فوتو: inbusiness.kz
ەرلان اقكەنجەنوۆ ەلىمىزدىڭ ەنەرگەتيكالىق جۇيەسى ءتيىستى تالاپتارعا ساي جانە رەسەي مەن ورتالىق ازيا ەلدەرىنىڭ ەنەرگەتيكالىق جۇيەلەرىمەن ۇيلەسىمدى قالىپتا جۇمىس ىستەپ تۇرعانىن اتاپ ءوتتى.
قازىر قازاقستاندا 237 ەلەكتر ستانساسى جۇمىس ىستەپ تۇر. ونىڭ 79-ى ءداستۇرلى گەنەراتسيا كوزدەرى, قالعان 158-ءى جاڭارتىلاتىن ەنەرگيا كوزدەرىنەن تۇرادى.
«مينيسترلىك ەنەرگەتيكالىق قاۋىپسىزدىكتى نىعايتۋعا, ينفراقۇرىلىمدى جاڭعىرتۋعا, قۋاتتاردى كەڭەيتۋگە جانە تسيفرلىق شەشىمدەردى ەنگىزۋگە باعىتتالعان شارالاردى تۇراقتى نەگىزدە قابىلداپ كەلەدى», دەدى ەرلان اقكەنجەنوۆ.
مينيستر 26 گۆت-تان استام جاڭا قۋات كوزدەرىن قوسۋ قاراستىرىلىپ وتىرعان «ەنەرگەتيكا سالاسىن 2035 جىلعا دەيىنگى دامىتۋ جوسپارى» اياسىنداعى جۇمىستار قارقىندى تۇردە جالعاسىپ جاتقانىن ايتتى. جاڭا قۋات كوزدەرىن ىسكە قوسۋ قولدانىستاعى ستانسالاردى جاڭعىرتۋ جانە جاڭا قۋات ءوندىرۋ قوندىرعىلارىن سالۋ ارقىلى جۇزەگە اسىرىلادى.
ەنەرگەتيكا سالاسىن تسيفرلاندىرۋ ماسەلەسى دە نازارعا الىنعان. ەرلان اقكەنجەنوۆ قازىرگى ۋاقىتتا «وتىن-ەنەرگەتيكا كەشەنىن بىرىڭعاي مەملەكەتتىك باسقارۋ جۇيەسى» (EnergyTech) اتتى سالالىق پلاتفورمانى ىسكە قوسۋ جوسپارلانىپ وتىرعانىنا توقتالدى.
«EnergyTech پلاتفورماسى وتىن-ەنەرگەتيكا كەشەنىنىڭ بارلىق سالاسىن ءبىر پلاتفورما بازاسىنا بىرىكتىرەدى. ول ەنەرگەتيكا سەكتورى, كەن پايدالانۋ جانە قايتا وڭدەۋدەن باستاپ كومىر ونەركاسىبىنە دەيىنگى وەك-ءتىڭ 10 نەگىزگى باعىتى بويىنشا باسقارۋ پروتسەستەرىن كەشەندى ۇيلەستىرۋدى قامتاماسىز ەتەدى. جۇيەنى تولىق كولەمدە جاساپ شىعارىپ, ونەركاسىپتىك دەڭگەيدە قولدانىسقا ەنگىزۋ 2026–2027 جىلدارعا جوسپارلانىپ وتىر», دەدى ەرلان اقكەنجەنوۆ.
ەنەرگەتيكا ءمينيسترى بيىل 7 تسيفرلىق سەرۆيس پايدالانۋعا بەرىلىپ, ونىڭ ىشىندە 2 سەرۆيس ەنەرگەتيكا سەكتورىندا جۇزەگە اسىرىلعانىن اتاپ ءوتتى.
ولار: كۇزگى-قىسقى كەزەڭگە دايىندىق پەن ونىڭ ءوتۋ بارىسىن مونيتورينگتەۋگە ارنالعان تسيفرلىق سەرۆيس;
شەكتى ءتاريفتى بەكىتۋگە ارنالعان تسيفرلىق سەرۆيس.
