فوتو:.facebook.com/BibigulZheksenbay
بيبىگۇل جەكسەنبايدىڭ ايتۋىنشا, كوپەتنوستى قازاقستان ءۇشىن باق-تىڭ ءرولى ايرىقشا. ءاربىر ءسوز بەن جاريالانىم قوعامداعى سەنىم مەن تاتۋلىققا اسەر ەتەدى.
«سوندىقتان ءجۋرناليستىڭ كاسىبي ەتيكاسى — بۇل تەك ماماندىق تالابى ەمەس, ۇلتتىق قاۋىپسىزدىك پەن قوعامدىق كەلىسىمنىڭ كەپىلى. كوپتەگەن ەلدەردە ەتنوسارالىق تاقىرىپتاردى جاريالاۋدا ناقتى ەتيكالىق نورمالار بار. مىسالى, ۇلىبريتانيادا Ofcom وشپەندىلىك تىلىنە جول بەرمەيدى. كانادادا جۋرناليست وسى باعىتتاعى «نازىك» تاقىرىپتاردى ەتنوستىق توپتارمەن كەڭەسىپ بارىپ جازادى. ەۋروپا كەڭەسىنىڭ حارتياسىندا: «جۋرناليست قوعامدى بولۋگە ەمەس, تۇسىنىستىككە قىزمەت ەتۋى ءتيىس», دەلىنگەن. بۇل — جاۋاپتى جۋرناليستيكانىڭ ورتاق قاعيداتى», دەدى دەپۋتات.
ونىڭ سوزىنشە, ەلىمىزدە 130-دان استام ەتنوس ءومىر سۇرەدى, سوندىقتان ءسوز مادەنيەتى – كەلىسىم مادەنيەتىمەن تىعىز بايلانىستى.
جيىندا باس رەداكتورلار كلۋبى مەن قازاقستان حالقى اسسامبلەياسى جۋرناليستەر كلۋبى باق-تا ەتنوسارالىق جانە ءدىني ماسەلەلەردى جاريالاۋ جونىندە ەتيكالىق كودەكس قابىلداۋ, ارنايى مەديا كەڭەسىن قۇرۋ جانە «تولەرانتتىلىق جانە مەدياەتيكا» ءپانىن جۋرناليستيكا ماماندىقتارىنا ەنگىزۋ ماسەلەلەرىن تالقىلادى.
«بۇل شارالار ءسوز بوستاندىعىن شەكتەۋ ەمەس — سەنىم مەن كاسىبيلىكتى ارتتىرۋ تەتىگى. حالقىمىز «بىرلىك بار جەردە – تىرلىك بار» دەيدى. اقپاراتتىق داۋىردە بۇل قاعيدا بۇرىنعىدان دا وزەكتى. ءبىزدىڭ مىندەتىمىز — ءسوز ارقىلى كەلىسىمدى, تۇسىنىستىكتى جانە ءوزارا قۇرمەتتى نىعايتۋ», دەدى بيبىگۇل جەكسەنباي.
