پرەزيدەنت تاپسىرماسىنان كەيىن ۇكىمەت اۋقىمدى رەفورمالاردى ىسكە قوستى, ونىڭ ىشىندە شاعىن جانە ورتا بيزنەسكە قاتىستى دا ناقتى قادامدار بار. وسى ورايدا ماكسيم بارىشەۆ, ايتۋار قوشمامبەتوۆ, ساكەن قارين, ۆەرونيكا داۋگاليەۆا, جانار سۇلەيمەنوۆا, تيمۋر جاركەنوۆ, باسقا دا ازاماتتارعا العىس ايتۋىمىز كەرەك. ۇزاق تا تاۋەكەلگە تولى جۇمىس, كەلىسسوزدەر وڭ ناتيجەسىن بەردى. سونىمەن شوب ءۇشىن نە وزگەرەدى؟ ءبىرىنشى كەزەكتە, سالىق جۇكتەمەسى جەڭىلدەتىلدى. «جەڭىلدەتىلگەن سالىق رەجىمىنەن» الىنىپ تاستالعانداردىڭ ىشىندە ەندى تەك 44 قىزمەت ءتۇرى عانا قالادى. قالعاندارىنىڭ ءبارى قايتادان جەڭىلدەتىلگەن جۇيە بويىنشا جۇمىس ىستەي الادى.
2026 جىلدىڭ 1 قاڭتارىنان باستاپ بيزنەس ءبارىن نولدەن باستايدى:
- تەكسەرۋلەر مەن كامەرالىق باقىلاۋلار جويىلادى;
- ەگەر 1 ساۋىرگە دەيىن نەگىزگى قارىزدى تولەپ ۇلگەرسە, ايىپپۇل مەن ءوسىمپۇل ەسەپتەلمەيدى;
- ققس بويىنشا اكىمشىلىك جاۋاپكەرشىلىك قاراستىرىلمايدى;
- ەسەپتەن الىپ تاستاۋ تەكسەرۋسىز جانە كۇردەلى پروتسەدۋرالارسىز جۇرگىزىلەدى.
جاقىن كۇندەرى «بايتەرەك» حولدينگى جاڭا باعدارلامانى تانىستىرماق – اۆتوموبيل ليزينگى جانە مەملەكەتتىك باعدارلامالار ارقىلى شوب-قا كومەك. «رەفورمالاردىڭ باستى ماقساتى – ءاربىر وتانداسىمىزدىڭ ءال-اۋقاتىن ارتتىرۋ. بۇل – ءبىزدىڭ نەگىزگى ۇستانىمىمىز» دەدى ۇكىمەت باسشىسى. شوب ءۇشىن بۇل – مۇمكىندىكتەر تەرەزەسى. وسى ارالىقتا ستراتەگيانى جاڭارتىپ, باعداردى انىقتاپ, ورنىقتىلىقتى كۇشەيتۋگە ءتيىس.
بيزنەسپەن «سەزىمگە سۇيەنىپ» اينالىسۋعا بولمايدى. بيزنەستى تسيفر ارقىلى باسقارىپ, ۇدەرىستەردى جۇيەلەپ, كومپانيا برەندىن دۇرىس قالىپتاستىرىپ, وپەراتسيالىق ماسەلەلەردى جولعا قويىپ, كورشىلەر مەن باسەكەلەستەردىڭ ەكسپانسياسىن ەسكەرۋ كەرەك. باسەكە كۇن سايىن ءوسىپ كەلە جاتىر جانە بىزگە قيىندىق تۋدىرادى. بىراق بۇل ءبىر جاعىنان جاقسىلىقتىڭ نىشانى – باسەكە كۇشتى بولعان سايىن بيزنەس مىقتى بولا تۇسەدى.
بيزنەس دەگەنىمىز – تسيفرلار, جۇيەلىلىك جانە ستراتەگيا. كۇن سايىن دەرەكتەرمەن, تالداۋلارمەن جانە جوسپارلاۋمەن جۇمىس ىستەۋ قاجەت. ەڭ باستىسى, وقۋعا, بەيىمدەلۋگە جانە ارەكەت ەتۋگە دايىن بولۋ شارت. بەرىلگەن ۋاقىتتى ءتيىمدى پايدالانىڭىز: قارجىلىق جوسپارلاۋدى ەنگىزىپ, ۇدەرىستەردى اۆتوماتتاندىرىپ, ەسەپ پەن باقىلاۋ جۇيەسىن قۇرىڭىز, برەند قالىپتاستىرىپ, كومپانياڭىزدى باسەكەگە قابىلەتتى ەتىڭىز. ءدال قازىرگى شوب-قا بەرىلگەن مۇمكىندىك – اسا باعالى سىيمەن تەڭ. «تازا پاراق» – بيزنەستى نىعايتىپ, جاڭا دەڭگەيگە شىعارۋدىڭ تاماشا مۇمكىندىگى. وسىنى ءساتتى پايدالانعان كاسىپكەر ەرتەڭ كوشباسشى اتانادى. پالەندەي ەشتەڭە بولا قويماس دەپ ۇمىتتەنگەن ادام ارتتا قالادى.
بىزگە كۇش جيناۋعا, كاسىبىمىزدى رەتكە كەلتىرۋگە, ءبىلىم الۋعا, ءتيىمدى شەشىمدەر مەن ناقتى ارەكەتتەردى ەنگىزۋگە ۋاقىت بەرىلدى. كاسىپكەردىڭ ەڭ از دەگەندە ىستەيتىن ءىسى – دامۋعا كوڭىل ءبولۋى كەرەك. كۇن سايىن ارىپتەستەرمەن سويلەسىپ, قابىلەتتى, ەڭبەكقور ادامداردىڭ ءبىلىمنىڭ جوقتىعىنان ەسەسىن جىبەرىپ جاتقانىن كورىپ, جانىم اۋىرادى. باستى پروبلەمامىز – بيزنەستى ساۋاتتى جۇرگىزە المايمىز. بۇل – شىندىق. قازىر ءاربىر قاتەلىكتىڭ قۇنى كۇننەن-كۇنگە قىمباتتاپ بارادى. سوندىقتان جۇيەلى ارەكەت ەتۋ وتە ماڭىزدى.
