شىراعداندار كورمەسى

جاقىندا تۇڭعىش پرەزيدەنت مۋزەيىندە «ازىرەت سۇلتان» مەملەكەتتىك تاريحي-مادەني قورىق مۇراجايىنىڭ مۇرىندىق بولۋىمەن «مىڭجىلدىقتار ساۋلەسى» اتتى شىراعداندار كورمەسى اشىلدى. شىراق نەمەسە پىلتە شامدار ءبىزدىڭ اتا-بابامىز ءۇشىن نەگىزگى جارىق كوزى سانالادى, قازاق ءوزىنىڭ مەيىرىمى تۇسكەن ادامىنا ساۋلەم, جا­نارىم, شىراعىم, جارىعىم دەۋى –­ وسى­نىڭ دالەلى. مۇنى كۇندىز-­ ءتۇنى جا­رىعى سونبەيتىن قازىرگىنىڭ قالا بالاسى قايدان ءبىلسىن, مۇرا­جايدان كورمەسە. بۇگىنگى تىلمەن ايتقاندا, تەحنيكالىق قاۋىپسىزدىك ساقتالماسا, شىراقتان ءتىلسىز جاۋدىڭ لاپ ەتۋى ءاپ-ساتتە ەكەنىن بىلگەن ەرتەدەگى ادامدار, شىراقتى ورناتاتىن شىراعداندار جاساعان. كورمەنى تاماشالاۋعا كەلگەندەردىڭ كوز جا­ۋىن العان وسى شىراعدانداردىڭ جاسالۋ ءتاسىلى, امان-ساۋلىقتى تىلەيتىن سىرتىنداعى جازبالارى مەن قولادان قۇيىلعان قولايلىلىعى بولدى. XIV عاسىردا ءامىر تەمىردىڭ بۇيرىعىمەن قوجا احمەت ياسساۋي كەسەنەسى ءۇشىن شەبەر يزز اد-دين يبن تادج اد-دين يسفاحاني جاساعان شىراعداندار كورمە ءسانىن كەلتىردى. تۇركى وركەنيەتىنىڭ ەجەلگى وشاق­تارىنىڭ بىرەگەيى تۇركىستان جازيراسىنان جەتكەن تۇپنۇسقاسىنداعى شىراعداندار توپتاماسىنىڭ الدى ب.ز.د ءىى مىڭ جىلدىقتى قامتىسا, سوڭعىسى ءحىح عاسىرعا جاتادى. ماقسات – دالا وركەنيەتىندە ەجەلگى داۋىردەن باستالاتىن باي مۇرانى كوپشىلىككە كورسەتۋ. شىراعداندار كوللەكتسياسى «ۇلت­تىق يگىلىك» مۋزەيارالىق سەرىك­تەستىك جوباسى اياسىندا قويىلدى. جيىنعا قاتىسقان «ازىرەت سۇلتان» قورىق مۇراجايىنىڭ ديرەكتورى ماۋلەن جارىلقاسىن ۇلىنىڭ: «كەز كەلگەن كورمە مۇراجاي ءۇشىن مارتەبە ءارى ۇلكەن جۇك. وتاندىق مۋزەي ءىسى سەرپىلىستى قاجەت ەتەدى. مۋزەيگە ءوز بەتىمىزشە كەلىپ, تاريحي تانىمىمىزدى كەڭەيتۋ تۇر­عىسىنان العاندا, ءبىز كورشىلەس رەسەيمەن سالىستىرعاندا ءبىرشاما ارتتا قالىپ قويعان سياقتىمىز», دەۋى مەملەكەت تاراپىنان مۋزەي ىسىنە بارىنشا كوڭىل ءبولىنىپ وتىرعانىنا قاراماستان مۋزەيتانۋ, ەسكەرتكىشتەر, جادىگەرلەر ارقىلى ەلتانۋ ماسەلەسىنە كەلگەندە قاراپايىم جۇرتتىڭ كوپ نارسەگە ءمان بەرمەيتىنىن اڭعارتادى. كورمەگە قاتىسقان پارلامەنت ءماجىلىسىنىڭ دەپۋتاتى كامال بۇر­حانوۆ ارحەولوگيا مەن تاريح سالاسىنا بەي-جاي قارامايتىندار قاتارىندا دەسەك, حالىق قالاۋ­لىسى مۇنداي كورمەلەردى ۇيىم­داستىرعاندا وسكەلەڭ ۇرپاققا اتا-باباسىنىڭ عىلىم مەن مادەنيەتتەن, ۇلى وركەنيەتتەن ساۋاتى جوعارى بولعانىن, تۇرمىسى ناشار بول­عانمەن, كەدەي-كەپشىكتىڭ ءوزىنىڭ شاڭىراعى جارىقسىز وتىرماعانىن ءتۇسىندىرۋ قاجەت دەپ سانايدى. استانا مۋزەيىندە شىراعداندار كورمەسى كوپشىلىك نازارىنا ءبىر اي بويى ۇسىنىلادى, سودان سوڭ وزگە وبلىستارعا اتتاناتىنىن ايتقان «ازىرەت سۇلتان» مەملەكەتتىك تا­ري­حي-مادەني قورىق مۇراجايىنىڭ قىزمەتكەرلەرى بابادان قالعان اسىل مۇرانى ەلوردالىقتار كورىپ قالسا دەگەن نيەتتە. قۇندىز ەرالى.