فوتو: istockphoto.com
11 ماۋسىم مەن 19 شىلدە ارالىعىندا ءتۋرنيردى وتكىزەتىن اقش, كانادا جانە مەكسيكاداعى ساتىپ الۋشىلار ەڭ كوپ سۇرانىسقا يە بولعان. بيلەتتەردى 212 ءتۇرلى ەلدەر مەن اۋماقتاردىڭ تۇرعىندارى ساتىپ العان.
سۇرانىس كولەمى بويىنشا العاشقى وندىققا انگليا, گەرمانيا, برازيليا, يسپانيا, كولۋمبيا, ارگەنتينا جانە فرانتسيا ەلدەرى كىردى. بۇل مەملەكەتتەردىڭ فۋتبول جانكۇيەرلەرى بيلەتتەردى ەڭ كوپ ساتىپ العانداردىڭ قاتارىندا.
فيفا بيلەتتەردى قايتا ساتۋ پلاتفورماسىنىڭ ىسكە قوسىلعانىن مالىمدەدى. قازىرگى تاڭدا نيۋ-دجەرسي شتاتىنىڭ شىعىس رۋتەرفورد قالاسىندا وتەتىن فينالدىق ماتچقا ارنالعان بيلەتتەردىڭ باعاسى 9 538 دوللاردان 57 500 دوللارعا دەيىن جەتەدى.
سونىمەن قاتار, ەڭ تومەنگى باعاداعى 60 دوللارلىق بيلەتتەر شامامەن 40 ءتۇرلى ماتچقا قولجەتىمدى بولعان. الايدا ءتۋرنيردىڭ باستى ويىندارىنا سۇرانىس جوعارى بولعاندىقتان, باعالار ايتارلىقتاي قىمباتتاپ وتىر.
مىسالى, كاليفورنيانىڭ ينگلۆۋد قالاسىندا وتكەن اقش قۇراماسىنىڭ اشىلۋ ويىنىنا بيلەت قۇنى 560 دوللاردان 2 735 دوللارعا دەيىن وزگەرىپ تۇر. ءتىپتى 12 ماۋسىمداعى اشىلۋ ماتچىنا ارنالعان ءبىر بيلەت قايتا ساتۋ سايتىندا 61 642 دوللارعا باعالانعان.
بۇل جولى الەم چەمپيوناتىندا ديناميكالىق باعا جۇيەسى العاش رەت قولدانىلادى, ياعني بيلەت قۇنى سۇرانىسقا قاراي ۇزدىكسىز وزگەرىپ وتىرادى.
ايتا كەتەيىك, قازاقستان قۇراماسى 2026 جىلعى الەم چەمپيوناتىنا قاتىسپايدى. دەگەنمەن ۇلتتىق قۇرامانىڭ FIFA رەيتينگىندەگى كورسەتكىشى سوڭعى ايلاردا ءبىرشاما جوعارىلاعان.
