سۋرەت: primeminister.kz
تاراپتار قاراشانىڭ ءبىرىنشى ونكۇندىگىندە ورال قالاسىندا قازاقستان مەن رەسەيدىڭ XXI وڭىرارالىق ىنتىماقتاستىق فورۋمى قارساڭىندا وتكىزىلەتىن ىنتىماقتاستىق جونىندەگى ۇكىمەتارالىق كوميسسيانىڭ 26-وتىرىسىنا دايىندىقتى تالقىلادى. الداعى فورۋمنىڭ تاقىرىبى – «جۇمىسشى ماماندىعى – ەكونوميكالىق ءوسۋدىڭ درايۆەرى».
وتىرىستىڭ جانە فورۋمنىڭ شەڭبەرىندە ءوزارا ءىس-قيمىلداعى باسىم باعىتتار – ساۋدا-ەكونوميكالىق ىنتىماقتاستىق, ونەركاسىپ, ەنەرگەتيكا, كولىك جانە لوگيستيكا, سونداي-اق باسقا دا سالالاردى قامتيتىن ەكىجاقتى كەلىسىمدەر پاكەتىنە قول قويىلادى دەپ جوسپارلانىپ وتىر. كەزدەسۋگە قاتىسۋشىلار ءوزارا تاۋار اينالىمىن ارتتىرۋ ماسەلەسىنە ەرەكشە نازار اۋداردى. رەسەي ەلىمىزدىڭ ءىرى ساۋدا جانە ينۆەستيتسيالىق ارىپتەسىنىڭ ءبىرى بولىپ قالا بەرەدى.
2024 جىلعى قورىتىندى بويىنشا ەكى ەل اراسىنداعى تاۋار اينالىمى 27,8 ملرد دوللاردان اسىپ, وتكەن جىلمەن سالىستىرعاندا 3%-عا ءوستى. بيىلعى جىلعى جەتى ايداعى كورسەتكىش – 14,4 ملرد دوللار. بۇل 2024 جىلعى سايكەس كەزەڭنەن 7,2%-عا تومەن. وسىعان بايلانىستى تاراپتار ءوزارا ساۋدانى تۇراقتاندىرۋ جانە ودان ءارى ارتتىرۋ شارالارىن تالقىلادى.
ەكى ەل شەكاراسىنداعى كولىك لوگيستيكاسى, ونىڭ ىشىندە كەپتەلىس ماسەلەسى دە قارالدى. ەكى تاراپ تا تۋىنداعان قيىندىقتى بىرلەسىپ ءارى جەدەل رەتتەۋگە دايىن ەكەندەرىن جەتكىزدى. سونىمەن قاتار شەكاراداعى ماسەلەلەر كولىك ۆيتسە-ءمينيسترى ماقسات قالياقپاروۆ پەن رەسەي كولىك ءمينيسترىنىڭ ءبىرىنشى ورىنباسارى ۆالەنتين يۆانوۆتىڭ قاتىسۋىمەن وتكەن كوشپەلى كەڭەستە دە ءسوز بولدى. تاراپتار اۆتوموبيل وتكىزۋ بەكەتتەرىن جاڭعىرتۋ جونىندەگى بىرلەسكەن جوسپارلاردى كۇشەيتۋدى, سونداي-اق جوبالاردى ىسكە اسىرۋ مەرزىمىن 2030–2032 جىلداردان 2026–2027 جىلدارعا اۋىستىرىپ, جەدەلدەتۋ ماسەلەسىن تالقىلادى. بۇدان بولەك, اۆتوجول جوبالارى مەن رەسەيگە شىعاتىن حالىقارالىق كولىك دالىزدەرىن دامىتۋعا, سونىڭ ىشىندە ەلىمىزدىڭ ترانزيتتىك الەۋەتىن ارتتىرۋ جانە سىرتقى ەكونوميكالىق بايلانىستاردى كەڭەيتۋ تۇرعىسىنان ستراتەگيالىق ماڭىزى بار «سولتۇستىك – وڭتۇستىك» باعىتىنا ەرەكشە نازار اۋدارىلدى.
كەڭەس بارىسىندا حالىقارالىق اۆتوموبيل تاسىمالدارى, جۇك اينالىمى جانە جۇرگىزۋشىسىز كولىك قۇرالدارى ماسەلەلەرى دە قارالدى. جەكەلەگەن وتكىزۋ بەكەتتەرىندەگى قازىرگى جاعداي تالقىلانىپ, رەسەي تاراپىنان بۇل ماسەلە قۇزىرەتتى ورگانداردىڭ ەرەكشە باقىلاۋىندا ەكەنىن حابارلادى. ءتيىستى ۆەدومستۆولار اراسىنداعى ءوزارا ءىس-قيمىل جۇمىس تارتىبىندە ءارى سىندارلى تۇردە جالعاسىپ جاتقانى ايتىلدى.
