فوتو: ەرلان ومار
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ولاردىڭ ىشىندە ۇلى وتان سوعىسىنىڭ 86 ارداگەرى, جەڭىلدىكتەر بويىنشا ۇوس ارداگەرلەرىنە تەڭەستىرىلگەن – 16 556 ادام, وزگە مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى – 26 587 ادام جانە ۇوس جىلدارىندا تىلدا ەڭبەك ەتكەن – 36 084 ازامات بار. 2025 جىلى وسى ساناتتاعى تۇلعالارعا 12,6 ملرد تەڭگە كولەمىندە ارناۋلى مەملەكەتتىك جاردەماقى تولەندى.
ەستەرىڭىزگە سالا كەتەيىك, رەسپۋبليكالىق بيۋدجەت ەسەبىنەن تولەنەتىن اي سايىنعى ارناۋلى مەملەكەتتىك جاردەماقى ارداگەرلەردىڭ بارلىق ساناتىنا, وزگە الەۋمەتتىك تولەمدەرىنە قاراماستان, بەلگىلەنگەن مولشەردە بەرىلەدى.
2025 جىلى تولەمدەردىڭ كولەمى تومەندەگىدەي بەكىتىلدى:
-
1. ۇوس ارداگەرلەرى – 16 اەك (2025 جىلى – 62 912 تەڭگە);
2. جەڭىلدىكتەرى بويىنشا ۇوس ارداگەرلەرىنە تەڭەستىرىلگەن ارداگەرلەر, ولاردىڭ ىشىندە:
- ۇوس كەزەڭىندە جاراقات الۋى, كونتۋزيا الۋى, مەرتىگۋى نەمەسە اۋرۋ سالدارىنان مۇگەدەكتىگى بار ادامدارعا جەڭىلدىكتەر بويىنشا تەڭەستىرىلگەن ادامدار – 7,55 اەك (2025 جىلى – 29 687 تەڭگە);
- جەڭىلدىكتەر بويىنشا ۇوس قاتىسۋشىلارىنا تەڭەستىرىلگەن تۇلعالار – 6,19 اەك (2025 جىلى – 24 339 تەڭگە);
3. باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى, ونىڭ ىشىندە:
- اۋعانستانداعى ۇرىس قيمىلدارىنا قاتىسۋشىلار – 6,19 اەك (2025 جىلى – 24 339 تەڭگە);
- تاجىك-اۋعان ۋچاسكەسىندە تمد شەكاراسىن قورعاۋدى كۇشەيتۋ جونىندەگى مىندەتتەردى ورىنداعان, يراكتاعى حالىقارالىق بىتىمگەرشىلىك وپەراتسياعا, تاۋلى قاراباقتاعى ەتنوسارالىق قاقتىعىستى رەتتەۋگە قاتىسقان اسكەري قىزمەتشىلەر – 4,8 اەك (2025 جىلى – 18 874 تەڭگە);
4. ۇوس جىلدارىنداعى تىل ەڭبەككەرلەرى – 2,13 اەك (2025 جىلى – 8 376 تەڭگە).
