پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن وتكەن ءىس-شاراعا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, وزبەكستان پرەزيدەنتىنىڭ كەڭەسشىسى شۋحرات گانيەۆ, تاجىكستان پرەمەر-ءمينيسترىنىڭ ورىنباسارى سۋلايمون زيوزودا جانە تۇرىكمەنستاننىڭ اۋىل شارۋاشىلىعى ءمينيسترى چارىيار چەتيەۆ قاتىستى. ال باقىلاۋشى رەتىندە قىرعىز رەسپۋبليكاسىنىڭ سۋ رەسۋرستارى, اۋىل شارۋاشىلىعى جانە قايتا وڭدەۋ ونەركاسىبى مينيسترلىگى سۋ رەسۋرستارى قىزمەتى ديرەكتورىنىڭ ورىنباسارى ابدىباي جايلووباەۆ قاتىسىپ وتىردى.
«بۇگىندە حالىقارالىق قوعامداستىق بىزدەن تەك مالىمدەمەلەر ەمەس, ناقتى شەشىمدەر كۇتەدى. ارال تەڭىزىنىڭ تاعدىرى, ترانسشەكارالىق سۋدى ءتيىمدى ءارى ءادىل پايدالانۋ, تابيعي رەسۋرستاردى ساقتاۋ – ايماقتىق قانا ەمەس, جاھاندىق ماڭىزى بار ماسەلەلەر. ولار ورنىقتى دامۋ, ازىق-ت ۇلىك پەن ەنەرگەتيكالىق قاۋىپسىزدىك, سونداي-اق ميلليونداعان ادام تۇرمىسىنىڭ ساپاسىمەن تىكەلەي بايلانىستى. بۇۇ باس اسسامبلەياسىنىڭ سوڭعى وتىرىسىندا ەكى ەل باسشىلارى قورشاعان ورتانى قورعاۋ ءۇشىن سەنىم, ىنتىماق جانە بىرلەسكەن ارەكەتتەردىڭ ماڭىزدى ەكەنىن اتاپ وتكەن بولاتىن. قازاقستان بۇل كوزقاراستى تولىق قولدايدى», دەدى پرەمەر-ءمينيستردىڭ ورىنباسارى قانات بوزىمباەۆ.
كەزدەسۋدە تاراپتار كەلەسى جىلى ءساۋىر ايىندا وتەتىن حالىقارالىق ارالدى قۇتقارۋ قورىنا مۇشە مەملەكەتتەر باسشىلارى كەڭەسىنىڭ وتىرىسىنا دايىندىق بارىسىن, سونداي-اق قازاقستاننىڭ 2024-2026 جىلدارداعى توراعالىعى كەزەڭىندە اتقارۋشى كوميتەتتىڭ جۇمىس جوسپارىن جۇزەگە اسىرۋ ماسەلەلەرىن تالقىلادى. جيىنعا قاتىسۋشىلار ارال تەڭىزى باسسەينى ەلدەرىنە كومەك كورسەتۋ جونىندەگى ءىس-قيمىل باعدارلاماسىنىڭ جانە ورتالىق ازيانىڭ تۇراقتى دامۋى ءۇشىن قورشاعان ورتانى قورعاۋ جونىندەگى وڭىرلىك باعدارلامانىڭ ورىندالۋ بارىسىن تالقىلادى. سونداي-اق ولار حالىقارالىق ارالدى قۇتقارۋ قورىنىڭ ۇيىمدىق قۇرىلىمى مەن قۇقىقتىق بازاسىن جەتىلدىرۋ جونىندەگى جۇمىس توبىنىڭ قىزمەتىن قاراستىردى.
قازىرگى ۋاقىتتا ارال تەڭىزى باسسەينىندە 42 ەكولوگيالىق جوبا ىسكە اسىرىلىپ جاتىر. سونىمەن قاتار دۇنيەجۇزىلىك بانكتىڭ قولداۋىمەن ەكى ايماقتىق گرانتتىق جوبانى باستاۋ مۇمكىندىگى پىسىقتالۋدا.
وتىرىستا قاتىسۋشىلار حالىقارالىق ارالدى قۇتقارۋ قورى اتقارۋشى كوميتەتىنىڭ 26 ناۋرىزدى ارال تەڭىزى, ءامۋداريا جانە سىرداريا وزەندەرىنىڭ حالىقارالىق كۇنى دەپ جاريالاۋ تۋرالى ۇسىنىسىن نازارعا الدى.
كەزدەسۋ سوڭىندا حالىقارالىق ارالدى قۇتقارۋ قورى باسقارماسىنىڭ شەشىمدەرىنە قول قويۋ ءراسىمى ءوتتى.
