ءىستىڭ باستى فيگۋرانتى – شىمكەنت قالاسى ۇقك دەپارتامەنتىنىڭ بۇرىنعى ءبىرىنشى ورىنباسارى مانات سارباسوۆ پارا الۋ جانە قىلمىستىق جولمەن كەلگەن تابىستى زاڭداستىرۋ باپتارى بويىنشا كىنالى دەپ تانىلدى. ول ورتاشا قاۋىپسىزدىك مەكەمەسىندە جازاسىن وتەۋ ءۇشىن 12 جىلعا باس بوستاندىعىنان ايىرىلدى.
سونىمەن قاتار, سارباسوۆ ۇقك پودپولكوۆنيگى شەنىنەن ايىرىلىپ, ەكى بولمەلى پاتەرى مەن Toyota Land Cruiser كولىگى تاركىلەندى. ول 70 ميلليون تەڭگە كولەمىندەگى پارا سوماسىن مەملەكەتكە قايتارۋعا مىندەتتەلدى.
تەرگەۋ دەرەكتەرىنە سايكەس, 2019–2020 جىلدارى سارباسوۆ كاسىپكەر ەلميرا دۇيسەنقىزىنان كوللەدجگە قامقورلىق كورسەتۋ ءۇشىن 45 ميلليون تەڭگە, ال جەكە مەكتەپكە قولداۋ كورسەتۋ ءۇشىن تاعى 70 ميلليون تەڭگە العان. ايىپتاۋ نۇسقاسى بويىنشا, بۇل قاراجاتتى ول ەكى پاتەر مەن جول تالعامايتىن كولىك ساتىپ الۋ ارقىلى "جۋدىرعان". پاتەرلەردىڭ ءبىرىن جوندەۋدەن كەيىن ءۇش ەسە قىمباتقا ساتقان.
سارباسوۆپەن بىرگە سوتقا تاعى ءتورت ادام تارتىلدى: شىمكەنت قالاسى دەنساۋلىق ساقتاۋ باسقارماسىنىڭ بۇرىنعى باسشىسى تەمىرحان ۆارزيلوۆ, ونىڭ ورىنباسارى شىڭعىس جاڭاباەۆ, كاسىپكەر ەرلان تىشقانباەۆ جانە ۇقك مايورى ايدوس سرايىلوۆ.
پروكۋراتۋرا نۇسقاسى بويىنشا, ۆارزيلوۆ, جاناباەۆ جانە تىشقانباەۆ مەديتسينالىق جابدىقتاردى جەتكىزۋ جانە ماسكالاردى قىمبات باعامەن ساتىپ الۋ كەزىندە بيۋدجەت قاراجاتىن جىمقىرۋعا قاتىسقان. مەملەكەتكە كەلتىرىلگەن جالپى شىعىن 130 ميلليون تەڭگەدەن اسادى.
پروكۋرور ۆارزيلوۆ پەن جاناباەۆقا 8 جىل, ال تىشقانباەۆقا 7 جىل باس بوستاندىعىنان ايىرۋ جازاسىن سۇراعانىمەن, سوت جەڭىل ۇكىم شىعاردى:
- تەمىرحان ۆارزيلوۆ – 4 جىلعا بوستاندىعىن شەكتەۋ
- شىڭعىس جاڭاباەۆ – 7 جىلعا باس بوستاندىعىنان ايىرۋ
- ەرلان تىشقانباەۆ – 5 جىلعا بوستاندىعىن شەكتەۋ, سوت زالىنان بوساتىلدى
ۇقك مايورى ايدوس سرايىلوۆ قر قك 304-بابى (زاڭسىز كاسىپكەرلىك) بويىنشا كىنالى دەپ تانىلىپ, 1 جىلعا بوستاندىعىن شەكتەۋ جازاسىنا كەسىلدى. الايدا قولدانىستاعى راقىمشىلىققا بايلانىستى ول جازاسىن وتەمەيدى.
