وڭىرلىك كوممۋنيكاتسيالار قىزمەتىنىڭ بريفينگىندە ەنەرگەتيكا جانە سۋمەن جابدىقتاۋ باسقارماسىنىڭ باسشىسى نۇرباقىت سەرىكباي «الماتى قالاسىن دامىتۋ جول كارتاسى» اياسىندا «الماتىتەپلوكوممۋنەنەرگو» جشس-ءنىڭ 17 قازاندىعى جوندەلدى. بۇل – قالاداعى بارلىق نىسانداردىڭ شامامەن 20%-ى. جوندەۋ جۇمىستارى تۇركسىب, مەدەۋ, الاتاۋ مەن جەتىسۋ اۋداندارىندا جۇرگىزىلدى. جوبالار اياسىندا ەسكىرگەن جابدىقتار اۋىستىرىلىپ, باسقارۋ جۇيەلەرى جاڭارتىلدى, جاڭا دەاەراتورلار, سورعىلار مەن اككۋمۋلياتورلىق باكتار ورناتىلدى, سونداي-اق وسى زامانعى قازاندىق عيماراتتارى سالىندى. «كاسىپورىن قازاندىقتاردى جوندەۋ, جاڭارتۋ مەن قايتا قۇرۋ بويىنشا كوپ جۇمىس ىستەدى. باستى ماقساتىمىز – قالا تۇرعىندارىن سەنىمدى, قاۋىپسىز جانە ءتيىمدى جىلۋمەن قامتاماسىز ەتۋ» دەپ اتاپ ءوتتى.
كەلەر جىلى جول كارتاسى اياسىندا تاعى 20 قازاندىقتى جاڭارتۋ جوسپارلانىپ وتىرسا, 2030 جىلعا دەيىن 61 نىسان جاڭعىرتىلماق. بۇل قالاداعى جىلۋ جۇيەسىنىڭ قۋاتتى ۇنەمدەۋىنە مۇمكىندىك بەرەدى. ايتۋىنشا, «الماتىتەپلوكوممۋنەنەرگو» جشس نىساندارىندا قىسىم مەن تەمپەراتۋرانى ونلاين رەجيمدە باقىلاۋعا مۇمكىندىك بەرەتىن پيلوتتىق جوبا ىسكە قوسىلعان. بۇل جۇيە جىلۋ جەلىلەرىنىڭ جاعدايىن ناقتى ۋاقىت رەجىمىندە باقىلاپ, وقىس جاعدايدا جەدەل قيمىلداۋعا مۇمكىندىك بەرەدى.
تسيفرلىق جۇيە اپاتتىڭ الدىن الۋعا ىقپال ەتەدى. جۇيە تەمپەراتۋرا, قىسىم مەن جىلۋ تاسىمالداعىشتىڭ شىعىنىن تىركەپ, دەرەكتى ديسپەتچەرلىك ورتالىققا جىبەرەدى. وسىلايشا, اقاۋدىڭ الدىن الۋعا بولادى. جىلىتۋ ماۋسىمىندا «اقىلدى كوممۋنالدىق جۇيەگە» كوشۋ كەزەڭىندە بارىق ينجەنەرلىك جەلى بىرىڭعاي تسيفرلىق پلاتفورماعا بىرىكتىرىلەتىن بولادى.
الماتى
