ال عارىشقا ۇشقان تۇڭعىش ايەل تۋريست ءتۇبى يراننان شىققان انۋشە انساري اتتى امەريكالىق كاسىپكەر ەدى. ول دا 2006 جىلى 18 قىركۇيەكتە رەسەيلىك «سويۋز تما-9» كەمەسىمەن كوتەرىلىپ, حالىقارالىق عارىش ستانساسىندا 8 كۇن قوناقتاعان.
دەرەكتەردى قايتا قاۋزاۋ سەبەبىمىز, الداعى كۇندەرى وتانداسىمىز داننا قاراعۇسوۆا «Blue Origin» كومپانياسىنىڭ NS-36 زەرتتەۋ ميسسياسىنىڭ قۇرامىندا عارىشقا اتتانعالى وتىر. ءسويتىپ 8 قازاندا ول قازاقستاننان شىققان العاشقى عارىشتىق تۋريست اتانباقشى.
ەلىمىزدى عارىشپەن ۇشتاستىراتىن تاريحي بايلانىستار جەتكىلىكتى دەسەك تە, داننانىڭ بۇل ساپارى – ەرەكشە مانگە يە. ادامزات بالاسىنىڭ جەتى قات كوككە كوتەرىلۋىنە «باتاسىن بەرگەن» بايقوڭىردان وتانداسىمىز تۇڭعىش تۋريست رەتىندە عارىشقا جول تارتقالى وتىر.
وتانداسىمىزدىڭ وزىنە كەلەتىن بولساق, ول مەديا, يۆەنت پەن ديستريبۋتسيا سالاسىندا 25 جىلدان استام تاجىريبە جيناعان مامان. ەلدەگى ەڭ ءىرى مەديا جانە يۆەنت-حولدينگ – «First Media Group»-تىڭ نەگىزىن قالاۋشىلاردىڭ ءبىرى. داننا – تەك ۆيزيونەر عانا ەمەس, سونىمەن قاتار ەڭ باتىل يدەيالاردى جۇزەگە اسىرا بىلەتىن تاجىريبەلى مامان رەتىندە دە تانىلعان.
بۇگىندە وتانداسىمىز ءوزىن-ءوزى رەتتەۋ سالاسىنداعى حالىقارالىق IT-جوباسىنىڭ نەگىزىن قالاۋشىلاردىڭ ءبىرى رەتىندە ەرەكشەلەنەدى. وسىناۋ عارىش ساپارى ونىڭ زەرتتەۋ جۇمىستارىنىڭ ءبىر پاراسى ءارى جۇمىس جوبالارى اياسىندا ءوز كومانداسى ازىرلەپ جاتقان تەحنولوگيالاردى جەكە سىناپ كورەدى.
«ادامزاتتىڭ كەلەشەگى عارىشپەن تىكەلەي بايلانىستى. ءبىز جاڭا كوكجيەكتەردى يگەرە وتىرىپ, تەحنولوگيالاردى دا دامىتىپ, ءوز مۇمكىندىكتەرىمىزدى كەڭەيتە تۇسەمىز. مەن ءۇشىن بۇل ساپار – جىلدار بويى جيناعان تاجىريبەم مەن ارمانىمنىڭ ءبىر بولشەگى ءارى زەرتتەۋ جوباسىنىڭ ماڭىزدى كەزەڭى», دەيدى داننا قاراعۇسوۆا.
الماتى
