كۋاگەرلەردىڭ ايتۋىنشا, وقيعا پەتروپاۆلداعى № 2 اۆتوبۋستا بولعان. ەكى ەر ادام شامامەن 12 جاستاعى ەكى قىزعا ءتيىسىپ, بەيادەپ سوزدەر ايتقان, ولارعا جاسوسپىرىمدەردىڭ سىرتقى كەلبەتى ۇناماعان. جولاۋشى بويجەتكەن ارا تۇسكەنىمەن, جانجال ۋشىعا تۇسكەن.
— قىز قاتتى قورقىپ, جىلادى. ال اۆتوبۋستىڭ كوندۋكتورى وقيعاعا مۇلدەم ارالاسقان جوق. بىردەن پوليتسيا مەن جەدەل جاردەم قىزمەتكەرلەرىن شاقىردىق, - دەيدى اۆتوبۋستا بولعان جولاۋشى.
ءتارتىپ ساقشىلارى كۇدىكتىلەردى ءىزىن سۋىتپاي انىقتاپ, قىزعا قول جۇمساعان ەر ادامدى قاماۋعا الدى.
— قالا ىشىندەگى اۆتوبۋستا كامەلەتكە تولماعان قىزعا قاتىستى قۇقىققا قايشى ارەكەتتەر فاكتىسى بويىنشا پوليتسيا دەرەۋ شارالار قابىلدادى. كۇدىكتى بىردەن ۇستالىپ, پوليتسيا بولىمشەسىنە جەتكىزىلدى. اتالعان فاكتى بويىنشا قىلمىستىق ءىس قوزعالدى. سوتقا دەيىنگى تەرگەۋ امالدارى جۇرگىزىلىپ جاتىر. بالالارعا قاتىستى مۇنداي ارەكەتتەر زاڭدى ورەسكەل بۇزۋ رەتىندە باعالانادى جانە قاتاڭ جازالانادى. بۇل جاعداي تولىق پوليتسيا باقىلاۋىندا, — دەپ جاۋاپ بەردى سولتۇستىك قازاقستان وبلىستىق پوليتسيا دەپارتامەنتى ءباسپاسوز قىزمەتىندەگىلەر.
