دەمەك كەز كەلگەن كرەديتور, مەيلى ول بانك بولسىن, سەرىكتەستىك نە قارىزدى ساتىپ العان ۇيىم بولسىن, بەرەشەكتى ءوندىرىپ الا المايدى.
الايدا مۇنداي مۇمكىندىككە يە بولۋ ءۇشىن بىرنەشە تالاپ ساقتالۋى قاجەت. ەڭ باستىسى – بورىش كولەمى 6 ميلليون 300 مىڭ تەڭگەدەن اسۋى ءتيىس, سونداي-اق بورىشكەردىڭ تولەم قابىلەتىن دالەلدەيتىن تابىسى مەن مۇلكى بولماۋى كەرەك.
قر قارجى مينيسترلىگى مەملەكەتتىك كىرىستەر كوميتەتىنىڭ دارمەنسىز بورىشكەرلەرمەن جۇمىس باسقارماسىنىڭ باسشىسى مەرۋەرت سيسەمباەۆا سوتتان تىس بانكروتتىق راسىمىنە قاتىساتىن كرەديتورلار ءتىزىمى كەڭەيتىلگەنىن اتاپ ءوتتى.
ء«بىز بۇل تىزىمگە تەك قارجى ۇيىمدارىن عانا ەمەس, سونىمەن قاتار ادامنىڭ الدىنان ميكروقارجىلىق قارىزدى ساتىپ العان نەمەسە بۇرىن قارجى ۇيىمى بولىپ, بۇگىندە جاي عانا جشس رەتىندە جۇمىس ىستەيتىن كومپانيالاردى دا قوستىق», – دەدى ول.
سونىمەن قاتار, بانكروتتىق ءراسىمى جەڭىلدەتىلدى. بۇدان بىلاي بورىشكەر 2025 جىلدىڭ 1 قاڭتارىنا دەيىن العان نەسيەلەرىن قارجى ۇيىمدارىمەن رەتتەۋگە مىندەتتى ەمەس.
تاعى ءبىر ماڭىزدى وزگەرىس – سوتتان تىس بانكروتتىقتى توقتاتۋعا قاتىستى. ەندى بورىشكەر ءوز قالاۋىمەن, ەشقانداي سەبەپ تۇسىندىرمەستەن, پروتسەستى توقتاتا الادى. بۇل شارا ءوتىنىش بەرىپ, كەيىن ويىنان اينىپ نەمەسە جالعان اقپارات ۇسىناتىن ازاماتتاردىڭ سانىن ازايتۋعا باعىتتالعان.
كەيبىر تۇرعىندار بۇل وزگەرىستى قولداپ وتىر.
«ادام نەسيە الادى, بىراق ءتۇرلى سەبەپپەن تولەي الماي قالۋى مۇمكىن. ەگەر جاعدايى شىنىمەن قيىن بولسا, مەملەكەت تاراپىنان كومەك الۋ ورىندى. بىراق وتىرىك اقپارات بەرۋگە بولمايدى», – دەيدى شىمكەنت تۇرعىنى.
ال باسقا ازاماتتار بانكروت دەپ تانىلعاننان كەيىن قايتا نەسيە الۋ مۇمكىندىگى بولماۋى ءتيىس دەپ ەسەپتەيدى.
«ەگەر ادامدا كولىك نە تابىس كوزى بار بولسا, بىراق قارىزىن تولەۋدەن جالتارسا – بۇل الاياقتىققا جاتادى. ال شىنىمەن جاعدايى اۋىر ادامدارعا جەڭىلدىك كەرەك», – دەيدى تاعى ءبىر تۇرعىن.
قارجى مينيسترلىگى بانكروتتىق ءراسىمىن بارىنشا اشىق ءارى ءادىل ەتۋ ءۇشىن قوسىمشا باقىلاۋ تەتىكتەرىن ەنگىزۋدى جوسپارلاپ وتىر.
