ەل بولاشاعىن ايقىندايتىن كۇن

ورال قالاسىنداعى كوپ ەتنوستى «ومەگا» پريبور قۇراستىرۋ زاۋىتىنىڭ ۇيىمشىل ۇجىمى جاسامپاز ەڭبەككە ءبىر كىسىدەي جۇمىلعان. كەشە وسىندا الدا وتەتىن پرەزيدەنتتىك سايلاۋعا قولداۋ كورسەتۋ جونىندەگى ەڭبەك ۇجىمىنىڭ جيىنى وتكىزىلدى. ونى اشقان كاسىپورىننىڭ باس ديرەكتورى ەربولات ابدولوۆ جۇمىسشىلار مەن ينجەنەر-تەحنيك قىزمەتكەرلەردى 26 ساۋىردە وتەتىن پرەزيدەنت سايلاۋى كۇنى داۋىس بەرۋگە بەلسەنە قاتىسۋعا شاقىردى. پرەزيدەنت سايلاۋىندا ءاربىر قازاقستاندىقتىڭ ءوز جۇرەك قالاۋلارىن ءبىلدىرۋىنىڭ ماڭىزى زور. ويتكەنى, بۇل كۇن ەل بولاشاعىن, ونىڭ الەۋمەتتىك-ەكونوميكالىق تۇرعىدان ىرعاقتى تۇردە دامۋىن ايقىنداي الادى. ياعني, ون سەگىزگە تولعان ءار جاسوسپىرىمنەن باستاپ داۋىس بەرۋگە قۇقىلى بارلىق ازاماتتار تىزىمدە كورسەتىلگەن پرەزيدەنتتىككە كانديدات­تاردىڭ بىرىنە داۋىستارىن بەرۋ ارقىلى ءوز مەملەكەتىنىڭ كەمەل كەلەشەگىنە ايقىن كوز تاستاي الاتىن بولادى, دەدى ول ودان ءارى. ال «ومەگا» زاۋىتىندا تابانى كۇرەكتەي جيىرما بەس جىل ەڭبەك ەتىپ قۇرمەتتى ەڭبەك دەمالىسىنا شىققان مايتالمەن ارداگەر پاۆەل لارشين سايلاۋعا قاتىسۋ – وتانشىلدىق پەن ءپاتريوتيزمنىڭ كورىنىس بەرۋى عانا ەمەس, سونىمەن بىرگە ءاربىر قازاقستاندىقتىڭ ازاماتتىق پارىزى. بۇدان دا گورى تۇسىنىكتى تىلمەن ايتقاندا, بۇگىنگى وسكەلەڭ ۇرپاقتىڭ بولاشاعى قانداي بولاتىندىعى جونىندەگى قازىرگى قازاقستاندىق قوعام مۇشەلەرىنىڭ جاۋاپكەرشىلىگى دەگەن ءتۇيىن جاسادى. ەلەكترمەن دانەكەرلەۋشى اسلان ايماعانبەتوۆتىڭ ايتۋىنشا, الدىمىزدا تۇرعان پرەزيدەنت سايلاۋى ەلىمىزگە تۇبەگەيلى وزگەرىستەر اكەلۋى ءتيىس. ول 26 ساۋىردە سايلاۋ ۋچاسكەلەرىنە ءبىر كىسى­دەي كەلىپ, ءوزى لايىقتى دەپ ساناعان كاندي­داتقا داۋىس بەرىپ ءۇن قوسۋدىڭ قاجەت­تىلىگىن وسى تۇستان تابا الاتىنىن جەتكىزدى. جيىن سوڭىندا زاۋىت قىزمەتكەرلەرى بارشا قازاقستاندىقتاردى الداعى 26 ساۋىردە وتكىزىلەتىن قازاقستان رەسپۋبليكاسى پرەزيدەنتىن سايلاۋدا, داۋىس بەرۋگە شاقىراتىندىقتارى جونىندە ءتيىستى قارار قابىلدادى. تەمىر قۇسايىن, «ەگەمەن قازاقستان». ورال.