جيىن جۇمىسىنا 700-دەن استام دەلەگات قاتىستى. ولاردىڭ قاتارىندا پارلامەنت دەپۋتاتتارى, مەملەكەتتىك ورگاندار مەن ديپلوماتيالىق كورپۋس وكىلدەرى, ۇكىمەتتىك ەمەس ۇيىمدار, بيزنەس قاۋىمداستىعى, سونداي-اق وتاندىق جانە حالىقارالىق ساراپشىلار بار. سونداي-اق, فورۋمعا 38 شەتەلدىك قوناق, ونىڭ ىشىندە 19 ەلشىلىكتىڭ وكىلدەرى, 10 حالىقارالىق ۇيىم جانە التى ەلدەن كەلگەن دەلەگاتتار قاتىستى.
پلەنارلىق وتىرىس مەملەكەت باسشىسىنىڭ قۇتتىقتاۋ سوزىمەن اشىلدى. پرەزيدەنتتىڭ ءسوزىن قر پرەزيدەنتىنىڭ ىشكى ساياسات جانە كوممۋنيكاتسيالار ماسەلەلەرى جونىندەگى كومەكشىسى ارمان قىرىقباەۆ وقىپ بەردى.
«قازىر قازاقستاندا 18 مىڭنان استام ۇكىمەتتىك ەمەس ۇيىم جۇمىس ىستەيدى. ولاردى مەملەكەتتىڭ سەنىمدى سەرىكتەسى دەۋگە تولىق نەگىز بار. شىن مانىندە, سىزدەر ەلىمىزدىڭ بەرەكە-بىرلىگىن نىعايتۋعا, «ادال ازامات», «زاڭ مەن ءتارتىپ», «تازا قازاقستان» قاعيداتتارىن ىسكە اسىرۋعا بەلسەنە اتسالىسىپ جۇرسىزدەر. مەن بارشاڭىزعا شىنايى ريزاشىلىعىمدى بىلدىرەمىن. مەملەكەت ازاماتتىق قوعامنىڭ ءورىسىن كەڭەيتۋگە ءاردايىم باسا ءمان بەرەدى. بەس جىلدا ارنايى الەۋمەتتىك تاپسىرىسقا بولىنەتىن قارجى ەكى ەسەگە جۋىق ءوستى. بۇل قاراجات يگى باستامالاردى جۇزەگە اسىرۋعا, مۇقتاج جاندار مەن جاستاردى قولداۋعا جۇمسالىپ جاتىر. ورتاق مۇددە جولىنداعى وسىنداي ءوزارا ءتيىمدى ىقپالداستىق الداعى ۋاقىتتا دا جالعاسىن تابادى.بۇگىنگى باسقوسۋدا ايتىلاتىن سالماقتى وي-پىكىرلەر مەن ۇتىمدى ۇسىنىستار ازاماتتىق قوعامدى دامىتۋعا تىڭ سەرپىن بەرەدى دەپ سەنەمىن», دەلىنگەن مەملەكەت باسشىسىنىڭ قۇتتىقتاۋ حاتىندا.
ءىس-شارا بارىسىندا ۇكىمەتتىك ەمەس ۇيىمدار وكىلدەرى تۇراقتى دامۋ مەن ەكولوگيادان باستاپ, تسيفرلاندىرۋ, ينكليۋزيا جانە جاستار باستامالارىن قولداۋ سياقتى نەگىزگى باعىتتار بويىنشا وزدەرىنىڭ ساراپتامالىق باياندامالارى مەن ۇسىنىستارىن ورتاعا سالدى. فورۋمعا قاتىسۋشىلار مەملەكەت, بيزنەس جانە ازاماتتىق قوعام اراسىنداعى ءتيىمدى سەرىكتەستىك – ادىلەتتى ءارى تۇراقتى قازاقستاندى قالىپتاستىرۋدىڭ بەرىك ىرگەتاسى ەكەنىن اتاپ ءوتتى.
قر مادەنيەت جانە اقپارات ءمينيسترى ايدا بالاەۆا فورۋم دەلەگاتتارىنا ارناعان سوزىندە مازمۇندى بايانداما جاساعان بارلىق قوناقتار مەن سپيكەرلەرگە العىسىن ءبىلدىردى. ول بۇگىن ايتىلعان يدەيالار مەن ۇسىنىستار الداعى ۋاقىتتا ناقتى ىسكە اسىپ, قوعامدا ءوزارا سەنىمدى, الەۋمەتتىك جاۋاپكەرشىلىك پەن اشىق ديالوگ مادەنيەتىن نىعايتۋعا ىقپال ەتەتىنىنە سەنىم ءبىلدىردى.
سونىمەن قاتار ايدا بالاەۆا پارلامەنتتىك رەفورمانىڭ ماڭىزدىلىعىن اتاپ ءوتىپ, بۇل وزگەرىستەر زاڭنامالىق بازانى جەتىلدىرىپ, مەملەكەتتىك شەشىمدەر قابىلداۋ پروتسەسىن بارىنشا اشىق ءارى ءادىل ەتەتىنىنە نازار اۋداردى.
«پرەزيدەنت ءوز جولداۋىندا اتاپ وتكەن پارلامەنت رەفورماسى – ەلدىڭ ساياسي جۇيەسىن جاڭعىرتۋدىڭ ماڭىزدى كەزەڭى. رەفورما زاڭ شىعارۋ مادەنيەتىن جەتىلدىرىپ, مەملەكەتتىك شەشىم قابىلداۋ ۇدەرىسىن اشىق ءارى ءادىل ەتۋگە جول اشادى. وسى رەتتە بارشا ازاماتتىق قوعام وكىلدەرىن بۇل باستامانى تەرەڭ تالقىلاپ, ونىڭ ءمانىن قوعامعا تۇسىندىرۋگە بەلسەنە اتسالىسۋعا شاقىرامىز», دەدى مينيستر.
سوڭعى بەس جىل ىشىندە ازاماتتىق فورۋمنىڭ قورىتىندىلارى بويىنشا ازىرلەنگەن ۇسىنىمدارعا سۇيەنە وتىرىپ, قازاقستاندا ستراتەگيالىق ماڭىزى زور بىرقاتار قۇجاتتار قابىلداندى. ولاردىڭ قاتارىندا «ازاماتتىق قوعامدى دامىتۋدىڭ 2030 جىلعا دەيىنگى تۇجىرىمداماسى», «قوعامدىق باقىلاۋ تۋرالى» زاڭ, سونداي-اق ونلاين-پەتيتسيالار ينستيتۋتىن ەنگىزۋ جونىندەگى زاڭنامالىق تۇزەتۋلەر جانە وزگە دە ماڭىزدى باستامالار بار.
سونىمەن بىرگە, قوعامدىق كەڭەستەردىڭ قىزمەتىن رەتتەۋ, بەيبىت جينالىستار وتكىزۋ, قايىرىمدىلىق پەن ۆولونتەرلىك قىزمەتتى دامىتۋ, سونداي-اق مەملەكەتتىك الەۋمەتتىك تاپسىرىستى جانە ۇكىمەتتىك ەمەس ۇيىمداردى گرانتتىق قارجىلاندىرۋدى جەتىلدىرۋ باعىتتارىندا ەلەۋلى وزگەرىستەر ەنگىزىلدى.
رەسپۋبليكالىق فورۋمنىڭ الدىندا ەلىمىزدىڭ بارلىق وڭىرلەرىندە وسىنداي 20 ايماقتىق كەزدەسۋ ءوتتى. ولارعا 3000-نان استام ۇكىمەتتىك ەمەس ۇيىم وكىلدەرى قاتىستى. بۇدان بولەك, جىل بويى سالالىق مينيسترلەر مەن بەيىندى ۇەۇ وكىلدەرىنىڭ قاتىسۋىمەن بىرقاتار كەزدەسۋلەر ۇيىمداستىرىلىپ, ولاردىڭ ناتيجەسىندە 200-دەن استام ناقتى ۇسىنىس دايىندالدى.
