مەرەكەلىك جيىنعا «شەستوي پوست» فيلمىندە باستى ءرولدى سومداعان سانۋرجان سۇلەيمەنوۆ ارنايى شاقىرىلىپ, ەل قاۋىپسىزدىگىن قامتاماسىز ەتىپ جۇرگەن قۇقىقتىق ءتارتىپ اسكەرى وكىلدەرىنە قۇرمەتىن جەتكىزدى ءارى «شەستوي پوست» ءفيلمىنىڭ ءتۇسىرىلىمى كەزىندە اسكەري ءومىردىڭ جاۋاپكەرشىلىگى مەن ەرلىكتىڭ ءمانىن تەرەڭ تۇسىنگەنىن اتاپ ءوتتى.
«اسكەريلەردىڭ ەڭبەگى – كورىنبەي جاسالاتىن, بىراق ەلدىڭ تىنىشتىعى ءۇشىن شەشۋشى ءرول اتقاراتىن قىزمەت. سول ەڭبەكتى باعالاۋ – ءار ازاماتتىڭ بورىشى. ەل تىنىشتىعىن ساقتاپ جۇرگەن ءار ساربازعا العىسىمىز شەكسىز, – دەدى س. سۇلەيمەنوۆ.
سالتاناتتى شارا بارىسىندا قاتىسۋشىلاردى رەسپۋبليكا كۇنىمەن قۇتتىقتاعان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەەۆ, بۇل مەرەكە – ەل تاۋەلسىزدىگى مەن مەملەكەتتىلىكتىڭ قالىپتاسۋ جولىنداعى حالىقتىڭ بىرلىگى مەن ىنتىماعىن پاش ەتەتىن ماڭىزدى كۇن ەكەنىنە توقتالدى. "رەسپۋبليكا كۇنى – ەلىمىزدىڭ جاڭا داۋىرگە قادام باسقان تاريحي ءساتىن ايشىقتايتىن ەرەكشە مەرەكە, اسكەري قىزمەتشىلەردىڭ مىندەتى – وسى تاۋەلسىزدىكتىڭ, تىنىشتىق پەن تۇراقتىلىقتىڭ كەپىلى بولۋ",- دەدى گەنەرال-مايور.
مەرەكە اياسىندا قىزمەتتىك بورىشىن ادال اتقارىپ جۇرگەن اسكەري قىزمەتشىلەر مەن بىرقاتار كەش قوناقتارى ماراپاتتالدى. سونىڭ ىشىندە سانۋرجان سۇلەيمەنوۆكە قر ءىىم ورىنباسارى – ۇلتتىق ۇلان باس قولباسشىسىنىڭ بۇيرىعىمەن «قوعامدىق ءتارتىپتى ساقتاعانى ءۇشىن» ءتوس بەلگىسى تابىستالدى.
ءىس-شارا بارىسىندا رەسپۋبليكا كۇنىنە ارنالعان دەرەكتى فيلم كورسەتىلدى. فيلمدە ەل تاۋەلسىزدىگىنىڭ قالىپتاسۋى, مەملەكەتتىك رامىزدەردىڭ قابىلدانۋى جانە قازاق اسكەرىنىڭ دامۋ تاريحى باياندالدى.
