سۋرەت: russian.eurasianet.org
العاش رەت 1851 جىلى ۆەنەتسيادا ساحنالانعان وپەرا تەرەڭ پسيحولوگيزم مەن زاماناۋي مۋزىكانى ادەمى ۇيلەستىرگەن كوركەم شىعارما. سودان بەرى دە قانشاما ۋاقىت وتسە دە ادام نامىسىنىڭ شەگى, قۇشتارلىق كۇشى جانە تاعدىردىڭ قايعىلى شاراسىزدىعى تۋرالى ماڭگىلىك سۇراقتاردىڭ جاۋابى تابىلعان ەمەس.
قويىلىمدى بەلگىلى فرانتسۋزدىق رەجيسسەر ارنو بەرنار ساحنالادى. ونىڭ ەسىمى ەلوردالىقتارعا بۇعان دەيىنگى گاەتانو دونيتسەتتيدىڭ «ماحاببات سۋسىنى» سپەكتاكلى ارقىلى جاقسى تانىس. رەجيسسەر «ريگولەتتو» وپەراسىن قويۋعا كوپ ىزدەنگەن. ول كەيىپكەرلەر بەينەسىن ءتۇرلى مىنەزدەر ارقىلى اشادى.
ماسەلەن, ريگولەتتو – قىرشاڭقى ءارى سايقىمازاق. ءبىر جاعىنان, تاعدىرى قيىن ادام. ال دجيلدانىڭ مىنەزى باتىل, قانداي قادامعا دا ەركىن باراتىن قىز. سونداي-اق مانتۋيا گەرتسوگى – ءازازىل ءارى وكتەم. قويىلىمدا باستى پارتيانى قازاقستاننىڭ ەڭبەك سىڭىرگەن قايراتكەرى تالعات مۇساباەۆ پەن ارنايى شاقىرىلعان كارىس باريتونى چجۋنحەك فەليكس پاك ورىندادى. ەكەۋى دە «ريگولەتتو» وبرازىن تاماشا سومدادى. باس كەيىپكەر بەينەسى درامالىق قۋاتىمەن, ۆوكالدىق اسەمدىگىمەن تاڭعالدىردى. ولار ايتقان «Cortigiani, vil razza dannata» ارياسى وپەرانىڭ بارلىق ەموتسياسىن ءدال جەتكىزدى. دجيلدامەن بولعان دۋەتتەر دە كەيىپكەر جانىنىڭ نازىكتىگىن اشىپ كورسەتتى.
ال دجيلدانىڭ پارتياسىن ۋكراينالىق سوپرانو يۋليا زاسيموۆا مەن تەاتر جۇلدىزى سالتانات احمەتوۆا, ال ءۇشىنشى كۇنى لەيلا الامانوۆا ناقىشىنا كەلتىرىپ ايتتى. وسى ۇشەۋى شىرقاعان «Caro nome» ارياسى ءمىنسىز كولوراتۋرامەن, تازالىعىمەن ءتانتى ەتتى. ەكىنشى اكتىدەگى اكەسىنە شىندىعىن ايتقان ءساتى كورەرمەنگە ۇمىتىلماستاي اسەر قالدىردى. سونىمەن قاتار مانتۋيا گەرتسوگىنىڭ پارتياسىن سوليستەر جان تاپين مەن ارتۋر عابديەۆ ورىندادى. اسىرەسە باس حورمەيستەر ەرجان ءداۋىتوۆ دايىنداعان حور دا ماڭىزدى ءرول اتقاردى. سارايداعى شىتىرمان وقيعالار ساحناسىندا حوردىڭ ءۇنى انىق ءارى قۋاتتى ەستىلدى.
بۇل تۋىندىعا الەمگە تانىمال ونەرپاز الان بورىباەۆ ديريجەرلىك ەتتى.
ماەسترو قويىلىمداعى وقيعالاردى مۋزىكامەن كەرەمەت اسەمدەدى. سونداي-اق سۋرەتشى اننا ۆەردەنىڭ ەڭبەگى دە ەرەكشە. ونىڭ كوستيۋمدەرى دە سول ءداۋىردىڭ ستيلىنە ساي جاسالعان.
قىسقاسى, جۇرتشىلىق قويىلىم سوڭىندا تەاتر ارتىستەرىنىڭ ونەرىنە ءدان ريزا بولىپ, ۇزاق ۋاقىت قول شاپالاقتاپ, ساحنادان جىبەرمەدى.
