الەمدىك باسىلىمدار New Shepard زىمىرانى جەر اتموسفەراسى مەن عارىشتىڭ شارتتى شەكاراسى سانالاتىن كارمان سىزىعىنا دەيىن جەتىپ, ەكيپاجدىڭ شتاتتىق رەجيمدە قايتادان جەرگە قونعانىن بىرىنەن سوڭ ءبىرى حابارلاپ جاتىر.
جەرگە امان-ەسەن ورالعان داننا ءبىرىنشى كەزەكتە جەرلەستەرىمەن تىلدەسۋگە ۋاقىت تاپتى.
«عارىشقا ساپار الدىنداعى كوڭىل-كۇيىمنىڭ ديناميكاسىن جەتكىزىپ بەرەتىن ءسوز تابا الماي وتىرمىن. زىمىراننىڭ كوتەرىلۋ ءساتى ەرەكشە اسەرلى بولدى. اسپانعا ۇشىپ بارا جاتقان كەزدە دەنەڭنىڭ ءاربىر تالشىعىنىڭ ءدىرىلىن سەزەسىڭ. ونىڭ ءبارىن قالىپتى جاعداي دەپ قابىلدايسىڭ.
سالماقسىزدىقتىڭ قانداي بولاتىنىن بۇرىن تالاي رەت ويلاعانمىن, ويلارىم تۇيسىگىمدى الداماپتى. كاپسۋلا ساتىدان اجىراعان ساتتە, سانامنىڭ ءبىر بولىگى ادەتتەگى شەكتەۋلەردەن تىس كەتكەندەي كۇي كەشتىم: مەندەگى جەر پلانەتاسىنا ءتان سەزىمنىڭ ءبارى جوعالىپ, تەك شەكسىزدىك سەزىمى قالدى. تاۋدى جاقسى كورەتىن ادام رەتىندە ايتارىم — بۇل سەزىم شىڭعا شىققان ساتتەگىدەي», - دەيدى داننا.
ونىڭ ايتۋىنشا, الەمنىڭ قانشالىقتى كەڭ ەكەنىن كورىپ, ءوزىڭنىڭ كەڭىستىكتە كىشكەنتاي عانا بولىك ەكەنىڭدى ۇعاسىڭ.
«ەسىمدە ماڭگى قالاتىن ءبىر كورىنىس: قارا كەڭىستىكتەگى جارقىراعان, تولىق اي جانە جۇقا كوگىلدىر اتموسفەرالىق قاباتى بار جەر. سول ساتتە ادامزاتتىڭ, عالام الدىندا قانشالىقتى نازىك ءارى كىشكەنتاي ەكەنىن تەرەڭ تۇسىنەسىڭ. سالماقسىزدىق كەزىندە اناما, جەر بەتىندەگى بارلىق انالارعا سالەم جولدادىم. ءوزىم دە انامىن, ءتىپتى ارمانىڭنىڭ ورىنداۋلى مۇمكىن ەمەس بولىپ كورىنسە دە, بالاعا قولداۋ كورسەتۋدىڭ قانشالىقتى ماڭىزدى ەكەنىن جاقسى بىلەمىن. عارىشعا ءاربىر ءسات ىشكى دۇنيەممەن جۇمىس جانە تۇراقتى نەگىز قالىپتاستىرۋ جولى ەكەنىن عارىشتىق تۇيسىكپەن سەزدىم. مەن عارىشقا كوتەرىلۋ مۇمكىندىگى, سول دايىندىقتىڭ, تەپە-تەڭدىكتى ساقتاي ءبىلۋدىڭ جانە كەز كەلگەن جاعدايدا ءوز-ءوزىڭدى ۇستاي الۋدىڭ ناتيجەسى ەكەنىنە سەنىمدىمىن», - دەدى داننا قىز.
داننا Portals دەپ اتالاتىن جاڭا IT-جوبانى ازىرلەپ جاتقان كوماندامەن جۇمىس ىستەپ جاتىر. بۇل جوبا ءوزىن-ءوزى رەتتەۋ تەحنولوگيالارىنا, مەنتالدى گيگيەنا مەن ىشكى تەپە-تەڭدىككە ارنالعان.
ء«بىز سانانى دامىتۋ, ىشتەي ءوسۋ ادىستەرى جانە ادامنىڭ اقىلىمەن بولاشاقتاعى ءوزارا ارەكەتتەسۋىن زەرتتەپ جاتىرمىز. جوبانى 2026 جىلدىڭ ورتاسىنا قاراي باستايمىز. ءبىزدىڭ جوبامىز ءدال وسىنداي ىزدەنىستەگى ادامداردىڭ جۇرەگىنە جەتەدى دەپ سەنەمىن. Blue Origin كومپانياسىنا شەكسىز العىسىمدى بىلدىرەمىن — ولار عارىشتى بۇكىل الەم ادامدارىنا قولجەتىمدى ەتىپ وتىر. بۇل — زەرتتەۋ مەن قاۋىپسىزدىكتى ءبىر دەڭگەيدە ۇستاي وتىرىپ, جاڭا بۋىن زەرتتەۋشىلەرى مەن ارمانداۋشىلارىنا مۇمكىندىك بەرەتىن بولاشاققا باعىتتالعان كومپانيا», - دەيدى داننا.
عارىشكەرلەر اۋىلىندا بولعان داننا قاراعۇسوۆا ۇلى ايتۋارمەن بىرگە قازاقستاندى تانىستىرىپ, ەكيپاج مۇشەلەرىنە جانە Blue Origin قىزمەتكەرلەرىنە ەلىمىزدىڭ مادەني مۇراسى مەن تابيعاتى تۋرالى ايتىپ بەردى
قازاقتىڭ قوناقجاي داستۇرىنە ساي, ول ءاربىر ەكيپاج مۇشەسىنە جانە كومپانيا توبىنا ەستەلىك سىيلىقتار تابىستادى. بۇل ىزگى قادام ۇشۋعا قاتىسقان بارلىق ادامدار تاراپىنان ەرەكشە ىقىلاسپەن قابىلدانعانى سونشالىقتى ەكيپاج ءبىراۋىزدان وزدەرىن Space Nomads («عارىش كوشپەندىلەرى») دەپ اتاۋعا شەشىم قابىلدادى.
«ادامدارعا بۇل اتاۋ قاتتى ۇنادى, وندا بارىمىزگە ورتاق ءبىر رۋح بار ەدى: قوزعالىس, ىزدەنىس پەن جىلىلىقتى قاي جەردە بولساڭ دا ساقتاۋ قابىلەتى», — دەدى داننا.
داننا قاراعۇسوۆانىڭ Blue Origin ميسسياسىنا قاتىسۋىن الەم عارىشقا ۇشۋ ەمەس, ادام رۋحىنىڭ شەكسىز مۇمكىندىكتەرىن تانۋعا باعىتتالعان قادام دەپ قابىلدادى. New Shepard باعدارلاماسىنىڭ اعا ۆيتسە-پرەزيدەنتى فيل دجويستىڭ سوزىمەن ايتقاندا, بۇگىنگى ميسسيا — ەكيپاجدىڭ زەرتتەۋگە دەگەن ىقىلاسىنىڭ جالعاسى.
«جەردى جوعارىدان كورۋ مۇمكىندىگى ادامنىڭ دۇنيەتانىمىنا تەرەڭ اسەر ەتەدى. بۇل تاجىريبە ءبىزدىڭ پلانەتامەن بايلانىسىمىزدى كۇشەيتىپ, مۇمكىندىكتىڭ شەكاراسىن كەڭەيتۋگە شابىت بەرەدى» دەيدى فيل دجويس.
