وقۋشىنىڭ قىلقالامىنان شىققان سۋرەتتەرىن العاش رەت ۇلىتاۋ اۋدانىنىڭ بولاتساي باۋرايىندا وتكەن «كوكمايسا» فەستيۆالىندە كوردىك. الاڭدا تىگىلگەن كيىز ۇيلەردە قولونەر, كيىز باسۋ, شي توقۋ, ارقان ەسۋ, قامشى ءورۋ سياقتى شەبەرلىك سىنىبى ۇسىنىلدى. قولونەر تۋىندىسىن قىزىقتاپ تۇرعاندا سۇيەكتەر مەن تاستارعا سالعان عاجايىپ سۋرەتتەر, اسىرەسە مالدىڭ جاۋىرىن سۇيەگىنە سالعان سۋرەتى كوزدىڭ جاۋىن الادى.
سۋرەت الەمىن سۇيەتىن جانميرا كوپ سويلەي قويمايدى, ەسەسىنە سۋرەتتەرى سويلەيدى. ول 11-سىنىپتى اياقتاعان سوڭ ديزاينەر وقۋىنا بارعىسى كەلەتىنىن ايتتى.
دارىن يەسى سۋرەت سالاتىن تاستى الىستان ىزدەمەيدى. ۇلىتاۋدىڭ تاستارىن تاڭداپ الىپ, سوعان ءوزىنىڭ ادەمى قيالىن ورنەكتەيدى. تاستىڭ بەتىنە كيىكتىڭ, تازىنىڭ, اققۋدىڭ, ارقاردىڭ جانە تاعى باسقا جانۋارلار مەن قۇستاردىڭ سۋرەتىن, قازاقتىڭ ويۋ-ورنەكتەرىن سالىپ, ءتۇرلى-ءتۇستى بوياۋمەن اشەكەيلەيدى. ءتىپتى كەيبىر جانۋاردىڭ مۇيىزدەرىنە دەيىن ورنەك سالادى. جۇدىرىققا عانا سىياتىن جۇمىر تاستىڭ ۇستىنە بۇكىل قازاقتىڭ بايتاق دالاسىن سىيعىزىپ جىبەرگەن شەبەرلىگىنە ءتانتى بولاسىڭ.
ونەرلى ورەننىڭ تاريحتان دا حابارى بار. كولەمدىلەۋ جالپاق تاستىڭ بەتىنە جوشى حاننىڭ جورىعىن بەينەلەگەن. اسىقتاردىڭ دا بەتىنە تاريح قويناۋىنان كەلە جاتقان بالبال تاستاردى بەدەرلەپ سالعان. ۇلىتاۋدىڭ تابيعاتىن بەينەلەپ, « ۇلىتاۋ» دەپ جازىلعان توسبەلگىلەر جاسايدى.
جانميرانىڭ دارىنىن العاش ۇستازى بالقيا تۇرىسبەكوۆا بايقاعان. ول – ساتباەۆ قالاسىنداعى №7 جالپى ءبىلىم بەرەتىن مەكتەپتە كوركەم ەڭبەك ءپانىنىڭ مۇعالىمى. ساتباەۆ قالاسىنداعى كەنشىلەر سارايى جانىنداعى ۇيىرمەدە وقۋشىلاردى قولونەرگە باۋليدى.
«مەن جانميراعا 5-سىنىپتا سۋرەت پانىنەن ساباق بەردىم. سول كەزدە ونىڭ قويىن كىتاپشاعا سۋرەت سالىپ وتىرعانىن بايقادىم. جەكە تاپسىرمالار جۇكتەپ كورىپ ەدىم, قۇلپىرتىپ جىبەرەدى ەكەن. سۇيەكتەرگە سۋرەت سالاردا «شيكىزاتىن» دايىنداپ بەرەمىن. مالدىڭ جاۋىرىن سۇيەگىنە سۋرەت سالاردا تۇزعا ۇزاق قايناتىپ, ىشىندەگى مايىنان, ءيىس-قوڭىسىنان تازارتىپ, ابدەن كەپتىرەمىن», دەيدى ۇستازى.
جانميرانىڭ جاۋىرىنعا سالعان سۋرەتىنە ءسۇيسىنىپ ۇزاق قارادىق. وندا اسپان تۇستەس بوياۋدىڭ جوعارى جاعىندا كۇن شۋاعىن شاشىپ تۇر. ورتاسىنا قاراي قازاق حالقى قاسيەتتى قۇس دەپ سانايتىن ۇكىنى سالعان. قىراعى قۇستىڭ ماڭداي تۇسىنا شاعىن اسىل تاس تاعىلعان. تۋعان جەرىمدى, ەلىمدى ءتىل-كوزدەن ساقتاسىن دەگەن بەلگى. مويىن تۇسىندا تەمىردەن جاسالعان ۇلتتىق ويۋ-ورنەك. تومەنگى جاعىندا تاستار, اۋزىن اپانداي اشقان ارلان بەينەلەنگەن. بۇل – ءبىر عانا تۋىندىسى. وسىنداي قانشاما قىزىقتى, ماعىناسى تەرەڭ تۋىندىسى بار. كورگەن جۇرت تاڭدانىسىن جاسىرماي, ساتىپ تا الادى.
ۇلىتاۋ وبلىسى
