قازاننىڭ 23-ءى كۇنى تاڭەرتەڭ ءبورلى اۋدانىنىڭ ورتالىعى اقساي قالاسىنىڭ ىرگەسىندە تۇرعان قىزىلتال اۋىلى ماڭىندا اسپاننان بەلگىسىز نارسە قۇلاعانى جونىندە فوتو-بەينە اقپاراتتار تارادى.
«اقسايدا قىزىلتالعا درون ءتۇسىپ, جارىلىس بولدى, تولقىنىمەن ۇيلەردى كىشكەنە شايقادى» دەيدى بەلگىسىز ادام. بەينەجازبادا بىرنەشە كولىك, اسكەري كيىمدى ادامدار كورىنەدى. وسى بەينەجازبامەن بىرگە تارالعان فوتوسۋرەتتەردە دروننىڭ قاناتى مەن موتورىنا ۇقساس كۇيگەن بولشەكتەر بەينەلەنگەن.
«باتىس قازاقستان وبلىسىنىڭ پوليتسيا دەپارتامەنتى ارنايى قىزمەت وكىلدەرىمەن بىرگە ءبورلى اۋدانىندا ۇشقىشسىز ۇشۋ اپپاراتىنىڭ بولشەكتەرىنە ۇقساس زاتتاردىڭ تابىلۋىنا وراي تەكسەرۋ ءىس-شاراسىن جۇرگىزىپ جاتىر. ول نىسان ەلدى مەكەننەن تىس اۋماقتى تابىلعان. وقيعانىڭ ءمان-جايى انىقتالىپ جاتىر» دەپ حابارلادى وبلىستىق پوليتسيا دەپارتامەنتىنىڭ رەسمي وكىلى نۇرجان قۋانعالي.
ايتا كەتەيىك, ءبورلى اۋدانىندا الەمدەگى ەڭ ءىرى گاز كەنىشتەرىنىڭ ءبىرى – قاراشىعاناق كەن ورنى ورنالاسقان. قاراشىعاناقتان الىنعان شيكىزات رەسەيدىڭ ورىنبور وبلىسىنداعى گاز وڭدەۋ كەشەنىندە وڭدەلەدى. 19 قازان كۇنى ورىنبور گوك-ندە جارىلىس بولعان ەدى.
باتىس قازاقستان وبلىسى
