توبىقتى جەرىندە وتكەن مەرەيتويعا پارلامەنت دەپۋتاتتارى, زيالى قاۋىم, مادەنيەت جانە قوعام قايراتكەرلەرى, جاستار جينالدى. پرەزيدەنت قاسىم-جومارت توقاەۆ قۇتتىقتاۋ جەدەلحاتىن جولداپ, وندا بەكەت اتانىڭ حالقىنا جاساعان ەڭبەگىن, اعارتۋشىلىق جولىن جانە ادامزاتقا ورتاق قۇندىلىقتاردى ناسيحاتتاۋداعى ءرولىن ەرەكشە اتاپ ءوتتى. پرەزيدەنتتىڭ قۇتتىقتاۋىن ايماق باسشىسى نۇرداۋلەت قيلىباي وقىپ بەردى.
«بەكەت مىرزاعۇل ۇلى – ەلىنە تۇتقا, جۇرتىنا پانا بولعان تۇعىرلى تۇلعالارىمىزدىڭ ءبىرى. ول بۇكىل عۇمىرىن حالقىنىڭ دۇنيەتانىمىن بايىتۋعا ارناپ, اعارتۋشىلىقپەن اينالىستى. سانالى ۇرپاق تاربيەلەۋگە ايرىقشا ءمان بەرىپ, مەيىرىمدىلىك, جاناشىرلىق, تاتۋلىق, بىرلىك, ادىلدىك سياقتى بارشا ادامزاتقا ورتاق قۇندىلىقتاردى دارىپتەدى. بەكەت اتا كۇللى قازاققا جانە باۋىرلاس ەلدەرگە عۇلاما ويشىل, اتى اڭىزعا اينالعان اۋليە رەتىندە تانىلدى. بۇگىندە ماڭعىستاۋ وڭىرىندەگى جەراستى مەشىتتەرى قۇلشىلىق ورنى, ءبىلىم ورداسى ءارى ەرەكشە ساۋلەت ونەرىنىڭ تۋىندىسى رەتىندە تانىمال. مەنىڭ تاپسىرماممەن, وعىلاندىداعى جەراستى مەشىتىن جانە وسى ايماقتاعى باسقا دا تاريحي نىسانداردى يۋنەسكو-نىڭ بۇكىلالەمدىك مۇرالار تىزىمىنە قوسۋ ءۇشىن ناقتى جۇمىس اتقارىلىپ جاتىر. جۇرتىن ىزگىلىككە ۇندەگەن ابىزدىڭ بولمىسىن بيىكتەتە تۇسەتىن مادەني-رۋحاني قۇندىلىقتار ۇلتىمىزدىڭ باعا جەتپەس بايلىعى سانالادى. ونى ساقتاپ, ۇرپاققا ميراس ەتۋ – پارىز. بارشاڭىزعا اماندىق, باق-بەرەكە تىلەيمىن», دەلىنگەن جەدەلحاتتا.
مەرەيتوي اياسىندا شوپان اتا مەن بەكەت اتا مەشىتتەرىنە زيارات ەتىلىپ, ۇلتتىق سپورت سايىستارى, تاي جارىسى, الامان بايگە, قازاق كۇرەسى جانە باسقا دا جارىستار ۇيىمداستىرىلدى. جۇزدەن استام كيىز ءۇي تىگىلىپ, اس بەرىلدى.
سونىمەن بىرگە «ويتالقى» الاڭىندا ەلدىك پەن بىرلىككە قاتىستى پىكىرتالاس وتكىزىلىپ, «ماڭعىستاۋ ماشايىقتىڭ باسقان جەرى» اتتى كونتسەرت پەن «اۋليەلەر اۋەزى» ونەر كەشى كورەرمەنگە ۇسىنىلدى.
ايتا كەتەيىك, بارلىق شارالار دەمەۋشىلەردىڭ قاراجاتى ەسەبىنەن ءوتتى.
