فوتو: ءماجىلىس
دەپۋتات بولاتبەك ناجمەتدين ۇلى ۇكىمەت ساعاتىندا قالالار مەن وبلىستار, رەسپۋبليكالار اراسىندا قاتىنايتىن اۆتوبۋستاردىڭ ەسكىرىپ بارا جاتقانىن ايتىپ, اۆتوپاركتى جاڭارتۋ ءىسى توقتاپ قالعانىنا نازار اۋداردى. ونىڭ ايتۋىنشا, ءوندىرىس مينيسترلىگى 2024 جىلدىڭ 1 جەلتوقسانىنان باستاپ قولدانىستا بولعان اۆتوبۋستاردى ەلگە كىرگىزۋگە تىيىم سالعان.
ء«بىزدىڭ تاسىمالداۋشىلار شەتەلدە 2–3 جىل قولدانىلعان اۆتوبۋستاردى ساتىپ الا الماي وتىر, ويتكەنى ولاردى اكەلۋ ءۇشىن زاۋىتتان نەمەسە ونىڭ رەسمي وكىلىنەن سەرتيفيكات تالاپ ەتىلەدى. ال قازاقستانداعى رەسمي وكىل جەكە تاسىمالداۋشىدان (مىسالى, گەرمانيا نەمەسە پولشاداعى) ساتىپ الىنعان كولىكتى راستاي المايدى. ناتيجەسىندە جاڭا اۆتوبۋستار تىم قىمباتقا ءتۇسىپ, اۆتوبۋستار پاركى ەسكىرىپ بارادى. بۇل ءوز كەزەگىندە جول اپاتتارىنىڭ كوبەيۋىنە اسەر ەتىپ وتىر», دەدى بولاتبەك ناجمەتدين ۇلى.
ول جاۋاپتى مينيسترلىكتەرگە ماسەلەنى سەرتيفيكاتتاۋ, تەحنيكالىق تەكسەرۋ جانە باقىلاۋ ارقىلى شەشۋدىڭ ناقتى تەتىكتەرىن اتاپ ءوتتى. دەپۋتات جول-كولىك وقيعالارىنىڭ ارتۋىنا Toyota Alphard, Hiace سىندى شاعىن اۆتوبۋس يەلەرىنىڭ زاڭسىز جولاۋشى تاسىمالىمەن اينالىسىپ وتىرعانى دا تۇرتكى ەكەنىن العا تارتتى.
«بۇل كولىكتەر رەسمي تۇردە تاسىمالداۋشى رەتىندە تىركەلمەگەن, ساقتاندىرۋى جوق, تاحوگرافتارمەن جابدىقتالماعان جانە زاڭسىز جۇمىس ىستەيدى. جۇرگىزۋشىلەردىڭ باسىم بولىگى 14–20 ساعاتتاپ جول جۇرەدى, ال رۇقسات ەتىلگەن نورما - بار بولعانى 8 ساعات. بۇل – تىكەلەي اپات تۋدىراتىن سەبەپتىڭ ءبىرى. كولىك مينيسترلىگى ءتيىستى فۋنكتسيالارىن تولىق اتقارماي وتىر. شاعىن اۆتوبۋستاردىڭ جولاۋشى تاسىمالىنا جارامدىلىعى سەرتيفيكاتتالمايدى, تاحوگرافتاردىڭ بار-جوعى, ساقتاندىرۋ مەن ەڭبەك-دەمالىس رەجيمى باقىلانبايدى. ال ءىىم قولدانىستاعى زاڭعا سايكەس كوزگە كورىنەرلىك بۇزۋشىلىق بولماسا, مۇنداي كولىكتەردى توقتاتا المايدى. بۇل - ناعىز تۇيىق شەڭبەر», دەدى بولاتبەك ناجمەتدين ۇلى.
ماجىلىسمەن ىشكى ىستەر ءمينيسترى ەرجان سادەنوۆكە وسى ماسەلەلەردى جاۋاپتى مينيسترلىكتەرمەن بىرلەسە شەشۋدى ۇسىندى.
