فەستيۆال زاماناۋي قۋىرشاق تەاترىنىڭ سان الۋان قىرىن كورسەتكەن, مادەنيەت پەن ونەردى توعىستىرعان ەرەكشە الاڭ بولدى. بيىلعى ونەر دۋمانىنا يتاليا, يسپانيا, يران, ءۇندىستان, رەسەي, بولگاريا, تۇركيا, ءازىربايجان, وزبەكستان, قىرعىزستان جانە قازاقستاننان كەلگەن ون بەس تەاتر ۇجىمى مەن ءجۇز ەلۋگە جۋىق كاسىبي قۋىرشاق شەبەرى قاتىسىپ, كورەرمەن قاۋىمدى ءتۇرلى ستيلدەگى قويىلىمدارىمەن ءتانتى ەتتى.
فەستيۆال بارىسىندا ۇزدىك قاتىسۋشىلارعا قارجىلاي جۇلدەلەر مەن ارنايى نوميناتسيالار تابىستالدى. بارلىق ۇجىمدارعا ديپلومدار مەن ەستەلىك سىيلىقتار ۇلەستىرىلىپ, ەڭبەكتەرى جوعارى باعالاندى.
قويىلىمدارمەن قاتار, قۋىرشاق تەاترىنىڭ تەورياسى مەن تاجىريبەسى توعىسقان شەبەرلىك ساباقتارى مەن دارىستەر ۇيىمداستىرىلدى. «قۋىرشاق تەاترىنىڭ ونەر تاريحىنداعى ورنى», «قۋىرشاق شەبەرلەرىنىڭ قول ەنەرگياسى», «XXI عاسىرداعى قۋىرشاق تەاترىنىڭ جاڭا كەڭىستىكتەرى» سەكىلدى وزەكتى تاقىرىپتاردى قامتىعان بۇل كەزدەسۋلەر حالىقارالىق ماماندار ءۇشىن كاسىبي ءوسۋ مەن ءوزارا تاجىريبە الماسۋدىڭ ءتيىمدى الاڭىنا اينالدى.
مەملەكەتتىك قۋىرشاق تەاترىنىڭ ديرەكتورى المات امانگەلدى قۋىرشاق تەاترىنىڭ جەمىسى جەتىستىگىنە توقتالدى:
«بەس كۇن بويى قۋىرشاق تەاترىنىڭ الەمى جاڭا بوياۋلارعا, جاڭا ەسىمدەرگە جانە جاڭا يدەيالارعا تولى بولدى. كورەرمەندەر مەن قاتىسۋشىلار ءتۇرلى ەلدىڭ مادەنيەتىن جاقىننان تانىپ, ءبىر ساحنادا توعىسقان شىعارماشىلىق قۋاتتى سەزىندى. بۇل فەستيۆالدىڭ شىنايى تابىسى – بارشا ارىپتەستەردىڭ ەڭبەگىنىڭ جەمىسى. كەلەشەكتە دە وسىنداي يگى باستامالار جالعاسىن تاۋىپ, قۋىرشاق تەاترىنىڭ ونەرى ورلەي بەرسىن», دەدى.
ايتا كەتۋ كەرەك, قازاقستان رەسپۋبليكاسىنىڭ مەملەكەتتىك قۋىرشاق تەاترى بيىل 90 جىلدىق مەرەيتويىن اتاپ ءوتتى. تەمىربەك جۇرگەنوۆتىڭ باستاماسىمەن 1935 جىلى قۇرىلعان بۇل تەاتر – ەلىمىزدەگى قۋىرشاق ونەرىنىڭ قارا شاڭىراعى سانالادى. توقسان جىلدىق تاريحىندا ول بىرنەشە بۋىن كورەرمەننىڭ جۇرەگىنەن ورىن الىپ, ۇلت مادەنيەتىنىڭ التىن قورىنا ەندى.
