سۋرەت: instagram.com/oqu_agartu_ministrligi/
«TALIS» زەرتتەۋى ءبىلىم بەرۋ ورتاسىن, پەداگوگتەردىڭ ەڭبەك جاعدايلارىن, كاسىبي دامۋ مۇمكىندىكتەرىن, وقىتۋ تاجىريبەسىن جانە كاسىبي ۇستانىمدارىن باعالايدى. زەرتتەۋگە ەلىمىزدەن 7 مىڭنان استام پەداگوگ جانە 369 مەكتەپ ديرەكتورى قاتىستى. وقۋ-اعارتۋ مينيسترلىگى بۇل مۇعالىمدەردىڭ وقۋ ورتاسىن جانە ەڭبەك جاعدايلارىن جاقسارتۋعا باعىتتالعان كەڭ اۋقىمداعى جالعىز حالىقارالىق زەرتتەۋ ەكەنىن اتاپ ءوتتى. 2018 جىلمەن سالىستىرعاندا پەداگوگتەردى اكىمشىلىك جۇمىستارعا تارتۋ ازايىپ, ولار ساباق بەرۋگە جانە اتا-انالارمەن, قامقورشىلارمەن بايلانىسقا كوبىرەك ۋاقىت بولە باستاعان. سونداي-اق ماماندىعىنا جانە ەڭبەك جاعدايىنا قاناعاتتانۋ دەڭگەيى ەداۋىر ارتقان.
ودان بولەك, زەرتتەۋ ناتيجەلەرى پەداگوگتەردىڭ ەڭبەك جاعدايىندا ايتارلىقتاي وڭ وزگەرىستەر بولعانىن كورسەتەدى. وتكەن وقۋ جىلىندا پەداگوگتەردىڭ ورتاشا اپتالىق جۇكتەمەسى 36 ساعاتتى قۇرادى. ال 2018 جىلى بۇل كورسەتكىش 50 ساعات بولعان. مۇنداي قىسقارتۋ – ەىدۇ ەلدەرىنىڭ ىشىندە ەرەكشە جاعداي. سونىمەن قاتار ەلىمىزدەگى پەداگوگتەردىڭ ورتاشا جاسى 41 جاستى قۇرادى, بۇل ەىدۇ-دەگى ورتاشا كورسەتكىشتەن 4 جاسقا تومەن.
ماڭىزدى ناتيجەلەردىڭ تاعى ءبىرى – پەداگوگتەردىڭ ەڭبەك جاعدايلارىنا جانە جالاقىسىنا قاناعاتتانۋشىلىق دەڭگەيىنىڭ كوتەرىلۋى. ساۋالناما دەرەكتەرى بويىنشا, پەداگوگتەردىڭ 95%-ى ءوز جۇمىسىنا كوڭىلى تولاتىنىن, ال 80%-ى ماماندىقتى قايتا تاڭداسا, قايتادان مۇعالىم بولۋدى قالايتىنىن ايتقان.
ەلىمىزدە «TALIS» زەرتتەۋىن ۇيلەستىرۋمەن احمەت بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى اينالىسادى.
