فوتو: inbusiness.kz: ءازيز جانۇزاق
ەكى جىل بۇرىن ازاپتاۋ مەن قورلاۋدىڭ باسقا دا تۇرلەرىن جويۋعا, وسى ماسەلە بويىنشا حالىقارالىق نورمالاردى ۇلتتىق زاڭناماعا ەنگىزۋگە, سونداي-اق سوتتالعانداردىڭ قۇقىعىن كەڭەيتىپ, تۇرمەدەگى تەرىس سۋبمادەنيەتتىڭ قالىپتاسۋىنا جول بەرمەۋگە باعىتتالعان زاڭ قابىلداندى. زاڭنامالىق اكتىلەرگە ەنگىزىلگەن وزگەرىستەر ادام قۇقىقتارىن ساقتاۋعا بەرىلەتىن كەپىلدىكتەردى ارتتىرادى. سوتتالعانداردىڭ تۇزەلۋىنە, قوعامعا بەيىمدەلۋىنە مۇمكىندىك جاساۋ ارقىلى ولاردىڭ تۇرمەدەگى جاعدايىن جاقسارتۋدى كوزدەيدى. تۇرمەدە جۇمىسشى ماماندىقتارىن مەڭگەرۋ دە قاراستىرىلعان. دانەكەرلەۋشى, توكار, سلەسار, بەتونشى, كرانشى, ت.ب. ماماندىقتاردى الۋ سوتتالۋشىنىڭ ومىرگە دەگەن قۇشتارلىعىن ارتتىرادى.
جۋىردا سولتۇستىك ءوڭىردىڭ كاسىپكەرلەر پالاتاسى مەن قىلمىستىق اتقارۋ جۇيەسى دەپارتامەنتى ىنتىماقتاستىق تۋرالى مەموراندۋمعا قول قويدى. بۇل قۇجات بويىنشا وبلىس اۋماعىنداعى №48, №50 تۇزەتۋ مەكەمەلەرىندەگى جازاسىن وتەۋشىلەر اراسىندا جۇمىسشى ماماندىعىنا وقىتۋ جانە تاجىريبەلىك ساباقتار باعدارلاماسىن ىسكە اسىرۋدى قامتيدى. باستامانىڭ نەگىزگى ماقساتى – سوتتالعان ادامداردىڭ كاسىپتىك ماماندىق الۋىنا مۇمكىندىك بەرۋ. ال ماماندىعى بار ادام ەرتەڭ بوستاندىققا شىققاندا قوعام ومىرىنە ەركىن ارالاسىپ, وزىنە وڭاي جۇمىس تا تابادى.
كاسىپكەرلەردىڭ سولتۇستىك-قازاقستاندىق پالاتاسىنىڭ ديرەكتورى ەسجان ءورازاليننىڭ ايتۋىنا قاراعاندا, بۇل قۇجات تاجىريبەلىك قانا ەمەس, الەۋمەتتىك ماڭىزعا يە.
ء«بىز بىرلەسىپ جۇمىس ىستەسەك, ماماندىق الۋعا ۇمتىلعان سوتتالعان ادامداردىڭ كاسىبي تۇرعىدان ءوسىپ, شەبەرلىگىن شىڭداۋىنا مۇمكىندىك بار. وسىنىڭ ارقاسىندا ولاردىڭ قوعاممەن جىلدام ارالاسىپ كەتۋىنە وڭتايلى جاعداي تۋادى», دەدى.
كاسىپكەرلەر پالاتاسى تۇزەتۋ مەكەمەلەرىندە وسى زامانعى كاسىبي جۇمىسشىلاردى وقىتىپ, دايارلاۋ مىندەتىن ءوز موينىنا الادى. ال قىلمىستىق-اتقارۋ جۇيەسى وقۋ ۇيرەتۋ جۇمىسىنا ءوز الاڭىن ۇسىنادى. وبلىستىق قىلمىستىق-اتقارۋ جۇيەسى دەپارتامەنتىنىڭ ورىنباسارى قانات ەسەنوۆ بۇل شارانىڭ سوتتالۋشىلاردى جاڭا ومىرگە ىنتالاندىرۋدا ماڭىزى بارىن اتاپ ءوتتى.
«ەگەر ازامات تۇزەتۋ ورنىنان ماماندىق الىپ شىقسا, ول قوعام ومىرىندە بەلسەندىلىگى ارتىپ, جۇمىس ورنىن تابۋىنا مۇمكىندىگى بار. كەز كەلگەن جۇمىس ورنى قازىر ادامنىڭ كاسىبيلىگىنە قارايدى. جۇمىس بەرۋشىلەر كوشەدەن كەلگەن كەزدەيسوق ادامدى جۇمىسقا المايدى, ال جۇمىسشى كاسىبى تۋرالى كۋالىگى بولسا, ونداي ادامنىڭ جۇمىسقا تۇرۋ مۇمكىندىگى جوعارى», دەدى ول.
مۇندا جۇمىسشى كاسىبى عانا ەمەس, كاسىپكەرلىك پەن قارجىلىق ساۋات تۋرالى دا وقىتىلادى. العاشقى كەزەكتە وقۋمەن 120 ادام قامتىلادى, ودان ءارى تاعى 200 ادام كۋرستاردان وتپەك.
سولتۇستىك قازاقستان وبلىسى
