قازاق جانە ورىس تىلىندە جارىق كورگەن وقۋلىقتىڭ باستى ەرەكشەلىگى – بۇگىنگى اتا-انالاردى مازالايتىن ەڭ ماڭىزدى سۇراقتارعا جاۋاپ تابا الاسىز . اتاپ ايتار بولساق:
– مەكتەپتى قالاي تاڭداعان ءجون؟
– تەك «بەستىك» باعاعا ۇمتىلعان دۇرىس پا؟
– تسيفرلى داۋىردە وقۋشىنى قالاي ىنتالاندىرامىز؟
– مۇعالىممەن كيكىلجىڭ تۋسا نە ىستەۋ كەرەك؟
– بالانى قاجىتىپ الماس ءۇشىن قايتكەن ءجون؟
– اتا مەن اجە نەلىكتەن ءبىلىم مەن مەيىرىمنىڭ قاينار كوزى سانالادى؟ – اتتى تاقىرىپتاردى قامتىعان.
«بۇل تۋىندى بۇگىنگى تاربيە مەن ءبىلىمنىڭ ەڭ وزەكتى ماسەلەسىن قوزعايدى. بالانى وقۋدا قالاي قولداۋ كەرەكتىگىن, ونىڭ مىندەتتەرى مەن دەمالىسىنىڭ اراسىنداعى تەڭگەرىم قانداي بولۋ تيىستىگىن, وزىنە سەنىمدىلىكتى قالاي ءسىڭىرۋ قاجەتتىگىن قاراپايىم تىلمەن ءارى ناقتى مىسالدارمەن تۇسىندىرەدى. سونىمەن قاتار بالانى قايتكەن كۇندە دە وزات قىلىپ تاربيەلەۋ تۋرالى ەمەس, ومىردەن ءوز ورنىن تابا الاتىن, جاۋاپكەرشىلىكتى تۇسىنەتىن, باقىتتى, تابىستى ادام تاربيەلەۋ حاقىندا جازىلعان. بالانى شىن مانىندە ۇزدىك قىلاتىن نارسە – وسى», دەيدى كىتاپ اۆتورى.
