اۆتوبۋس كولىك قۇرالى عانا ەمەس, ادامدار اراسىنداعى قارىم-قاتىناس, ىشكى مادەنيەت, الەۋمەتتىك تەڭدىك كورىنىس بەرەتىن ورتا. مىنە, وسى تۇرعىدا قوعامدىق كولىكتەگى قالىپتاسقان جاعدايدى بۇگىنگى الەۋمەتتىك-ساياسي ءومىرىمىزدىڭ ناقتى ءبىر كورىنىسى دەپ باتىل سەنىممەن ايتۋعا بولادى. قالىڭ كوپشىلىك قاشاندا كوڭىلسىز, الدەنەگە قاناعاتتانباي, الدەنەگە ىزالى كەيىپتە جۇرەدى. بولماشى نارسەگە بولا شارتپا-شۇرت ۇرسىسا كەتۋگە دايىن تۇرادى. اڭداماي سويلەيمىن دەپ, ايەلدەر تۇرماق, بالاڭىزداي جاستاردان اكە-شەشەڭىزدەن ەستىمەگەن ءسوزدى ەستىپ قالۋىڭىز ابدەن مۇمكىن. كيىم, تۇرقى جىپ-جيناقى ايەل, كەلىنشەكتەر سۋىرىلىپ الا جونەلگەندە كىرەرگە جەر تاپپاي قالاسىز. قوعامداعى الەۋمەتتىك تەڭسىزدىككە, قوردالانعان ماسەلەگە دەگەن ءوشى-كەگىن ءبىر سەنەن العىسى كەلگەندەي, بار بالە-باتەردى باسىڭا اقتارا سالۋدان تايىنبايدى.
اۆتوبۋستارداعى اسا ءبىر ىڭعايسىز, ءتىپتى اقىلعا سىيمايتىن كورىنىس – بۇگىندە كوپشىلىك جاستار ۇلكەنگە ورىن بەرۋ دەگەندى مۇلدە سانادان شىعارعان. اق جاۋلىقتى انالار, اق ساقالدى اتالاردى بىلاي قويعاندا, تاياققا سۇيەنىپ تۇرعان مۇگەدەكتەرگە دە ورىن بوساتپاي, بەدىرەيىپ وتىرا بەرەدى. ءبىردى-ەكىلى ەسكەرتۋ جاساپ كورىپ ەدىك, ء«بىز دە شارشاپ كەلە جاتىرمىز» دەپ قايىرىپ تاستادى. قاشانعى شىداي بەرەمىز, ءبىر-ەكى رەت اشۋ ۇستىندە بالالارىن سونشالىقتى مادەنيەتسىز, ءتارتىپسىز ءوسىرىپ جاتقان اتا-انالارىنا سالەم ايتقان بولدىق. وندا دا ءوز بالاڭىزدى جوندەپ الىڭىز دەگەن جاۋاپ الدىق. جالپى, جاستاردىڭ كەيبىر كورگەنسىز, ادەپسىز مىنەز-قىلىقتارىنا جاعاڭدى ۇستاۋ از, ءتىلىڭدى جۇتىپ قويۋعا بولادى.
كوپتى كورگەن ۇلكەندەردىڭ دە جەتىسىپ تۇرعانى شامالى. بارشاعا باسالقى بولادى, جونگە شاقىرادى دەرلىك جاسى كەلگەن ازاماتتاردىڭ ەكى اۋىز سوزگە كەلمەي داۋ كوتەرىپ, ءتىپتى بەيادەپ سوزدەردى وڭدى-سولدى ايتا سالعانىنىڭ تالاي مارتە كۋاسى بولدىق. ونداي ادامدار ءتىپتى جانجالداسا, جاعالاسا كەتۋگە دە بار.
قوعامدىق كولىكتە بايقالاتىن تاعى ءبىر كەلەڭسىز جاعداي – مادەنيەتتىڭ تومەندىگى: ءبىر-بىرىمەن داۋىستاپ سويلەسۋ, تەلەفونمەن قاتتى اڭگىمەلەسۋ, ورىنسىز مۋزىكا تىڭداۋ, كولىكتى لاستاۋ سەكىلدى ارەكەتتەر. ءيىن تىرەسىپ, سىعىلىسىپ تۇرعانىنا قاراماي, ۇلكەن-كىشىنىڭ ءبارى سمارتفوننان باس الماي, ىشىنە كىرىپ كەتەردەي بولىپ تۇراتىنى قالىپتى كورىنىسكە اينالعان. وسىنىڭ بارلىعى جيىلىپ كەلىپ, جولاۋشىلارعا قولايسىزدىق تۋدىرادى, قوعامداعى ورتاق تارتىپكە دەگەن نەمقۇرايدىلىقتى تانىتادى. سونىڭ سالدارىنان قازىردە اۆتوبۋسقا مىنە قالساق, قاي جەردەن شۋ شىعىپ كەتەر ەكەن دەپ, قىلپىلداپ تۇراتىن بولدىق.
قوعامدىق كولىكتە كوڭىل تولقىتار, جۇرەك ەلجىرەتەر كورىنىستەر دە كەزدەسەدى. بىردە اۆتوبۋسقا مىنە قالىپ ەدىم, قارسى الدىمداعى ورىندىقتا شاماسى 1-2-سىنىپ وقيتىن قىز بالا وتىر ەكەن. سۇيكىمدى-اق. بايقاماپپىن, قالتارىستا قارىنداسىنان شامامەن 4-5 جاس ۇلكەندىگى بار اعاسى تۇر ەكەن. جەتىپ كەلدى دە, مەنىڭ وتىرا بەرسىن دەگەنىمە قاراماي, «تۇر, اعاعا ورىن بەر!» دەپ, الگى بالدىرعاندى سومكەسىن ءوز موينىنا اسىپ, قولىنان جەتەكتەپ, تۇرعىزىپ الدى. ول دا جىلى ورنىنان قوزعاعانىما رەنجي قويعان جوق, اعاسىنا سۇيەنىپ, سمارتفونىن شۇقىلاپ تۇرا بەردى. نەگە ەكەنىن, بىرەر ايالدامادان سوڭ ءتۇسىپ, قول ۇستاسىپ كەتىپ بارا جاتقان ەلىكتەي ەكى بالانىڭ بەينەسى ءالى كۇنگە ەسىمنەن كەتپەي ءجۇر. مىنا قىرىق قۇبىلعان زاماندا بالالارىن ۋىزىنان جارىتىپ, ءتالىمدى تاربيە بەرىپ وتىرعان اتا-اناسىنا رازى بولاسىڭ. تازا قالىپتا, الاڭسىز ءوسىپ كەلە جاتقان قوس ق ۇلىنشاقتىڭ بولاشاعى نۇرلى, جارقىن بولسىن دەپ تىلەپ وتىرامىن ىشتەي.
ءيا, اۆتوبۋس – ادامداردىڭ تەك مەجەلى جەرگە جەتەتىن قۇرالى عانا ەمەس, سونىمەن قاتار ءبىر-بىرىنە جاۋاپكەرشىلىكپەن قاراۋدى ۇيرەنەتىن ورتا. قوعامدىق كولىكتەگى الەۋمەتتىك, مورالدىق احۋال – جالپى قوعامنىڭ مادەني, رۋحاني كەلبەتىنىڭ ايناسى. ونداعى ءتارتىپ, ادامگەرشىلىك, ءوزارا قۇرمەت پەن سابىر – ءاربىر ازاماتتىڭ كۇندەلىكتى ومىرىندە كورىنىس تاباتىن قۇندىلىق. سوندىقتان بۇل كەڭىستىكتە مورالدىق نورمالاردى ساقتاۋ ءار ادامنىڭ بورىشى ءارى مادەنيەتتى قوعام قالىپتاستىرۋ جولىنداعى ماڭىزدى قادام ەكەنىن ءاردايىم ەستە ۇستاعان ءجون.
