فوتو: رەسەيدىڭ قازاقستانداعى ەلشىلىگى
ەكى ەل اراسىنداعى مادەني بايلانىستى ودان ءارى نىعايتۋ اياسىندا ءبىرشاما ماڭىزدى ءىس-شارالار جوسپارلانعان.
مادەنيەت جانە اقپارات مينيسترلىگىنىڭ مالىمەتىنشە, 10 قازان – 23 قاراشا ارالىعىندا جاڭا ترەتياكوۆ گالەرەياسىندا «قازاقستان ونەرىنىڭ جاۋھارلارى» كورمەسى وتەدى. ءا. قاستەەۆ اتىنداعى قر مەملەكەتتىك ونەر مۋزەيىنىڭ كوللەكتسياسىنان قازاقستاننىڭ جەتەكشى قىلقالام شەبەرلەرىنىڭ 43 تۋىندىسى قويىلادى. سونىمەن قاتار كەلۋشىلەر مەملەكەتتىك ترەتياكوۆ گالەرەياسىنىڭ قورىنان الىنعان 17 كەسكىندەمە مەن 11 ءمۇسىن جۇمىسىن تاماشالاي الادى.
مادەني كۇندەر اياسىندا وتاندىق كينوتۋىندىلار دا كورسەتىلەدى. 10 قازان كۇنى ماسكەۋدەگى «پوكلونكا» كينوتەاترىندا رەجيسسەر س. وتەپبەرگەنوۆتىڭ «پاتريوتتار ۋاقىتى» اتتى اسكەري ەكشن ءفيلمى جانە رەجيسسەر ب.شەكەروۆتىڭ «1941 جىلدىڭ جازى» كينوكارتيناسى, 11 قازاندا اتالعان كينوتەاتردا رەجيسسەر ف.ءشارىپوۆتىڭ «توقتا, ءتۇن» ءفيلمى كورسەتىلسە, كەشكە رەجيسسەر ا.ساحاماننىڭ «دوس-مۇقاسان» ءفيلمى ۇسىنىلادى.
12 قازان كۇنى ماسكەۋلىك كورەرمەن رەجيسسەر م. تۇردىبەكتىڭ ەجەلگى ساقتاردىڭ كيەلى تاريحىن, تۇرمىسى مەن مادەنيەتىن, اسكەري ونەرىنەن سىر شەرتەتىن «التىن ادام» تولىقمەتراجدى انيماتسيالىق ءفيلمىن تاماشالاي الادى. كەشكى بولىمدە رەجيسسەر ت. دۋلاتوۆتىڭ «90+1» ءفيلمى كورسەتىلەدى.
تەاترسۇيەر قاۋىم ءۇشىن 13 قازان كۇنى رەسەي مەملەكەتتىك اكادەميالىق كىشى تەاترىندا قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ «پاراسات مايدانى» قويىلىمى ساحنالانادى.
12 قاراشا كۇنى رەسەيدىڭ مەملەكەتتىك اكادەميالىق ۇلكەن تەاترىندا قازاقستان ونەرپازدارىنىڭ قاتىسۋىمەن گالا-كونتسەرت وتەدى. ءىس-شارا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ رەسەي فەدەراتسياسىنا مەملەكەتتىك ساپارى اياسىندا ۇيىمداستىرىلادى. مادەني كۇندەر اياسىندا وتەتىن ءىس-شارالارعا رەسەي مەن قازاقستاننىڭ زيالى قاۋىم وكىلدەرى, عالىمدار, جازۋشىلار, ديپلوماتيالىق كورپۋس پەن شىعارماشىلىق وداقتار, سونداي-اق قازاق دياسپوراسىنىڭ وكىلدەرى قاتىسادى.
ءىس-شارالار قازاقستان رەسپۋبليكاسى مادەنيەت جانە اقپارات مينيسترلىگىنىڭ ۇيىمداستىرۋىمەن رەسەي مادەنيەت مينيسترلىگىنىڭ قولداۋىمەن وتەدى.
