فوتو: ktk.kz
بۇل تۋرالى بۇگىن استانادا دەنساۋلىق ساقتاۋ, تۇراقتى دامۋ جانە مەديتسينالىق تۋريزم ماسەلەلەرىنە ارنالعان فورۋمدا ايتىلدى. ءىس-شاراعا مەملەكەتتىك ورگاندار, حالىقارالىق ۇيىمدار, مەديتسينالىق ورتالىقتار, ءبىلىم بەرۋ مەكەمەلەرى, ۇكىمەتتىك ەمەس ۇيىمدار جانە 30-عا جۋىق ەلشىلىكتىڭ وكىلدەرى قاتىستى.
«قازاقستان مەديتسينالىق جانە ساۋىقتىرۋ ءتۋريزمىنىڭ وڭىرلىك ورتالىعىنا اينالۋعا بار جاعداي جاسالعان. ول ءۇشىن شەتەلدىك پاتسيەنتتەرگە قىزمەت كورسەتۋدىڭ بىرىڭعاي ستاندارتتارىن ەنگىزۋ, كلينيكالار مەن تۋروپەراتورلار اراسىنداعى بايلانىستى كۇشەيتۋ جانە ەلىمىزدى ەمدەلۋ مەن وڭالتۋداعى سەنىمدى باعىت رەتىندە تانىتۋ قاجەت», دەدى تۋريزم جانە سپورت ءمينيسترى ەربول مىرزابوسىنوۆ.
قازاقستانعا ءجيى ەم ىزدەپ كەلەتىن ەلدەر اراسىندا قىتاي, ءۇندىستان جانە تۇركيا ازاماتتارى بار. شارا بارىسىندا مەديتسينالىق ءتۋريزمدى دامىتۋ جانە سالالار اراسىنداعى ىنتىماقتاستىقتى ارتتىرۋ ماقساتىندا تۋريزم جانە سپورت مينيسترلىگى مەن دەنساۋلىق ساقتاۋ مينيسترلىگى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.
جيىنعا قاتىسۋشىلار «قازاقستاننىڭ سالاماتتى قالالارى» جەلىسىن قۇرۋ باستاماسىنا ەرەكشە نازار اۋداردى.
فورۋم سوڭىندا تۋريزم جانە سپورت ءمينيسترى ەربول مىرزابوسىنوۆ پەن دەنساۋلىق ساقتاۋ ءمينيسترى اقمارال ءالنازاروۆا وتاندىق مەديتسينانىڭ يننوۆاتسيالىق جەتىستىكتەرى مەن تەحنولوگيالارى ۇسىنىلعان ءىرى مەديتسينالىق ورتالىقتار مەن ۇيىمداردىڭ كورمەسىن تاماشالادى.
