ازىرگە بۇل بايقاۋ ورتالىق ازياداعى كلاسسيكالىق ونەردەگى جالعىز جوبا بولعاندىقتان, قازاقستانداعى كونكۋرس الىس تا جاقىن ەلدەردىڭ كاسىبي وپەرا مەن كونتسەرتتىك كامەرالىق انشىلەرىن جيناپ ءجۇر. ادەتتەگىدەي, بيىلعى بايقاۋ دا جوعارى دەڭگەيدە ءوتتى. كلاسسيكالىق ونەردىڭ قارلىعاشتارى قانات قاقتى.
بيبىگۇل تولەگەنوۆانىڭ ءحىىى حالىقارالىق ۆوكاليستەر بايقاۋىندا بيىلعى باس جۇلدە رەسەيگە كەتتى. بۇرناعى جىلى گران-ءپريدى باكۋلىك ماحير تاگيزادە اكەتكەن ەدى.
بەدەلى بيىك حالىقارالىق ۆوكاليستەر كونكۋرسىنىڭ جەڭىمپازدارى جامبىل اتىنداعى قازاق مەملەكەتتىك فيلارمو-نياسىندا ماراپاتتالدى.
وپەرا ونەرىنىڭ جەڭىمپازى اتانۋ ءۇشىن قازاقستان, ارمەنيا, رەسەي, وزبەكستان, قىرعىزستان, موڭعوليا, يتاليا, ۋكراينادان ورىنداۋشىلار تالانت جارىستىردى. اقتىق سىنعا وتكەن 17 ءانشىنىڭ ونەرىن الەمدىك وپەرا مايتالماندارىنان قۇرالعان حالىقارالىق قازىلار القاسى باعالادى.
وپەرا مەرەكەسى ىسپەتتى بايقاۋدا قازىلار القاسىنىڭ ءتورايىمى كسرو مەن قازاقستاننىڭ حالىق ءارتىسى, سوتسياليستىك ەڭبەك ەرى بيبىگۇل احمەتقىزى تولەگەنوۆا ۇيىمداستىرۋشىلارعا, دەمەۋشىلەر مەن بارشا قاتىسۋشىلارعا شىنايى العىسىن ءبىلدىرىپ, جەڭىمپازدىڭ اتىن ءوزى جاريالادى. بيىلعى باس جۇلدەنى (گران-پري) ماسكەۋدەن كەلگەن سوفيا ساكانيا يەلەندى.
جيىرما جاستاعى ءانشى باقىتجان بايقادام ۇلىنىڭ «سۇيگەن ساۋلەم» ءانىن ناقىشىنا كەلتىرە ورىنداۋىمەن كورەرمەندەر ىقىلاسىنا بولەندى.
«باسەكەنىڭ ءباسى جوعارى بولدى. بيبىگۇل احمەتقىزى – اڭىز ادام. ونى ءوز كوزىممەن كورۋدىڭ ءوزى – ۇلكەن باقىت. البەتتە, وعان قوسا حالىقارالىق بايقاۋلار وراسان تاجىريبە, وركەسترمەن جۇمىس ىستەۋ, بۇرىن بىلمەگەن اسەرلەر ۇلكەن مەكتەپتەن وتكەندەي اسەر قالدىردى», دەدى سوفيا.
حالىقارالىق وپەرا ونەرىنىڭ دوداسىنداعى ءى ورىنعا ءاليحان بەيسەكوۆ (الماتى), ەكاتەرينا سۆيريدوۆا (ماسكەۋ) مەن مۋنحتۋۆشين حورولگوراۆ (ۇلان-باتىر) لايىقتى دەپ تانىلدى.
الماتى
