەگجەي-تەگجەيلى تالقىلاناتىنىن اتاپ ءوتتى.
«قازىر زاڭدار ەكى پالاتادا قارالادى: الدىمەن ماجىلىستە قارالادى جانە قابىلدانادى, ودان كەيىن سەناتتا ماقۇلدانادى. وسىلايشا, بىزدە زاڭ شىعارۋ پروتسەسى ەكى بولىكتەن تۇرادى. ءماجىلىس, اتاپ ايتقاندا, پرەمەر-ءمينيستردى تاعايىنداۋعا كەلىسىم بەرەدى, مينيسترلەردىڭ كانديداتۋرالارىن تالقىلايدى, ۇكىمەت مۇشەلەرىن قارايدى. سەناتتىڭ دا بەلگىلى ءبىر وكىلەتتىكتەرى بار. وسى فۋنكتسيالاردىڭ بارلىعىن بىرىكتىرۋ پارلامەنتتىڭ كۇشەيۋىنە ىقپال ەتەدى جانە وكىلدى ورگاندى جاڭا دەڭگەيگە كوتەرەتىن بولادى. بۇل الەمدىك تاجىريبە بويىنشا وتەتىن ۇدەرىس ءبىزدىڭ ەلىمىزدىڭ دەموكراتيا جولىنداعى سەنىمدى قادامى بولماق», دەدى م.اشىمباەۆ.
سونىمەن قاتار ماۋلەن اشىمباەۆ پرەزيدەنت بۇل ماسەلەنى اسىقپاي جانە جان-جاقتى قاراۋدى تاپسىرعانىن اتاپ ءوتتى.
«بارلىق شەشىمدەر اقىلعا قونىمدى, جۇيەلى تۇردە قابىلدانۋى ءتيىس. بۇل ۇلكەن قۇقىقتىق رەفورما. ونىڭ تۇپكى ماقساتى – جان-جاقتى ويلاستىرىلعان, پىسىقتالعان جالپى شەشىمگە كەلۋ. بۇل پارلامەنتتىڭ كۇشەيە تۇسكەنىن كورسەتەدى. ال وكىلدى ورگاننىڭ كۇشەيۋى حالىقتىڭ ءوز قۇقىقتارىن جۇزەگە اسىرۋ ءۇشىن كوبىرەك مۇمكىندىك الاتىنىن بىلدىرەدى. سوندىقتان بۇل رەفورمالار دەموكراتيالىق پروگرەستى دامىتۋعا جانە ەلىمىزدى نىعايتۋعا ءوز ۇلەسىن قوساتىنىنا سەنىمدىمىن», دەدى پالاتا توراعاسى ماۋلەن اشىمباەۆ.
