سۋرەتتى تۇسىرگەن – يگور بۋرگاندينوۆ
باسقوسۋدا «قازپوشتا» اق «بالالارعا سىي جاسا: گازەت-جۋرنالدارعا جازىل» الەۋمەتتىك جوباسىن ىسكە قوستى. جوبا قيىن ومىرلىك جاعدايعا تاپ بولعان بالالاردى تانىمدىق جانە ويىن-ساۋىق باسىلىمدارىمەن قامتاماسىز ەتۋگە باعىتتالعان. ياعني اكتسيانىڭ ءاربىر قاتىسۋشىسى 3 مىڭنان استام باسپا باسىلىمدارىنا: قوعامدىق-ساياسي جانە عىلىمي-كوپشىلىك باسىلىمداردان باستاپ بالالار مەن ويىن-ساۋىق باسىلىمدارىنا دەيىن جازىلۋدى راسىمدەپ, ولاردى قامقورلىق پەن مەيىرىمگە مۇقتاج بالالارعا بەرە الادى.
– بەلگىلى قالامگەرلەر مەن جۋرناليستەردىڭ قولىنان شىققان باسپا باسىلىمدارى قاشاندا ءبىلىم مەن اقپاراتتىڭ تاپتىرماس قاينار كوزى بولعان. جازىلۋشى كۇنى – جۋرناليستەردىڭ ەڭبەگى مەن ولاردىڭ ومىرلىك ۇستانىمىن قۇرمەتتەيتىن دوستار مەن پىكىرلەستەردىڭ كەزدەسۋى. قازپوشتا ءۇشىن مەرزىمدى ءباسپاسوزدى تاراتۋ – ماڭىزدى الەۋمەتتىك ميسسيا. ۇلكەن قالا بولسىن, شالعاي اۋىل بولسىن – بىزگە ءاربىر جازىلۋشى قىمبات. پوشتاشىلار جىل سايىن گازەت-جۋرنالداردىڭ جاڭا باسىلىمدارىن جەتكىزۋ ءۇشىن مىڭداعان شاقىرىم جول جۇرەدى, ال سۇرىپتاۋشىلاردىڭ قولىنان كۇن سايىن ون مىڭداعان دانا وتەدى. ءار ۇيگە, ءار جازىلۋشىعا پوشتاشىلارىمىز ارقىلى جىلى ءسوز بەن ءىلتيپات جەتىپ جاتقانىن ماقتان تۇتامىز, – دەدى «قازپوشتا» اق پوشتا سەرۆيسى جانە مەملەكەتتىك قىزمەتتەر جونىندەگى باسقارۋشى ديرەكتورى باعلان ورازباي.
سونداي-اق ول «قازپوشتا» اق-نىڭ رەسپۋبليكالىق جانە وڭىرلىك باسىلىمدارمەن بەرىك ارىپتەستىك قارىم-قاتىناس ورناتقانىن ايتتى. وسى ورايدا ءىس-شاراعا قاتىسقان «قازاق گازەتتەرى» جشس باس ديرەكتوردىڭ ءبىرىنشى ورىنباسارى ۆيكتور پريانيكوۆ پەن «Egemen Qazaqstan» گازەتى باس رەداكتورىنىڭ ورىنباسارى ورىنبەك وتەمۇرات مەرەكەلىك ىزگى تىلەكتەرىن جەتكىزىپ, ىنتىماقتاستىقتى نىعايتا بەرۋگە نيەتتى ەكەندەرىن ايتتى.
جيىندا شەبەرلىك ساباقتارى, مەرزىمدى باسىلىمدار جارمەڭكەسى جانە بۇكىل وتباسى ءۇشىن تاقىرىپتىق ءىس-شارالار دا ۇيىمداستىرىلدى. العاشقى جازىلۋشىلار ەكسكليۋزيۆتى سىيلىقتار مەن ەستەلىك كادەسىيلار الىپ, كوپشىلىكتى كىتاپ وقۋعا دەگەن سۇيىسپەنشىلىك توڭىرەگىنە بىرىكتىرگەن يگى باستامانىڭ ءبىر بولىگىنە اينالدى.
ايتا كەتەيىك ۇلتتىق پوشتا وپەراتورى بۇگىندە 6 161 ەلدى مەكەندى قامتيتىن 2 مىڭعا جۋىق بولىمشەلەرى بار ەلىمىزدەگى ەڭ كەڭ تارماقتالعان فيليالدار جەلىسىنە يەلىك ەتەدى.
