فوتو: ۆيدەودان الىنعان كادر
وبلىستىق دەنساۋلىق ساقتاۋ باسقارماسىنىڭ مالىمەتىنشە, قازىرگى ۋاقىتتا حرومتاۋ اۋداندىق اۋرۋحاناسىندا التى ناۋقاس ەم قابىلداپ جاتىر. ولاردىڭ ءبىرى 2009 جىلى تۋعان بالا. جانساقتاۋ بولىمىندە ءتورت ادام, قالعان ەكەۋى جالپى پالاتادا جاتىر. بىرنەشە ناۋقاسقا وتا جاسالىپ, بارلىعى قاجەتتى مەديتسينالىق كومەكپەن جانە ءدارى-دارمەكپەن قامتاماسىز ەتىلگەن. بۇعان دەيىن اۋرۋحاناعا جەتكىزىلىپ, كەيىن ۇيىنە قايتقان ازامات تا قايتا ەمدەۋ ورنىنا جاتقىزىلعان.
وقيعا ورنىنا كەلگەن اقتوبە وبلىسىنىڭ اكىمى اسحات شاحاروۆ زارداپ شەككەندەر مەن قازا تاپقانداردىڭ تۋىستارىنا كوڭىل ايتىپ, بارلىق قاجەتتى كومەك كورسەتىلەتىنىن جەتكىزدى.
ء«بىز ءۇشىن وتە اۋىر قازا بولدى. تاڭعى ساعات 08:00–دەن وتە وسىنداي وقيعا بولعاننان كەيىن بارلىق ءتيىستى مەملەكەتتىك ورگاندار ءوز جۇمىسىن اتقارىپ كەلەدى. ءبىزدىڭ تاراپىمىزدان جان-جاقتى كومەك ۇيىمداستىرىلدى. بارلىق جاعداي ءوز باقىلاۋىمدا بولادى», دەدى اسحات شاحاروۆ.
ال ايتەكە بي اۋدانىنىڭ اكىمى داۋلەتيار توعىزباەۆتىڭ ايتۋىنشا, اپاتقا ۇشىراعان گازەل اقتوبە قالاسى مەن ايتەكە بي اۋدانى اراسىندا جولاۋشى تاسىمالداۋمەن اينالىسقان. تاسىمالداۋ قىزمەتى ماۋسىم ايىنان بەرى رەسمي تۇردە, جەكە كاسىپكەر ارقىلى جۇزەگە اسىرىلىپ كەلگەن.
«تاڭعى 7:00–دە ادەتتەگىدەي اۋىلدان شىققان. سالوندا قالاعا جەكە شارۋالارمەن بارا جاتقان ازاماتتار بولدى. گازەل 16 ورىندىق ءارى جاڭا», دەدى داۋلەتيار توعىزباەۆ.
قايتىس بولعان ءار جولاۋشىنىڭ وتباسىنا جەرگىلىكتى بيلىك 1 ميلليون تەڭگەدەن قارجىلاي كومەك بولەدى.
ايتا كەتەيىك, اپاتتان كەيىن سامارا — شىمكەنت تاسجولىنىڭ ءبىر بولىگى ۋاقىتشا جابىلدى. وقيعانىڭ ءمان-جايىن انىقتاۋ ءۇشىن ءىىم ارنايى تەرگەۋ توبى جانە ۇكىمەتتىك كوميسسيا قۇرىلدى. كوميسسيا پرەمەر-مينيستر ولجاس بەكتەنوۆتىڭ تاپسىرماسىمەن اپاتتىڭ سەبەپتەرىن جان-جاقتى زەرتتەۋگە كىرىستى.
