مەرەكە باستالدى!

ناۋرىز كەلدى! ءيا, ناۋرىز كەلىپ, ەلدە شات-شادىمان شاتتىق ورنادى. كۇن جىلىنىپ, جەر قارايىپ, كوڭىل شۋاعى كوگىلدىر كوكتەمدى كورىكتى ەتە ءتۇستى. ناعىز قۋانىشتى مەيرام باستالدى. بۇل ىزگىلىكتى مەرەكەدەن ەلىمىزدىڭ قورعانى – قازاقستاننىڭ اسكەري قىزمەتشىلەرى دە تىس قالمادى. ويتكەنى, ناۋرىز مەيرامى – شىعىستا جىلدىڭ باسى بولىپ سانالاتىن ەڭ ۇلى مەرەكە. ۇلىستىڭ ۇلى كۇنى ارقاشان ايرىقشا قارسى الىنادى. سوندىقتان ءبىزدىڭ حالىق ءۇشىن ناۋرىز – دوستىق, ىنتىماقتاستىق, بەيبىتشىلىك پەن تاتۋلىقتىڭ نىشانىنا اينالعان ۇلىق مەرەكە رەتىندە ەرەكشە تويلانادى. مىنە, ەندى وسىعان وراي ەل قارۋلى كۇشتەرىنىڭ اسكەري قىزمەتشىلەرى كوكتەمنىڭ باستى شىرايلى مەرەكەسىن لايىقتى وتكىزۋ ءۇشىن دايىندىققا كىرىسىپ كەتتى. ول ءۇشىن كۇنى ەرتەڭ بارلىق اسكەري بولىمدەردە ءداستۇرلى تۇردە مادەني-ويىن-ساۋىق باعدارلامالارى ۇيىمداستىرىلادى, سالتاناتتى جاساۋمەن كيىز ۇيلەر تۇرعىزىلىپ, مول داستارقان جايىلىپ, ءتۇرلى سپورتتىق جارىستار مەن ۇلتتىق سالت-ءداستۇر تاقىرىبىندا سايىستار وتكىزىلەدى. ال سولاردىڭ اراسى­نان «وڭتۇستىك» وڭىرلىك اسكەري قىز­مەتشىلەرى ناۋرىز مەيرامىنا العاشقىلاردىڭ قاتارىندا دايىندىق جۇمىستارىن جۇرگىزىپ, جەرگىلىكتى تۇرعىندارمەن بىرلەسىپ التىباقان, ءساندى اق كيىز ۇيلەرىمەن قازاقتىڭ ناعىز ۇلتتىق اۋىلىن تۇرعىزدى. وفيتسەرلەر مەن ساربازدار قىز قۋ, تەڭگە الۋ, ارقان تارتۋ سياقتى ۇلتتىق ويىندارعا قاتىسسا, اپا-اجەلەرىمىز ۇلتىمىزدىڭ ءداستۇرلى ناۋرىز كوجەسىن ازىرلەدى. بۇل كوكتەم مەرەكەسىنە قازاقستانداعى جالعىز تاۋ-قورىعى روتاسىنىڭ اسكەري قىزمەتشىلەرى قاتىستى. ولار اسكەري تەحنيكا وتە المايتىن شيەلەنىستى تاۋلى جەرلەردە جەكە قۇرامدى تاسىمالداۋعا ارنالعان اتتاردىڭ ۇستىندە شاباندوزدىق پەن ءادىل-ءتاسىل ەلەمەنتتەرىن كورسەتتى. الەكساندر تاسبولاتوۆ, «ەگەمەن قازاقستان».