بەدەلى بيىك حالىقارالىق ۆوكاليستەر كونكۋرسىنىڭ جەڭىمپازدارى جامبىل اتىنداعى قازاق مەملەكەتتىك فيلارمونياسىندا ماراپاتتالدى.
وپەرا ونەرىنىڭ جەڭىمپازى اتانۋ ءۇشىن قازاقستان, ارمەنيا, رەسەي, وزبەكستان, قىرعىزستان, موڭعوليا, يتاليادا جۇمىس ىستەيتىن ۋكراينا مەن قازاقستاننىڭ 52 ورىنداۋشىسى تالانت جارىستىردى. اقتىق سىنعا وتكەن 17 ءانشىنىڭ ونەرىن الەمدىك وپەرا مايتالماندارىنان قۇرالعان حالىقارالىق قازىلار القاسى باعالادى.
وپەرا مەرەكەسى ىسپەتتى بايقاۋدا قازىلار القاسىنىڭ ءتورايىمى كسرو مەن قازاقستاننىڭ حالىق ءارتىسى, سوتسياليستىك ەڭبەك ەرى, اكادەميك بيبىگۇل احمەتقىزى تولەگەنوۆا ۇيىمداستىرۋشىلارعا, دەمەۋشىلەر مەن بارشا قاتىسۋشىلارعا شىنايى العىسىن بىلدىرە وتىرىپ, جەڭىمپازدىڭ اتىن ءوزى جاريالادى.
بيىلعى جىلدىڭ باس جۇلدەسىن (گران-پري) ماسكەۋدەن كەلگەن سوفيا ساكانيا يەلەندى.
جيىرما جاستاعى ءانشى باقىتجان بايقادام ۇلىنىڭ «سۇيگەن ساۋلەم» ءانىن ناشىنە كەلتىرە ورىنداۋىمەن كورەرمەندەردىڭ كوزىنە ءتۇستى.
«اۋقىمى بيىك بايقاۋدا جەڭىسكە جەتكەنىمە قۋانىشتىمىن! شىنى كەرەك, جەڭىمپاز اتانامىن دەپ ويلاعان جوقپىن. ويتكەنى, باسەكەنىڭ ءباسى جوعارى ەدى. بۇل كونكرۋسقا كاتىسۋدىڭ ءوزى مەن ءۇشىن ءارى سىناق, ءارى باق بولدى. بيبىگۇل احمەتقىزى – اڭىز ادام. ونى ءوز كوزىممەن كورۋدىڭ ءوزى – ۇلكەن باقىت. البەتتە, وعان قوسا حالىقارالىق بايقاۋلار وراسان تاجىريبە بەرەدى, وركەسترمەن جۇمىس ىستەۋ, بۇرىن-سوڭدى باستان وتكەرمەگەن اسەرلەر مەن كۇتپەگەن جەڭىس اكەلدى. بۇل بايقاۋ ماعان ۇلكەن مەكتەپتەن وتكەندەي اسەر قالدىردى», دەدى سوفيا.
سونىمەن حالىقارالىق وپەرا ونەرىنىڭ دوداسىنداعى ءى ورىنعا ءاليحان بەيسەكوۆ (الماتى), ەكاتەرينا سۆيريدوۆا (ماسكەۋ) مەن مۋنحتۋۆشين حورولگوراۆ (ۇلان-باتىر) لايىقتى دەپ تانىلدى. ءىى ورىن – بەكۇلان ەربولات ۇلىنا (استانا), ءدىلناز ومارحانوۆا (استانا) مەن سەۆاستيان مارتىنيۋكقا (كراسنويارسك) بەرىلدى. ءىىى ورىندى جانداربەك ەركىنباەۆ (الماتى), حاديچا يمامنازاروۆا (تاشكەنت) يەلەندى.
جاس تالانتتاردىڭ ىشىنەن ءازيزا ابدرەيىم (الماتى), بوگدان شەۆچەنكو (اتىراۋ), ارۋجان جالعاسوۆا (الماتى), ارۋجان توقتاعان (الماتى), ارۋجان الپىسباەۆا (الماتى), اتاحان ايبەكۋلۋ (بىشكەك), حۋرساندبەك اتامۋراتوۆ (نوكىس), الەكسەي يۋركوۆسكي (سانكت-پەتەربۋرگ) ديپلومانت اتاندى.
قازاقستان كومپوزيتورلارىنىڭ بيبىگۇل تولەگەنوۆا رەپەرتۋارىنداعى شىعارماسىن ۇزدىك ورىنداعانى ءۇشىن تاعى دا سوفيا ساكانيا مەن پيتەرلىك الەكسەي يۋركوۆسكي ارناۋلى سىيلىقتى الىپ كەتتى. قاتىسۋشى ەلدىڭ حالىق ءانىن ۇزدىك شىرقاعانى ءۇشىن مۋنحتۋۆشين حورولگوراۆ (موڭعوليا) مەن ۇزدىك كونتسەرتمەيستەرلەر رەتىندە لاريسا شالاباەۆا مەن مارينا التۋحوۆا ماراپاتتالدى.
گالا-كونتسەرتتە قازاقتىڭ, الەمدىك كلاسسيكالىق ايگىلى شىعارمالار ورىندالىپ, بۇلبۇل داۋىس يەلەرىن ە.احمەدياروۆتىڭ ديريجەردىك ەتۋىمەن قر ت.ابدراشەۆ اتىنداعى مەملەكەتتىك سيمفونيالىق وركەسترى سۇيەمەلدەدى.
سىياقى قورىنا كەلەتىن بولساق, گران-پري يەگەرىنە – 5 400 000 تەڭگە مەن لاۋرەات اتاعى بۇيىردى. ءى ورىنعا – 2 700 000 تەڭگە, ءىى ورىنعا – 1 500 000 تەڭگە, ءىىى ورىنعا – 1 200 000 تەڭگە مەن لاۋرەات اتاقتارى بەرىلدى.
فينالدىق تۋرعا دەيىن جەتىپ, بىراق لاۋرەات اتاعىن الماعان ءاربىر قاتىسۋشى ديپلومدارعا قوسا, 350 000 تەڭگە كولەمىندەگى كوتەرمەلەۋ سىياقىسىمەن ماراپاتتالىپ, قۇرمەتتەن قۇر الاقان قالعان جوق.
