سۋرەت: qaztourism.kz
كەلۋشىلەر سانى جونىنەن «بۋراباي» مەملەكەتتىك ۇلتتىق تابيعي پاركى كوش باستاپ تۇر. بيىلعى قاڭتار-تامىز ايلارى ىشىندە پارككە 600 مىڭنان استام تۋريست بارعان. ۇلتتىق پاركتى قاراعايلى ورمانداردىڭ, جارتاستار مەن كولدەردىڭ بىرەگەي ۇيلەسىمىنە بايلانىستى «قازاقستاننىڭ شۆەيتسارياسى» دەپ اتايدى. بۋراباي – وتباسىلىق, ساۋىقتىرۋ تۋريزمىنە, بەلسەندى دەمالىس تۇرلەرىنە ارنالعان تانىمال باعىتتاردىڭ ءبىرى.
ەكىنشى ورىندى الماتى قالاسىنا جاقىن ورنالاسقان ىلە-الاتاۋ ۇلتتىق پاركى يەلەندى. جىل باسىنان بەرى ونىڭ تابيعي لاندشافتتارىن 507 541 تۋريست تاماشالادى. پارك اۋماعى فلورا مەن فاۋنانىڭ الۋان تۇرلىلىگىمەن, تاۋداعى باعىتتارىمەن ەرەكشەلەنەدى, ەكوتۋريزم بويىنشا سۇرانىسقا يە ورىنداردىڭ ءبىرى.
ۇشتىكتى الماتى وبلىسىنداعى «كولساي كولدەرى» ۇلتتىق پاركى تۇيىندەيدى. بۇل عاجايىپ مەكەندى 350 مىڭنان استام ادام ارالاعان. ونىڭ اۋماعىنداعى كولساي مەن قايىڭدى كولدەرى – پاركتىڭ باستى تابيعي نىساندارى.
تۋريستەردىڭ سانى جونىنەن شارىن, باياناۋىل ۇلتتىق پاركتەرى بەستىككە كىرەدى. الماتى وبلىسىندا ورنالاسقان شارىن شاتقالى كوپشىلىك اراسىندا كەڭىنەن تانىمال. وعان فوتوتۋريزم, ەتنوەكسپەديتسيالارمەن اينالىساتىن ساياحاتشىلار ءجيى بارادى.
پاۆلودار وبلىسىندا ورنالاسقان باياناۋىل – ەلىمىز اۋماعىندا قۇرىلعان العاشقى ۇلتتىق پارك. بۇل ءوڭىر جۇمساق كليماتىمەن, تاۋلى لاندشافتتارمەن, كوركەم كولدەرىمەن ەرەكشەلەنەدى.
